ខេត្តប៉ៃលិន ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ត្រូវបានគេស្គាល់ថា ជាមន្ត្រីអនុរក្សពន្ធនាគារខេត្តប៉ៃលិន ត្រូវបានលោក ច័ន្ទ ខេមរិន ព្រះរាជអាជ្ញាអមសាលាដំបូងខេត្ត ដែលទើបនឹងមកកាន់សាលាដំបូងខេត្តប៉ៃលិនថ្មីៗ បានដឹកនាំកម្លាំងនគរបាលចុះចាប់ឃាត់ខ្លួន ខណៈជនសង្ស័យនេះជាមុខសញ្ញាជួញដូរគ្រឿងញៀនជាយូរមកហើយ ។
សេចក្តីរាយការណ៍បន្តថា ក្រោយពីធ្វើការឃាត់ខ្លួនបាន រហូតមកដល់ព្រឹកថ្ងៃទី២៥ ខែមីនា ឆ្នាំ២០២០នេះ ត្រូវបាននគរបាលកសាងសំណុំរឿងបញ្ជូនទៅកាន់អយ្យការអមសាលាដំបូងខេត្ត។
សូមបញ្ជាក់ថា កាលពីម៉ោង៨និង៥០នាទីយប់ ថ្ងៃទី២៣ ខែមីនា ២០២០ កម្លាំងការិយាល័យប្រឆាំងគ្រឿញៀន ដោយមានការសម្របសម្រួលនីតិវិធី និងដឹកនាំពីបញ្ជាពីលោក គង់ ច័ន្ទខេមរិន ព្រះរាជអាជ្ញាអមសាលាដំបូងខេត្ត ហើយដោយមានការចូលរួមពីមន្ត្រីអនុរក្សពន្ធនាគារ បានចុះបង្ក្រាបករណីរក្សាទុក និងជួញដូរនូវសារធាតុញៀនខុសច្បាប់ នៅក្នុងពន្ធនាគារខេត្តប៉ៃលិន ស្ថិតក្នុងភូមិទឹកចេញ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
បើតាមប្រភពពីលោក ផង់ ជឿម នាយការិយាល័យប្រឆាំងគ្រឿងញៀនខេត្ត បានឱ្យដឹងថា ជនសង្ស័យមាន ឈ្មោះ ឯល ប៉ែត ភេទប្រុស អាយុ៥២ឆ្នាំ ជាមន្ត្រីអនុរក្សពន្ធនាគារ បច្ចុប្បន្នរស់នៅភូមិអូរច្រាកណ្តាល សង្កាត់ទួលល្វា ក្រុងប៉ៃលិន ។
ប្រភពដដែលបន្តទៀតថា ជនសង្ស័យខាងលើរកស៊ីជួញដូរគ្រឿងញៀនក្នុងពន្ធនាគារជាយូរមកហើយ ដោយសារនគរបាលប្រឆាំងគ្រឿងញៀនខេត្តប៉ៃលិន តាមចាប់ខ្លួនជាញឹកញាប់ តែរកភស្តុតាងមិនឃើញ លុះដល់ថ្ងៃកើតហេតុ មានគេរាយការណ៍ ក៏ធ្វើការឆែកឆេរ ទើបរកឃើញគ្រឿងញៀន រួចក៏ចាប់ឃាត់ខ្លួនតែម្តង ។
ប្រភពដដែលបញ្ជាក់ថា វត្ថុតាង និងសម្ភារៈ ដែលដកហូតបាន រួមមាន ៖ ម្សៅក្រាមពណ៌សថ្លា (ម៉ាទឹកកកICE) ចំនួន០១កញ្ចប់ ទម្ងន់៨.៣១ក្រាម ថ្លឹងទាំងថង់ និងថ្នាំញៀនប្រភេទគ្រាប់អក្សរ (WY) ទំងន់ ០.៩២ក្រាម ថ្លឹងទាំងថង់ និងម៉ូតូចំនួន ០១គ្រឿង ពាក់ស្លាកកលេខ ប៉ៃលិន 1B-2131 រួមជាមួយទូរស័ព្ទដៃចំនួន០២គ្រឿងផងដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ