រាជធានីភ្នំពេញ ៖ មិនថានៅតាខ្មៅឬស្រុកស្អាងខេត្តកណ្តាលនោះទេ ដែលអ្នកភូមិភ័យខ្លាចបានដាក់តាំងទីងមោងបណ្តេញគ្រោះចង្រៃ ។ ការដាក់ទីងមោងនិងដុតភ្លើងមុខផ្ទះនេះ ត្រូវបានធ្វើឡើងនៅក្នុងឃុំវិហារសួគ៌ ស្រុកខ្សាច់កណ្តាល ព្រមទាំងខេត្តមួយចំនួនទៀត ហើយនៅជាយរាជធានីភ្នំពេញ ក៏មានអ្នកខ្លះបានដុតភ្លើងដែរ ។
បានធ្វើដំណើរចាកចេញពីរាជធានីភ្នំពេញក្នុងចម្ងាយផ្លូវ៣៤គីឡូម៉ែត្រ តាមបណ្តោយ ផ្លូវជាតិលេខ៦ ឆ្លងស្ពានព្រែកតាមាក់តាមបណ្តោយផ្លូវជាតិ៨ ទៅដល់ឃុំវិហាសួគ៌នោះ គេឃើញនៅតាមមុខ ផ្ទះអ្នកស្រុករស់នៅតាមផ្លូវជាតិលេខ៨ ក៏ដូចក្នុងភូមិមានដាក់តាំងទីងមោងនៅមុខផ្ទះគ្រប់ៗគ្នា ដើម្បីការពារកុំឱ្យវីរុសកូវីដ-១៩ ដែលពួកគាត់ចាត់ថាជាគ្រោះចង្រៃមកយាយី ។
ជួបជាមួយអ្នកភូមិ អ្នកស្រី អ៊ុំ ភី អាយុ៤៨ឆ្នាំ មានលំនៅភូមិសេដា ឃុំវិហារសួគ៌ បានឱ្យដឹងថា អ្នកភូមិបាននាំគ្នាផ្អើលដាក់ទីងមោងមុខផ្ទះរយៈពេលប្រមាណ២ទៅ៣ថ្ងៃមកហើយ ដើម្បីការពារកុំឱ្យមានឆ្លងជំងឺកូវីដ-១៩ ។ ការដាក់ទីងមោងនេះ គឺផ្អើលតៗគ្នា ទៅតាមជំនឿអរូបី ដែលចាស់ពីដើម តែងតែធ្វើបែបនេះដើម្បីបណ្តេញខ្មោចព្រាយបីសាច ។ អ្នកស្រីបានឱ្យដឹងទៀតថា ទីងមោងធ្វើពីខោអាវញាត់ចំបើង ខ្លះក៏មានដាក់ដាវ កាំបិត កាំភ្លើងជ័រ ជាដើម ធ្វើយ៉ាងណាឱ្យព្រាយ បីសាចនិងវីរុសកូវីដ-១៩មានការភ័យខ្លាចទៅឱ្យឆ្ងាយកុំមកយាយី ។ ដោយឡែក នៅពេលយប់វិញ អ្នកភូមិក៏បាននាំគ្នាដុតភ្នក់ភ្លើងមុខផ្ទះគ្រប់ៗគ្នា និងបានបាចអំបិល ដុតផាវឱ្យផ្ទុះទៅតាមការផ្អើលតៗគ្នា ។
អ៊ុំស្រីឈ្មោះ ទិត្យ សើរ អាយុ៦៧ឆ្នាំ បានឱ្យដឹងថា គាត់បានឃើញគេផ្អើលដាក់ទីងមោងតាមផ្ទះ គាត់ក៏បានដាក់តាមគេដែរ តែគាត់ក៏គិតថា មានតែការលាងដៃសម្អាតនឹងអាល់កុល និងណែនាំកូនចៅនៅផ្ទះ លាងដៃឱ្យបានញឹកញាប់ធ្វើអនាម័យខ្លួនប្រាណទើបអាចទប់ស្កាត់ការឆ្លងវីរុសកូវីដ-១៩នេះបាន ។ លោកអ៊ំក៏បានបញ្ជាក់ដែរថា ដើម្បីការពារជំងឺដាក់ទីងមោងក៏ដាក់ លាងទឹកអាល់កុលក៏លាងដុតភ្នក់ភ្លើងមុខផ្ទះក៏ដុតដែរ ធ្វើយ៉ាងណាឱ្យតែមានសេចក្កីសុខ មិនមានជំងឺរាត្បាត ។
ចំណែកអ្នកស្រី សុខ ផេង អាយុ៣០ឆ្នាំ ក៏បានឱ្យដឹងដូចគ្នានេះដែរថា អ្នកស្រីឃើញអ្នកភូមិគេនាំគ្នាដាក់ទីងមោងគ្រប់ៗគ្នា អ្នកស្រីបានដាក់ទីងមោងដែរ ដើម្បីការពារព្រាយ បីសាចនិងឬកូវីដ-១៩ កុំឱ្យឆ្លង ។ អ្នកភូមិជាច្រើននាក់ទៀតក៏បានឱ្យដឹងដូចៗគ្នា ព្រោះនៅតាមមុខផ្ទះមានទីងមោងដាក់គ្រប់គ្នា ឃើញល្អមើលណាស់ បែរតាមដងផ្លូវ ។
មេឃុំវិហារសួគ៌លោក ម៉េង ឈាងហេង បានឱ្យកោះសន្តិភាពដឹងថា ប្រជាពលរដ្ឋ នៅក្នុងមូលដ្ឋានរបស់លោកភាគច្រើនមានជំនឿហើយបានផ្អើលតៗគ្នា រយៈពេលប្រមាណ៥ថ្ងៃមកហើយ បាននាំគ្នាដាក់ទីងមោងនិងខ្លះគូររូបយក្ស ដោយទីងមោងខ្លះស្ពាយកាំភ្លើងអាកា ធ្វើពីឈើកាន់កាំបិត និងកាំភ្លើងខ្លីជ័រជាដើម ។ មិនថាតែនៅក្នុងឃុំវិហារសួគ៌នោះទេ នៅតាមតំបន់មួយចំនួនទៀតក៏បានដាក់ទីងមោងផងដែរ។
លោកមេឃុំបានឱ្យដឹងទៀតថា នេះជាជំនឿរបស់ប្រជាពលរដ្ឋមួយចំនួន ដើម្បីការពារព្រាយបីសាចនិងការពារមិនឱ្យមានការឆ្លងរីករាលដាលវីរុសកូវីដ-១៩ ។ លោកថាអ្នកណាគេជឿបានសេចក្តីសុខសាន្តរបស់គេទៅដូចដុតធូបដែរ ។ ទោះបីអ្នកភូមិ មានជំនឿនិងផ្អើលតៗគ្នា នាំគ្នាដាក់ទីងមោងយ៉ាងណា ក៏មានអ្នកភូមិខ្លះទៀត មិនបានធ្វើតាមនោះទេ ហើយពួកគាត់បានចាត់ទុកថា នេះជាអបីជំនឿតែប៉ុណ្ណោះ មិនមានមូលដ្ឋានច្បាស់លាស់នោះទេ ។
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ