ខេត្តស្វាយរៀង ៖ បើតាមសេចក្តីរាយការណ៍បឋមបានឱ្យដឹងថា សមកិច្ចជំនាញនៃការិយាល័យបទល្មើសព្រហ្មទណ្ឌកងរាជអាវុធហត្ថខេត្ត នៅព្រឹកថ្ងៃទី២៦ ខែមីនា ឆ្នាំ២០២០ បានបញ្ជូនជនសង្ស័យ២នាក់ដែលជាអ្នកកាសែតទៅតុលាការ ដើម្បីចាត់ការតាមច្បាប់ ពាក់ព័ន្ធនឹងករណីប្រើប្រាស់ដោយខុសច្បាប់នូវសំលៀកបំពាក់ជាអាទិ៍សម្រាប់អាជ្ញាធរសាធារណៈ…
ខេត្តស្វាយរៀង ៖ បើតាមសេចក្តីរាយការណ៍បឋមបានឱ្យដឹងថា សមកិច្ចជំនាញនៃការិយាល័យបទល្មើសព្រហ្មទណ្ឌកងរាជអាវុធហត្ថខេត្ត នៅព្រឹកថ្ងៃទី២៦ ខែមីនា ឆ្នាំ២០២០ បានបញ្ជូនជនសង្ស័យ២នាក់ដែលជាអ្នកកាសែតទៅតុលាការ ដើម្បីចាត់ការតាមច្បាប់ ពាក់ព័ន្ធនឹងករណីប្រើប្រាស់ដោយខុសច្បាប់នូវសំលៀកបំពាក់ជាអាទិ៍សម្រាប់អាជ្ញាធរសាធារណៈ និងបទប្រើប្រាស់ដោយគ្មានសិទ្ធិនូវយានយន្ដដែលមានសញ្ញាសម្គាល់ប្រើប្រាស់ដោយនគរបាល ឬយោធា និងបទជ្រៀតជ្រែកដោយខុសច្បាប់ ក្នុងការបំពេញមុខងារសាធារណៈ។
សមត្ថកិច្ចបានឱ្យដឹងថា យោងតាមការអនុញ្ញាតធ្វើការបើកការស៊ើបអង្កេតបឋមលេខ០២អ.យ ចុះហត្ថលេខាដោយលោកស៊ន មុនី ព្រះរាជអាជ្ញារងនៃអយ្យការអមសាលាដំបូងខេត្ត កាលពីថ្ងៃទី២៦ ខែមីនា ។ អនុញ្ញាតឱ្យមន្ត្រីនគរបាលយុត្តិធម៌កងរាជអាវុធហត្ថខេត្តស្វាយរៀង ធ្វើការស៊ើបអង្កេតបឋមលើអ្នកកាសែត២នាក់ដោយចោទប្រកាន់ពីបទប្រើប្រាស់ដោយខុសច្បាប់នូវសំលៀកបំពាក់ជាអាទិ៍សម្រាប់អាជ្ញាធរសាធារណៈ និងបទប្រើប្រាស់ដោយគ្មានសិទ្ធិនូវយានយន្ដដែលមានសញ្ញាសម្គាល់ប្រើប្រាស់ ដោយនគរបាល ឬយោធា និងបទជ្រៀតជ្រែកដោយខុសច្បាប់ទៅក្នុងការបំពេញមុខងារសាធារណៈ។
ប្រភពដដែលបានបន្តថា ការចាប់ខ្លួននេះ ធ្វើតាមពាក្យបណ្ដឹងរបស់ឈ្មោះហាស់ ស្រីមុំ ភេទស្រី អាយុ៣២ឆ្នាំ មុខរបរអាជីវករ (ឡសត្វឃាត្តជ្រូក) មានទីលំនៅភូមិថ្មស ឃុំស្វាយជ្រំ ស្រុកស្វាយជ្រំ ខេត្តស្វាយរៀង កាលពីថ្ងៃទី១៨ ខែកុម្ភៈ ឆ្នាំ២០២០។
ក្រោយពីបានការអនុញ្ញាតិពីអយ្យការអមសាលាដំបូងខេត្ត មន្ត្រីនគរបាលយុត្តិធម៌កងរាជអាវុធហត្ថខេត្តស្វាយរៀង បានកោះហៅជនសង្ស័យចំនួន២នាក់ ១-ឈ្មោះ អុន សំអឿន (ឈ្មោះធ្លាប់ប្រើ ហង្ស បណ្ឌិត) ភេទប្រុស អាយុ៣៧ឆ្នាំ មុខរបរចាងហ្វាងវេបសាយអាណាចក្រនគរភ្នំ មានទីលំនៅបច្ចុប្បន្នភូមិស្ពឺខាងកើត ឃុំស្ពឺករ ស្រុកបាភ្នំខេត្តព្រៃវែង។ ២-ឈ្មោះ ណយ ចំណាន (ឈ្មោះធ្លាប់ប្រើ ណាន) ភេទប្រុស អាយុ៤១ឆ្នាំ ជាសហការី មានទីលំនៅបច្ចុប្បន្នភូមិព្រៃសម្ភ័រ ឃុំសំបួរ ស្រុកស្វាយទាប ខេត្តស្វាយរៀង ឱ្យចូលខ្លួនមកមន្ទីរយុត្តិធម៌កងរាជអាវុធហត្ថខេត្ត ដើម្បីធ្វើការសាកសួរ។
ក្រោយពីបញ្ចប់ការសាកសួរមន្ត្រីនគរបាលយុត្តិធម៌បានរាយការណ៍ជូនលោកខាំ សុផារី ព្រះរាជអាជ្ញានៃអយ្យការអមសាលាដំបូងខេត្តស្វាយរៀង។ ដោយបានការអនុញ្ញាតពីលោកព្រះរាជអាជ្ញានៃអយ្យការអមសាលាដំបូងខេត្ត បានឱ្យមន្ត្រីនគរបាលយុត្តិធម៌ធ្វើការឃាត់ខ្លួនអ្នកកាសែតទាំងពីនាក់ វាយខ្នោះបញ្ជូនទៅអយ្យការអមសាលាដំបូងខេត្តស្វាយរៀង រួមមានសម្ភារៈយកព័ត៌មាន និងរថយន្ត១គ្រឿងដែលមានពណ៌ទ្រេអ៊ី ពាក់សា្លកលេខ ខម ទៅសាលាដំបូងខេត្តស្វាយរៀង ចាត់ការតាមនីតិវិធី ។
ក្រោយពីសាកសួរអស់រយៈពេលមួយព្រឹកមក អ្នកកាសែតទាំងពីនាក់ ត្រូវបានអយ្យការអមសាលាដំបូងខេត្តស្វាយរៀង ដោះលែងឲ្យនៅក្រៅឃុំបណ្តោះអាសន្ន ក្រោមការត្រួតពិនិត្យរបស់តុលាការ។
សូមរំលឹកផងដែរថា កាលពីថ្ងៃទី១៧ មីនា ២០២០ ជនត្រូវចោទទាំងពីនាក់ខាងលើ បានចុះទៅយកព័ត៌មាននៅចំណុចភូមិសាលារៀន ឃុំបាសាក់ ស្រុកស្វាយជ្រំ ហើយបានឡាយករណីឈ្មួញនាំជ្រូករស់ទៅប្រទេសវៀតណាម ដោយសង្ស័យខុសច្បាប់ ក៏ត្រូវក្រុមអាជីវករឈ្មោះហាស់ ស្រីមុំ ភេទស្រី នៅភូមិថ្មសរ បានដាក់ពាក្យបណ្តឹងមកសាលាដំបូងខេត្តស្វាយរៀង រហូតដល់ថ្ងៃទី២៥ មីនា វេលាម៉ោង១២និង១០នាទីរសៀល សមត្ថកិច្ចបានឃើញអ្នកទាំងពីរក៏ឃាត់ខ្លួនទៅធ្វើការសាកសួររួចបញ្ជូនទៅសាលដំបូងចាត់ការបន្តតែម្តង ៕ (កែសម្រួលដោយ ៖ បុប្ផា)
ចែករំលែកព័តមាននេះ