ខេត្តមណ្ឌលគិរី ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ត្រូវមន្ត្រីឧទ្យានុរក្សដែនជម្រកសត្វព្រៃស្រែពក នៃមន្ទីរបរិស្ថានខេត្តមណ្ឌលគិរី ដេញប៉ផាប់ចាប់ពភីង ហើយឃាត់ខ្លួនបាននៅចំណុចត្រពាំងកកោះ បន្ទាប់ពីជននេះ លួចដាក់អន្ទាក់ចាប់សត្វព្រៃចំនួន៣៥ខ្សែ ជាប្រភេទអន្ទាក់ដែលអាចបង្កគ្រោះថ្នាក់ដល់អាយុជីវិតសត្វព្រៃ និងមនុស្ស នៅចំណុចអូរល្វេរ ក្នុងដែនជម្រកសត្វព្រៃស្រែពក កាលពីយប់ថ្ងៃទី២១ ខែមីនា ឆ្នាំ២០២០ រួចកសាងសំណុំរឿងបទល្មើសធនធានធម្មជាតិ បញ្ជូនទៅសាលាដំបូងខេត្តមណ្ឌលគិរី ដើម្បីចាត់ការបន្តតាមនីតិវិធី។
សេចក្តីរាយការណ៍បន្តថា ជនសង្ស័យឈ្មោះ សា វា ភេទប្រុស អាយុ៣១ឆ្នាំ មានទីលំនៅបច្ចុប្បន្នរស់នៅភូមិជីមៀត ឃុំណងឃីលឹក ស្រុកកោះញែក ត្រូវបានតំណាងអយ្យការអមសាលាដំបូងខេត្តមណ្ឌលគិរី សម្រេចចោទប្រកាន់តាមបញ្ញត្តិមាត្រា៦១ និងមាត្រា៥៦ ជាបទល្មើសធនធានធម្មជាតិថ្នាក់ទី៣ នៃច្បាប់ស្ដីពីតំបន់ការពារធម្មជាតិ ហើយត្រូវបានឃុំខ្លួនបណ្ដោះអាសន្ននៅពន្ធនាគារខេត្ត។
មន្ត្រីឧទ្យានុរក្សបានដកហូតវត្ថុតាងជាក់ស្ដែងនូវកាំបិតផ្គាក់ចំនួន១, ចបជីកចំនួន១ និងម៉ូតូគ្មានស្លាកលេខចំនួន១គ្រឿង ដើម្បីយកទៅរក្សាទុកបណ្ដោះអាសន្ននៅស្នាក់ការបរិស្ថាន។ ចំណែកអន្ទាក់ដែលបានដាក់រួច ត្រូវបានមន្ត្រីឧទ្យានុរក្សទៅប្រមូលយក រួចដុតកម្ទេចចោលនៅកន្លែងកើតហេតុតែម្តង។
គួររម្លឹកថា ជនសង្ស័យរូបនេះមានប្រវត្តិនៃការផ្តន្ទាទោសពីមុន ដោយធ្លាប់ជាប់ពន្ធនាគារខេត្តមណ្ឌលគិរី ចំនួន២ខែ ពាក់ព័ន្ធករណីបទល្មើសធនធានធម្មជាតិផងដែរ ដែលជាការមិនរាងចាល៕ (កែសម្រួលដោយ ៖ បុប្ផា)
ចែករំលែកព័តមាននេះ