ខេត្តបាត់ដំបង ៖ ពលករខ្មែរដែលវិលត្រឡប់ពីប្រទេសថៃចូលមកដល់ស្រុកកំណើតនៅក្នុងខេត្តបាត់ដំបង នៅក្នុងអំឡុងពេលប៉ុន្មានថ្ងៃមុននេះ មានចំនួន៤,០៥៧នាក់ហើយ។ នេះបើយោងតាមរបាយការណ៍បឋមរបស់ស្នងការនគរបាលខេត្ត គិតត្រឹមរសៀលថ្ងៃទី២៥ មីនា ២០២០ ។
ពលករទាំងនេះ ត្រូវបានគេដឹងថា បានវិលត្រឡប់ចូលស្រុកវិញតាមច្រកទ្វារអន្តរជាតិ«ដូង» ស្រុកកំរៀង ច្រកទ្វារអន្តរជាតិ«ភ្នំដី» ស្រុកសំពៅលូន និងតាមបណ្ដាច្រកតំបន់នានានៅក្នុងខេត្តបាត់ដបង។ របាយ
ការណ៍ដដែលបានឱ្យដឹងថា ក្នុងចំណោមពលករទាំង៤,០៥៧នាក់នេះ មានស្រីចំនួន១,៨៧៨នាក់, ក្មេង១៨២នាក់ ។ បើតាមការបញ្ជាក់នៅក្នុងរបាយការណ៍គឺក្រុមពលករខ្មែរទាំងនេះ បានវិលចូលមកដល់ទឹកដីខេត្តបាត់ដំបង មុនពេលភាគីថៃបិទច្រកចេញ-ចូលនៅតាមព្រំដែន។
សូមបញ្ជាក់ថា លោកស្នងការខេត្តបាត់ដំបងបានធ្វើការប្រកាសហើយ ចំពោះបងប្អូនដែលទើបវិលត្រឡប់មកពីប្រទេសថៃនេះ ត្រូវចូលរួមវិធានការការពារខ្លួនពីការឆ្លងនៃជំងឺកូវីដ-១៩ ដែលមានការណែនាំពីក្រសួងសុខាភិបាលដោយការដាក់ខ្លួនឯងឱ្យនៅដោយឡែករយពេល១៤ថ្ងៃសិន ។
លោកឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង និងជាមេបញ្ជាការ
រងនគរបាលជាតិទិសភូមិភាគទី៥ ចុះពិនិត្យស្ថានភាពនៅតាមខ្សែបន្ទាត់ព្រំដែនកម្ពុជា-ថៃ ភូមិសាស្ត្រខេត្តបាត់ដំបង កាលពីថ្ងៃទី២៤ មីនា ។ លោកស្នងការ បានស្នើដល់កងកម្លាំងនគរបាលទាំងអស់ ត្រូវធ្វើការអង្កេតត្រួតពិនិត្យជាប់ជាប្រចាំក្នុងភូមិសាស្ត្រ កុំឲ្យកើតមាននូវករណីល្មើសច្បាប់ផ្សេងៗ ។ លោកថា ត្រូវចេះវិធានការការពារការឆ្លងនៃជំងឺCovid-19 និងជួយផ្សព្វផ្សាយដល់សមាជិកគ្រួសាររបស់ខ្លួនផង ។
នៅក្នុងខេត្តបាត់ដំបង គឺមានពលរដ្ឋ២នាក់ក្នុងចំណោម៨នាក់ដែលមានផ្ទុកវីរុសប្រភេទថ្មីកូវីដ-១៩នោះ គឺបានជាសះស្បើយវិញហើយ គិតត្រឹមថ្ងៃទី២១ មីនា បន្ទាប់ពីការធ្វើតេស្តជាលើកទី២ គឺចេញលទ្ធផលអវិជ្ជមាន ។ ដូច្នេះ សង្ឃឹមថាបងប្អូនប្រជាពលរដ្ឋយើងទាំងអស់ នឹងចូលរួមបង្កើនការការពារ និងប្រុងប្រយ័ត្នបន្ថែមទៀត ដើម្បីចៀសវាងនូវវីរុសកូវីដ-១៩ ដែលកំពុងរាតត្បាតទូទាំងសាកលលោកនេះ ។
ចែករំលែកព័តមាននេះ