រាជធានីភ្នំពេញ ៖ កម្មករ កម្មការីនីរបស់រោងចក្របោះពុម្ពខោអាវ ស៊ី ជេក្រាហ្វិចអាត ព្រីនធីងស្ទូឌីយោ ប្រមាណ៧០នាក់បាននាំគ្នាផ្តិតមេដៃប្តឹងទៅមន្ទីរការងារនិងបណ្តុះបណ្តាលវិជ្ជាជីវរាជធានីភ្នំពេញ ដើម្បីអោយជួយអន្តរាគមន៍ដោះស្រាយ បន្ទាប់ពីដល់ថ្ងៃសន្យាបើកប្រាក់ខែ…
រាជធានីភ្នំពេញ ៖ កម្មករ កម្មការីនីរបស់រោងចក្របោះពុម្ពខោអាវ ស៊ី ជេក្រាហ្វិចអាត ព្រីនធីងស្ទូឌីយោ ប្រមាណ៧០នាក់បាននាំគ្នាផ្តិតមេដៃប្តឹងទៅមន្ទីរការងារនិងបណ្តុះបណ្តាលវិជ្ជាជីវរាជធានីភ្នំពេញ ដើម្បីអោយជួយអន្តរាគមន៍ដោះស្រាយ បន្ទាប់ពីដល់ថ្ងៃសន្យាបើកប្រាក់ខែ ស្រាប់តែថៅកែវេចបង្វិចរត់គេចខ្លួនបាត់។
ការតវ៉ាផ្តិតមេដៃប្តឹងរបស់កម្មករខាងលើនេះបានផ្ទុះឡើងកាលពីវេលាម៉ោងប្រមាណ៩និង៣០នាទីព្រឹកថ្ងៃទី២៥ ខែមីនា ឆ្នាំ ២០២០ ដោយកម្មករ កម្មការីនី បានជួបប្រមូលផ្តុំនៅក្នុងទីតាំងរោងចក្រ ដែលស្ថិតនៅក្នុងភូមិចុងថ្នង់ខាងកើត សង្កាត់ទឹកថ្លា ខណ្ឌសែនសុខ ។
តាមតំណាងកម្មករបានអោយដឹងថា ថៅកែរោងចក្រខាងលើឈ្មោះ ស៊ីជេ វ៉ូ ជាជនជាតិចិនម៉ាឡេស៊ី បានរត់គេចខ្លួនបាត់ ខណៈពេលដែលកម្មករបាននាំគ្នាមកបើកលុយតាមការសន្យា ។ ការរត់គេចខ្លួនរបស់ថៅកែម្នាក់នេះត្រូវបានគេដឹងថា មានរយៈពេលប្រមាណ៥ថ្ងៃមកហើយ មិនដឹងថា ទៅទីណានោះទេ ក្នុងស្ថានភាព ដែលវីរុសកូវីដ-19 កំពុងតែផ្ទុះឡើងបែបនេះ។
តាមប្រភពពីកម្មករបានអោយដឹងថា រោងចក្របោះពុម្ពខោអាវខាងលើនេះមានកម្មករ កម្មាការីនី ចំនួន៧០នាក់ ក្នុងនោះមានបុរសចំនួន២០នាក់ ។ ដោយសារតែស្ថានភាពសេដ្ឋកិច្ចមិនល្អ ថៅកែរោងចក្របានប្រកាសព្យួរការងារកាលពីថ្ងៃទី១២ ខែមិនា ឆ្នាំ ២០២០ ។ បន្ទាប់ពីប្រកាសព្យួរការងារនៅថ្ងៃទី១០ ខែមីនា ថៅកែវក៏បានបើកប្រាក់ខែកុម្ភៈ តែកន្លះខែ ដោយសន្យាថា នឹងបើកឱ្យនៅថ្ងៃទី២៥ ខែមីនា ឆ្នាំ ២០២០ ស្រាប់តែដល់ថ្ងៃកំណត់ ស្រាប់តែថៅកែ និងរដ្ឋបាលក៏បានគេចខ្លួនបាត់ ទើបពួកគាត់នាំគ្នាជួបប្រមូលផ្តុំនាំគ្នាផ្តិតមេដៃប្តឹងតែម្តង ។
តាមលិខិតបើកប្រាក់ខែ៥០ភាគរយរបស់រោងចក្របានបញ្ជាក់ថា មូលហេតុដែលក្រុមហ៊ុន ស៊ី ជេក្រាហ្វិចអាតព្រីនធីងស្ទូឌីយោបើកប្រាក់ខែ៥០ភាគរយ ដោយសារតែក្រុមហ៊ុនមានបញ្ហាផ្នែកសេដ្ឋកិច្ច និងផលិតផលមិនអំណោយផល ។ នៅក្នុងលិខិតនោះដែរ ក្រុមហ៊ុនក៏បានសន្យាថា នឹងបើកជួនគ្រប់ចំនួនអោយទៀងទាត់ចាប់ពីខែក្រោយៗនេះតទៅ ។ ទោះបីជាយ៉ាងណា គេមិនដឹងមូលហេតុអ្វីនោះទេ ស្រាប់តែដល់ថ្ងៃសន្យា បែរជាថៅកែរត់គេចខ្លួនបាត់បែបនេះ៕ (កែសម្រួលដោយ ៖ ធីតា)
ចែករំលែកព័តមាននេះ