ថៃ ៖ ការិយាល័យសេដ្ឋកិច្ចកសិកម្មថៃ (OAE) បានធានាថា នឹងមិនមានកង្វះខាតការផ្គត់ផ្គង់ស្បៀងអាហារនៅក្នុងប្រទេសទេ ទោះបីការវាយលុយពីជំងឺកូវីដ១៩ អាចបង្ខំឱ្យរដ្ឋាភិបាលអនុម័តវិធីសាស្ត្រតឹងរ៉ឹង ដើម្បីទប់ស្កាត់ការឆ្លងក៏ដោយ។ អគ្គលេខាធិការ…
ថៃ ៖ ការិយាល័យសេដ្ឋកិច្ចកសិកម្មថៃ (OAE) បានធានាថា នឹងមិនមានកង្វះខាតការផ្គត់ផ្គង់ស្បៀងអាហារនៅក្នុងប្រទេសទេ ទោះបីការវាយលុយពីជំងឺកូវីដ១៩ អាចបង្ខំឱ្យរដ្ឋាភិបាលអនុម័តវិធីសាស្ត្រតឹងរ៉ឹង ដើម្បីទប់ស្កាត់ការឆ្លងក៏ដោយ។
អគ្គលេខាធិការ OAE លោក Rapibhat Chandarasrivongs បាននិយាយថា ទីភ្នាក់ងារបានពិភាក្សាពីស្ថានភាពនេះ ជាមួយក្រសួងពាណិជ្ជកម្ម សហព័ន្ធឧស្សាហកម្មថៃ សភាពាណិជ្ជកម្មថៃ និងក្រុមប្រឹក្សាពាណិជ្ជកម្មថៃ។ ពួកគេនឹងធានាថា មិនមានការខ្វះខាតក្នុងការផ្គត់ផ្គង់ស្បៀងអាហារ និងទំនិញចាំបាច់ទេ បើទោះបីជាមានការបិទប្រទេសទាំងមូលរយៈពេល ៣ខែ ឬ ៦ខែ ឬ ១ឆ្នាំ ដោយសារកូវីដ១៩ក៏ដោយ។ លោកបានបន្ថែមថា បច្ចុប្បន្នផលិតកម្មមានចំនួន ៦០% នៃសមត្ថភាពសរុប។
លោកបានបន្ថែមថា រដ្ឋមន្ត្រីកសិកម្ម លោក Chalermchai Sri-on បានបញ្ជាឱ្យទីភ្នាក់ងាររបស់រដ្ឋធានានូវខ្សែសង្វាក់ផ្គត់ផ្គង់ស្បៀងអាហារទាំងមូល រួមទាំងភស្តុភារប្រតិបត្តិការប្រកបដោយប្រសិទ្ធភាព និងបង្កើនបណ្តាញចែកចាយតាមរយៈផ្សារអនឡាញ។ លោកបានបន្ថែមថា សហករណ៍ថ្នាក់ខេត្ត និងថ្នាក់ស្រុក នឹងត្រូវបានប្រើជាមជ្ឈមណ្ឌលចែកចាយអាហារ និងទំនិញចាំបាច់។ លោក Rapibhat ក៏បានផ្តល់ការប៉ាន់ស្មានសម្រាប់លទ្ធផលនៃផលិតផលកសិកម្ម។
ទោះបីជាផលិតកម្មស្រូវសម្រាប់ឆ្នាំ ២០១៩/២០២០ ត្រូវបានប៉ាន់ប្រមាណថា មាន ២៨.៣៧៥ លានតោន ធៀបនឹងការប្រើប្រាស់ដែលបានប៉ាន់ប្រមាណថាមានចំនួន ៣២.៤៨លានតោនក៏ដោយ ក៏លោកមានប្រសាសន៍ថាមានស្រូវគ្រប់គ្រាន់សម្រាប់បំពេញតម្រូវការ៕ ដកស្រង់ចេញពីវេបសាយ ៖ bangkokpost (កែសម្រួលដោយ ៖ បុប្ផា)
ចែករំលែកព័តមាននេះ