ខេត្តកំពង់ស្ពឺ ៖ ដោយសារតែមានការភ័យខ្លាចមេរោគកូវីដ-១៩ដែលកំពុងរាតត្បាត បានធ្វើឱ្យអ្នកភូមិតាមទីជនបទ ខ្លះងាកទៅរកអបិយជំនឿផ្សេងៗ នាំគ្នាធ្វើរូបទីងមោងពីចំបើង យកមកចងភ្ជាប់នៅតាមរបងផ្ទះ ដើម្បីឧបកិច្ចឲ្យទីងមោងទាំងនេះ ដេញគ្រោះឧបទ្រុបចង្រៃកុំឲ្យចូលមកបៀតបៀនយាយីដល់ក្រុមគ្រួសាររបស់ពួកគាត់ ។…
ខេត្តកំពង់ស្ពឺ ៖ ដោយសារតែមានការភ័យខ្លាចមេរោគកូវីដ-១៩ដែលកំពុងរាតត្បាត បានធ្វើឱ្យអ្នកភូមិតាមទីជនបទ ខ្លះងាកទៅរកអបិយជំនឿផ្សេងៗ នាំគ្នាធ្វើរូបទីងមោងពីចំបើង យកមកចងភ្ជាប់នៅតាមរបងផ្ទះ ដើម្បីឧបកិច្ចឲ្យទីងមោងទាំងនេះ ដេញគ្រោះឧបទ្រុបចង្រៃកុំឲ្យចូលមកបៀតបៀនយាយីដល់ក្រុមគ្រួសាររបស់ពួកគាត់ ។ ក្រៅពីទីងមោងក៏មានភ្នក់ភ្លើងដុតទល់ភ្លឺទៀតផង ។ ជំនឿរបៀបនេះគឺមានតាំងពីបុរាណមកម្ល៉េះមិនមែនទើបតែមាននៅពេលនេះទេ ។
បើតាមលោកតាមួយរូបឈ្មោះអូន រស់នៅភូមិត្រាវ ឃុំទឹកល្អក់ ស្រុកគងពិសី បានបញ្ជាក់ប្រាប់ថា ការតាំងទីងមោងនេះ គឺកើតមានតាំងពីយូរលង់ណាស់មកហើយ ឲ្យតែដល់មុនរដូវចូលឆ្នាំ គឺពលរដ្ឋតែងតែនាំគ្នាយកអាវនិងខោចាស់ៗ ហើយយកចំបើងមកញ៉ុកចងជាមួយឈើឆ្កាងធ្វើជារូបមនុស្ស ដោយឧបកិច្ចឲ្យទីងមោងនេះដេញគ្រោះ ឧបទ្រុបចង្រៃចេញពីក្រុមគ្រួសាររបស់គាត់គឺមិនឱ្យមកយាយី និងបៀតបៀនដល់សមាជិកគ្រួសារណាមួយឲ្យកើតមានជំងឺនោះទេ ។
លោកតាបានបញ្ជាក់ថារហូតមកដល់ពេលថ្មីៗនេះ ស្រាប់តែមានផ្ទុះជំងឺដែលខាងពេទ្យហៅថាកូវីដ-១៩ នោះធ្វើឲ្យអ្នកស្រុករឹតតែមានការភ័យខ្លាចបាននាំគ្នានឹកឃើញការដាក់តាំងរូបទីងមោងនេះ ព្រមទាំងនាំគ្នាធ្វើភ្នក់ភ្លើងដុតនៅពេលយប់ស្ទើរដល់ភ្លឺមិនឱ្យរលត់ទេ ក្នុងគោលបំណងបញ្ជៀសនូវឧបទ្រុបចង្រៃកុំឱ្យមកបៀតបៀនយាយីដល់ក្រុមគ្រួសាររបស់ពួកគាត់ ។ មានភូមិជាច្រើនក្នុងស្រុកគងពិសីបានធ្វើទីងមោងនិងដុតភ្លើងមុខផ្ទះជាជំនឿតៗគ្នាមិនអាចលុបជំនឿនេះបានទេ ។
អ្នកស្រុកតាមទីជនបទភ័យពេកនាំគ្នាចងទីងមោងការពារជំងឺកូរ៉ូណា
ខេត្តពោធិ៍សាត់ ៖ ដោយសារតែការឆ្លងរីករាលដាលនៃជំងឺកូវីដ-១៩ ពីមនុស្សម្នាក់ទៅមនុស្សម្នាក់ កាន់តែមានការកើនឡើងពីមួយថ្ងៃទៅមួយថ្ងៃ ធ្វើឲ្យប្រជាពលរដ្ឋនៅតាមជនបទមួយចំនួនក្នុងខេត្តពោធិ៍សាត់ មានការភិតភ័យយ៉ាងខ្លាំង បាននាំគ្នាប្រើមធ្យោបាយចងទីងមោងតាមខ្លោងទ្វាររបងផ្ទះគ្រប់គ្នា គ្រប់ផ្ទះក្នុងភូមិ ដើម្បីការពារមេរោគកូវីដ-១៩កុំឲ្យចូលទៅចម្លងកូនចៅ ។ ការធ្វើបែបនេះ ជាការយល់ឃើញរបស់ពួកគាត់មួយបែបដែលមានអបីយជំនឿបន្តពីចាស់ៗជំនាន់មុន ។ ពេលមានជំងឺអ្វីរាតត្បាតក្នុងភូមិម្ដងៗ ពួកគាត់តែងតែចងទីងមោងដើម្បីបន្លាចខ្មោចព្រាយបិសាច ដេញជំងឺអាសន្នរោគ និងឧបទ្រុបចង្រៃផ្សេងៗ កុំឲ្យមកយាយីក្រុមគ្រួសាររបស់ពួកគាត់ ។
ជាក់ស្ដែង ខណៈពេលដែលពិភពលោកក៍ដូចប្រទេសកម្ពុជាយើងកំពុងតែវឹកវរនឹងជំងឺឆ្លងកូវីដ-១៩ ដែលកំពុងតែចម្លង ស្រាប់តែគេឃើញប្រជាពលរដ្ឋមួយចំនួននៅតាមសង្កាត់ជាយៗក្រុងពោធិ៍សាត់ និងតាមបណ្ដាស្រុកមួយចំនួនទៀត នាំគ្នាចងទីងមោងតាមខ្លោងទ្វាររបងផ្ទះព្រោងព្រាត ខ្លះជារូបទាហាន ខ្លះជារូបមនុស្សពាក់មុខត្លុក និងមនុស្សកាន់ដាវ កាំបិត ពូថៅជាដើម ដែលធ្វើឲ្យក្រុមការងារចុះទៅផ្សព្វផ្សាយវិធានការបង្ការ និងទប់ស្កាត់ការរីករាលដាលជំងឺកូវីដ-១៩ ដល់ពួកគាត់ទប់សំណើចមិនបាន តែមិនហ៊ានរារាំងជំនឿពួកគាត់ទេ ។
សូមបញ្ជាក់ថា នៅរសៀលថ្ងៃទី២៥ ខែមីនា ឆ្នាំ២០២០នេះ រដ្ឋបាលខេត្តពោធិ៍សាត់បានបន្ដចុះធ្វើការផ្សព្វផ្សាយវិធានការបង្ការ និងទប់ស្កាត់ការរីករាលដាលជំងឺកូវីដ-១៩ ក្នុងក្រុងពោធិ៍សាត់ ដោយបានបែងចែកជា៣ក្រុម ក្រុមទី១-ចុះទៅសង្កាត់ចំរើនផល និងសង្កាត់លលកស ក្រុមទី២-សង្កាត់ផ្ទះព្រៃ និងស្វាយអាត់ ក្រុមទី៣-សង្កាត់បន្ទាយដី និងសង្កាត់រលាប ។ នៅក្នុងនោះមានរថយន្ដចំនួន១១គ្រឿង បំពាក់ឧបករណ៍ឧគ្ឃោសនស័ព្ទ៦គ្រឿង ដោយមានការចូលរួមពីមន្ត្រីសាលាខេត្ត មន្ត្រីមន្ទីរព័ត៌មាន មន្ត្រីមន្ទីរសុខាភិបាល និងក្រុមយុវជនក្មេងវត្ត ។ ក្រុមនីមួយៗបានចុះពន្យល់ណែនាំដោយផ្ទាល់ អំពីវិធីការពារ លាងសម្អាតដៃនឹងសាប៊ូឲ្យបានស្អាតជានិច្ច និងបានចែកខិត្តប័ណ្ណផ្សព្វផ្សាយអប់រំ ជូនប្រជាពលរដ្ឋរស់នៅតាមដងផ្លូវ និងតាមភូមិនីមួយៗផងដែរ ៕
ចែករំលែកព័តមាននេះ