រាជធានីភ្នំពេញ ៖ ផ្ទះលក់អីវ៉ាន់ចាប់ហួយ និងសាំង ព្រមទាំងវេលុយត្រូវបានអគ្គីភ័យឆាបឆេះយ៉ាងសន្ធោសន្ធៅ បណ្តាលអោយលោកយាយម្នាក់បាត់បង់ជីវតនៅក្នុងផ្ទះ និងរងរបួសចំនួន៥នាក់ ក្នុងនោះមានក្មេងស្រីម្នាក់ ។ ក្នុងហេតុការណ៍អគ្គិភ័យនេះបានឆេះរាលដាលទៅដល់លំនៅឋាននៅក្បែរខាងឆេះរោលៗចំនួន៤ល្វែងផងដែរ។…
រាជធានីភ្នំពេញ ៖ ផ្ទះលក់អីវ៉ាន់ចាប់ហួយ និងសាំង ព្រមទាំងវេលុយត្រូវបានអគ្គីភ័យឆាបឆេះយ៉ាងសន្ធោសន្ធៅ បណ្តាលអោយលោកយាយម្នាក់បាត់បង់ជីវតនៅក្នុងផ្ទះ និងរងរបួសចំនួន៥នាក់ ក្នុងនោះមានក្មេងស្រីម្នាក់ ។ ក្នុងហេតុការណ៍អគ្គិភ័យនេះបានឆេះរាលដាលទៅដល់លំនៅឋាននៅក្បែរខាងឆេះរោលៗចំនួន៤ល្វែងផងដែរ។
អគ្គីភ័យខាងលើនេះបានបង្កអោយមានការភ្ញាក់ផ្អើលកាលពីវេលាម៉ោងប្រមាណ៥និង១៥នាទីរសៀលថ្ងៃទី២៥ ខែមីនា ឆ្នាំ២០២០ នៅចំណុចផ្ទះល្វែងលេខ៣៥A តាមបណ្តោយផ្លូវលលេខ២២១ សង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ។
ជនរងគ្រោះម្នាក់ដែលបានបាត់បង់ជីវិតក្នុងគ្រោះអគ្គីភ័យខាងលើឈ្មោះ យន ស្រ៊ីប ភេទស្រី អាយុ៧១ឆ្នាំ ជាម្ចាស់ផ្ទះកើតហេតុ ។ ចំណែកអ្នករងរបួសទាំង៥នាក់ រួមមាន ១-ឈ្មោះអ៊ួន សារ៉ន់ ភេទប្រុស អាយុ៤១ឆ្នាំ ជាជាងកាត់ដេរ ស្នាក់នៅផ្ទះជួលជាន់ទី១ ផ្ទះកើតហេតុ, ២-ឈ្មោះស៊ូ ស៊ីថា ភេទស្រី អាយុ៣៧ឆ្នាំ ជាជាងដេរខោអាវ ស្នាក់នៅជាន់ទី១ ផ្ទះកើតហេតុ, ៣-ឈ្មោះអ៊ួន ភឿនលីលីហ្សា ភេទស្រី អាយុ១២ឆ្នាំ ជាសិស្ស ស្នាក់នៅផ្ទះជាន់ទី១ផ្ទះកើតហេតុ, ៤-ឈ្មោះអ៊ួន លីលីកា ភេទស្រី អាយុ៨ឆ្នាំ ស្នាក់នៅផ្ទះជាន់ទី១ ផ្ទះកើតហេតុ និង៥-ឈ្មោះគៀត ឡាង ភេទស្រី អាយុ៦៥ឆ្នាំ ស្នាក់នៅផ្ទះជួលជាន់ទី៣ ផ្ទះកើតហេតុ ។
តាមប្រភពព័ត៌មានអោយដឹងថា នៅមុនពេលកើតហេតុ គេឃើញកូនម្ចាស់ផ្ទះបានចាក់សាំងម៉ូតូឱ្យភ្ញៀវ ហើយដបសាំងបានធ្លាក់ជាហេតុធ្វើអោយសាំងខ្ទាតទៅប៉ះម៉ាស៊ីនម៉ូតូដែលមិនពន្លត់បង្កអោយទៅជាអគ្គីភ័យ ឆាបឆេះយ៉ាងសន្ធោសន្ធៅតែម្តង ។
តាមប្រភពព័ត៌មានអោយដឹងទៀតថា ខណៈនោះភ្លើងបានឆាបឆេះពេញបន្ទុក និងមានផ្សែងហុយខ្មួលខ្មាញ់ ដោយតែផ្ទះកើតហេតុខាងលើលក់សាំង និងអីវ៉ាន់ចាយហួយ ព្រមទាំងម៉ូតូ៣គ្រឿង ហើយភ្លើងបានឆេះរាលដាលទៅលំនៅឋាន៤ល្វែងផ្សេងទៀតដែលនៅជាប់សងខាងនោះ។
តាមប្រភពពីនគរបាលបានឱ្យដឹងថា នៅក្នុងហេតុការណ៍នោះ រថយន្តពន្លត់អគ្គីភ័យចំនួន១២គ្រឿងចេញទៅអន្តរាគមន៍បាញ់ពន្លត់អស់៦គ្រឿង ហើយភ្លើងបានរលត់ទៅវិញនៅវេលាម៉ោងប្រមាណ៥និង៥០នាទីថ្ងៃដដែល។
តាមប្រភពពីនគរបាលការិយាល័យបង្ការ ពន្លត់អគ្គីភ័យ និងសង្គ្រោះបានអោយដឹងថា ក្នុងហេតុការណ៍អគ្គីភ័យខាងលើនេះ បណ្តាលអោយផ្ទះមួយល្វែងមាន៣ជាន់ រួមទាំងសម្ភារៈត្រូវភ្លើងឆេះរងការខូចខាតទាំងស្រុង រួមជាមួយម៉ូតូ៣គ្រឿង ព្រមទាំងឆេះរាលដាលទៅផ្ទះ៤ល្វែងផ្សេងទៀតឆេះរោលៗ ហើយបានបណ្តាលឱ្យលោកយាយម្នាក់បាត់បង់ជីវិត និងរងរបួស៥នាក់ទៀត ក្នុងនោះប្រុសម្នាក់ និងស្រី៤នាក់ត្រូវបានបញ្ចូនទៅសង្គ្រោះនៅមន្ទីពេទ្យព្រះកុសុមៈ ចំណែកក្មេងត្រូវបានបញ្ជូនទៅកាន់មន្ទីរពេទ្យគន្ធបុប្ជា។
តាមប្រភពដដែលបានអោយដឹងថា គ្រោះអគ្គីភ័យខាងលើនេះបណ្តាលមកពីកូនម្ចាស់ផ្ទះចាក់សាំងអោយភ្ញៀវ ហើយធ្លាក់ដបសាំងជាហេតុធ្វើអោយសាំងខ្ទាតប៉ះត្រូវម៉ាស៊ីនម៉ូតូដែលក្តៅបង្កទៅជាអគ្គីភ័យបែបនេះតែម្តង ៕ (កែសម្រួលដោយ ៖ ធីតា)
ចែករំលែកព័តមាននេះ