ប្រទេសអេស្ប៉ាញ ៖ វីរុស COVID-19 បន្តរាតត្បាតខ្លាំងលើពិភពលោក ពិសេសនៅអឺរ៉ុបដែលនៅទីនោះ បណ្ដាប្រទេសដែលរងការប៉ះពាល់ខ្លាំងជាងគេ កំពុងតែពង្រឹងការតស៊ូរបស់ពួកគេប្រឆាំងវីរុសនេះ ដែលសម្លាប់មនុស្សជាង៣០.០០០នាក់ហើយលើពិភពលោក។
ដោយពុំទាន់មានវ៉ាក់សាំងការពារឬថ្នាំព្យាបាលច្បាស់លាស់ មនុស្សជាង៣ពាន់លាននាក់ហើយ គិតមកដល់ថ្ងៃទី២៩មីនារស់នៅក្នុងស្ថានភាពបង្ខាំងមិនឲ្យចេញក្រៅលើគ្រប់ទ្វីបទាំងអស់។ សហរដ្ឋអាមេរិកក៏រងការប៉ះពាល់ខ្លាំងដោយចំនួនអ្នកឆ្លងបន្តកើនឡើងយ៉ាងលឿន ដល់ជាង១២៤.០០០នាក់ ហើយជិតពាក់កណ្ដាលនៃអ្នកឆ្លងទាំងនោះរាប់ឃើញនៅរដ្ឋញូវយ៉ក ។
២ភាគ៣នៃអ្នកបាត់បង់ជីវិតទាំង៣០.០០០នាក់ គឺនៅអឺរ៉ុប ជាទ្វីបរងការប៉ះពាល់ខ្លាំងបំផុត ដោយនៅអ៊ីតាលីមានអ្នកបាត់បង់ជីវិតដល់១០.០២៣នាក់ ជាមួយអ្នកបាត់បង់ជីវិតថ្មី៨៨៩នាក់រយៈពេល២៤ម៉ោងចុងក្រោយនេះ បន្ទាប់មកគឺអេស្ប៉ាញ ជាមួយអ្នកបាត់បង់ជីវិតកើនដល់៥.៦៩០នាក់ជាមួយអ្នកបាត់បង់ជីវិតថ្មី៨៣២នាក់ ហើយបារាំងចំនួនអ្នកបាត់បង់ជីវិតឡើងដល់២.៣១៤នាក់ ជាមួយអ្នកបាត់បង់ជីវិតថ្មី៣១៩នាក់។
ប្រឈមមុខនឹងភាពធ្ងន់ធ្ងរនេះ បណ្ដាប្រទេសដែលរងការប៉ះពាល់ខ្លាំងបានបង្កើនបណ្ដាមធ្យោបាយនិងវិធានការទប់ទល់វិបត្តិសុខាភិបាលនោះ ដែលធ្ងន់ធ្ងរបំផុតពុំធ្លាប់មានពីមុនមកចាប់តាំងពី១សតវត្សមកហើយ។ ប្រមុខរដ្ឋាភិបាលអេស្ប៉ាញលោកPEDRO SANCHEZ ប្រកាសកាលពីយប់ថ្ងៃទី២៨មីនា ពីការបញ្ឈប់រាល់សកម្មភាពសេដ្ឋកិច្ច មិនចាំបាច់ក្នុងរយៈពេល២សប្ដាហ៍។
នៅអ៊ីតាលីបុងសម្រាប់ទទួលស្បៀង នឹងត្រូវចែកចាយ សម្រាប់បណ្ដាអ្នកក្សត់ខ្សោយបំផុត ក្រោយបញ្ឈប់សកម្មភាពសេដ្ឋកិច្ចក្នុងប្រទេស។ ប៉ូលិសបានដាក់ពង្រាយនៅមុខបណ្ដាផ្សារទំនើប ដើម្បីបង្ការ ការប្លន់នៅតំបន់ស៊ីស៊ីលក្រោយពីបណ្ដាអ្នកទិញ ប៉ុនប៉ងយកទំនិញមិនបង់ប្រាក់ ព្រោះលើកហេតុផលថាគ្មានប្រាក់សម្រាប់ទិញ។
នៅបារាំងរដ្ឋាភិបាលបានបញ្ជាទិញម៉ាសចំនួន១ពាន់លានហើយមានបំណងរៀបចំគ្រែពេទ្យឲ្យបាន១៤.០០០ទល់នឹង៥.០០០កាលពីដំបូង។
ការឆ្លងរាលដាលនៃវីរុសនោះ ក៏លឿនដែរនៅប្រទេសអង់គ្លេស ដែលនៅទីនោះព្រះអង្គម្ចាស់ឆាលជារជ្ជទាយាទ និងនាយករដ្ឋមន្ត្រីលោកបូរីសចនសុនគ៏ឆ្លងវីរុសនោះក៏ដូចជារដ្ឋមន្ត្រីសុខាភិបាល។ តុល្យការនៃមនុស្សបាត់បង់ជីវិតដោយសារវីរុសក្នុងប្រទេសនេះ មានលើសពី១.០០០នាក់ ជាមួយអ្នកបាត់បង់ជីវិតថ្មី២៦០នាក់តែ១ថ្ងៃ។
ក្នុងសារលិខិតមួយច្បាប់លោកបូរីសចនសុនរៀបរាប់ថា យើងដឹងថាអី្វៗនឹងធ្ងន់ធ្ងរមុនពេលមានការកែលម្អវិញ។ លោកអំពាវនាវដល់ប្រជាជនឲ្យគោរពការបង្ខាំងជាទូទៅដែលដាក់ពីយប់ថ្ងៃទី២៣មីនាមក សម្រាប់រយៈពេល៣សប្ដាហ៍៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ