រាជធានីភ្នំពេញ ៖ រថយន្តបែនដឹកដីចង្កូតស្ដាំមួយគ្រឿង ក្រោយពីបែនចាក់ដីខ្សាច់នៅក្នុងការដ្ឋានសំណង់បុរីផ្ទះល្វែងមួយកន្លែងរួច បានបើកចាកចេញត្រឡប់ក្រោយវិញ ដើម្បីទៅដឹកដីខ្សាច់នៅដេប៉ូលក់គ្រឿងសំណង់របស់ខ្លួន ទៅចាក់នៅបុរីខាងលើនោះវិញជាបន្តទៀត ប៉ុន្តែខណៈពេលទៅដល់ត្រង់ចំណុចផ្លូវដែកឆ្លងកាត់ផ្លូវលំបានវាក់ជាមួយរថភ្លើងដឹកប្រេង១ខ្សែកំពុងបើកឆ្លងកាត់ ហើយរថយន្តនោះជាន់ហ្វ្រាំងឈប់អ់ទាន់ ក៏បានជ្រុលទៅបុកចំទូរថភ្លើងនោះ បណ្ដាលឲ្យរថយន្តបែនដឹកដីរងការខូចខាតយ៉ាងដំណំ ពេលនោះមិនបណ្ដាលឲ្យអ្នកបើកបររងរបួសនោះទេ ហើយរថភ្លើងក៏បានឈប់ស្ងៀមដែរ បន្ទាប់មកភាគីទាំង២បានសម្របសម្រួលគ្នា ដោយខាងភាគីរថភ្លើងបានទាមទារឲ្យម្ចាស់រថយន្តសង ហើយក្រោយមកម្ចាស់រថយន្តក៏បានចេញសំណងចំនួន២៥០ដុល្លារដើម្បីបញ្ចប់រឿង។
ហេតុការណ៍ខាងលើនេះបានកើតឡើងកាលពីវេលាម៉ោង១០និង៥០នាទីព្រឹកថ្ងៃទី២៧ ខែមិនា ឆ្នាំ២០២០ នៅតាមផ្លូវលំ ត្រង់ចំណុចផ្លូវដែកដែលរថភ្លើងឆ្លងកាត់ ស្ថិតក្នុងភូមិតាអិន សង្កាត់ស្នោរ ខណ្ឌកំបូល រាជធានីភ្នំពេញ។
តាមប្រភពព័ត៌មានពីអ្នកភូមិខាងលើបានឲ្យដឹងថា រថយន្តបែនដឹកដីចង្កូតស្ដាំមួយគ្រឿងខាងលើ ពណ៌ស ពាក់ស្លាកលេខ ចង្កូតស្ដាំ PP-1871 ជាកម្មសិទ្ធិរបស់បុរសម្នាក់ឈ្មោះម៉ៅ អាយុជាង៤០ឆ្នាំ មុខរបរលក់គ្រឿងសំណង់ មានទីលំនៅក្នុងភូមិព្រៃឈូក សង្កាត់ស្នោរ ខណ្ឌកំបូល ប៉ុន្តែបើកបរដោយឈ្មោះភារុណ ភេទប្រុស អាយុជិត២០ឆ្នាំ ត្រូវជាកូនប្រុសរបស់ម្ចាស់ដេប៉ូលក់គ្រឿងសំណង់ខាងលើ ។
តាមប្រភពដដែលបានបន្តថា ដោយឡែកនៅមុនពេលកើតហេតុ យុវជនម្នាក់ខាងលើបានបើកបររថយន្តនោះដោយមានដឹកខ្សាច់ចេញពីដេប៉ូលក់គ្រឿងសំណង់របស់ខ្លួន នៅភូមិព្រៃឈូក ទៅដាក់ឱ្យការដ្ឋានសំណង់បុរីផ្ទះល្វែង ដែលស្ថិតនៅក្នុងភូមិតាអិនដែលជាភូមិឃុំកើតហេតុខាងលើ។
តាមប្រភពដដែលបានបន្តទៀតថា លុះពេលបែនចាក់ដីខ្សាច់រួច ក៏បានបើករថយន្តទទេរចេញពីក្នុងការដ្ឋានសំណង់ខាងលើឆ្ពោះទៅកាន់ដេប៉ូលក់គ្រឿងសំណង់វិញដើម្បីដឹកជញ្ជូនខ្សាច់យកទៅដាក់នៅក្នុងការដ្ឋានសំណង់បុរីផ្ទះល្វែងនោះជាបន្តទៀត ដោយបានបើកបរធ្វើដំណើរក្នុងទិសដៅពីជើងទៅត្បូង។
តាមប្រភពដដែលបានបន្តទៀតថា លុះពេលរថយន្តបែនដឹកដីទៅដល់ត្រង់ចំណុចកើតហេតុ ក៏បានវាក់ជាមួយរថយន្តដឹកប្រេងខ្សែភ្នំពេញ-បាត់ដំបង កំពុងបើកបរធ្វើដំណើរក្នុងទិសដៅពីលិចទៅកើត ហើយដោយសារតែទីនោះអត់មានបារ៉ាស់សម្រាប់ហាមឃាត់យានយន្តឲ្យឈប់ ឬដាក់ស្លាកសញ្ញាឲ្យប្រុងប្រយ័ត្នពេលមានរថភ្លើងបើកឆ្លងកាត់នោះ ទើបធ្វើឲ្យរថយន្តវាក់ជាន់ហ្វ្រាំងឈប់ក៏មិនទាន់គេចចេញក៏មិនទាន់ ក៏បានបុកចំទូរថភ្លើង បណ្ដាលឲ្យរថយន្តរងការខូចខាតតែម្ដង ប៉ុន្តែមិនបណ្ដាលឲ្យអ្នកបើកបររងរបួសនោះទេ ។
ក្រោយពេលកើតហេតុ រថភ្លើងក៏បានឈប់ឈ្ងៀមហើយបុគ្គលិកលើរថភ្លើងនេះបានទាមទារឲ្យម្ចាស់រថយន្តសង ដោយមិនចង់មានរឿងវែងឆ្ងាយ ទើបម្ចាស់រថយន្តបែនដឹកដីព្រមចេញសំណងជាប្រាក់ចំនួន២៥០ដុល្លារ ដើម្បីបញ្ចប់រឿងភ្លាមៗនៅនឹងកន្លែង រួចបើករថយន្តចេញទៅធ្វើការជួសជុលឡើងវិញតែម្ដង៕ (កែសម្រួលដោយ ៖ ធីតា)
ចែករំលែកព័តមាននេះ