ខេត្តកំពង់ស្ពឺ ៖ បើតាមសេចក្តីរាយការណ៍បឋមបានឱ្យដឹងថា ដោយសារតែទ្រាំនឹងដីហុយមិនបាន ប្រជាពលរដ្ឋជាច្រើនបាននាំគ្នាដាក់សសរបិទផ្លូវមិនឱ្យរថយន្តដឹកថ្ម រត់ឆ្លងកាត់នោះទេ ព្រោះខ្លាចកើតហេតុអាក្រក់ណាមួយមកលើពលរដ្ឋ។ បន្ទាប់ពីទទួលព័ត៌មាននេះ លោកអភិបាលស្រុកក៏បានចុះទៅសម្របសម្រួល ដើម្បីឱ្យមានការឯកភាពគ្នាឆ្ពោះទៅរកគោលជំហរឈ្នះៗ ព្រោះថា រថយន្តដឹកថ្មទាំងនោះ គឺយកទៅចាក់សាងផ្លូវជាតិលេខ៣។
ការបិទផ្លូវនេះ ធ្វើឡើងនៅរសៀលថ្ងៃទី២៤ ខែមីនា ឆ្នាំ២០២០ លើផ្លូវលេខ143 គឺផ្លូវចេញពីផ្សារត្រាំខ្នារ ភ្ជាប់ទៅសាលាស្រុកគងពិសី (ស្ថិតនៅក្នុងស្រុកគងពិសី ខេត្តកំពង់ស្ពឺ)ដោយពលដ្ឋជាច្រើនរស់នៅភូមិសណ្តុលស្នំក្រពើ ស្រុកគងពិសី ខេត្តកំពង់ស្ពឺ។
ប្រភពបានឱ្យដឹងថា ការបិទផ្លូវនេះ ដោយសារតែពលរដ្ឋទ្រាំនឹងក្រុមតៃកុងរថយន្តដឹកថ្មធំៗ បើកបរដោយល្បឿនលឿនជារៀងរាល់ថ្ងៃ បង្កឱ្យមានដីហុយយ៉ាងខ្លាំង ធ្វើឱ្យប៉ះពាល់ដល់សុខភាពប្រជាពលរដ្ឋក្នុងតំបន់ ជាពិសេសគឺបង្កឱ្យមានគ្រោះថ្នាក់ដល់អ្នកដំណើរដែលឆ្លងកាត់ផ្លូវនេះ ។
ប្រភពបន្តថា ការបិទផ្លូវនេះ គឺគោលបំណងរបស់ប្រជាពលរដ្ឋ គឺសុំឱ្យម្ចាស់ក្រុមហ៊ុន ស្រោចទឹកតាមដងផ្លូវ និងកុំបើកបរដោយល្បឿនលឿនពេក ដែលអាចបណ្តាលឱ្យមានគ្រោះថ្នាក់ដល់ប្រជាពលរដ្ឋដែលធ្វើដំណើរតាមដងផ្លូវនេះ។ ជាពិសេសស្នើសុំឱ្យខាងក្រុមហ៊ុនស្រោចទឹកក្នុងមួយថ្ងៃ៣ដង កុំឱ្យខាន បើខាននឹងមានដីហុយជាក់ជាមិនខាន។
នៅរសៀលថ្ងៃដដែល បន្ទាប់ពីទទួលព័ត៌មាននេះរួចមក គេសង្កេតឃើញវត្តមានលោកចែម ភឺនរីមវុទ្ធី អភិបាលស្រុកគងពិសី ចុះទៅសម្របសម្រួលផងដែរ។
បើតាមមន្ត្រីសាលសស្រុកមួយរូបបានប្រាប់ថា ដោយអនុវត្តតាមយុទ្ធសាស្យ្រឈ្នះៗ ភាគីតំណាងក្រុមហ៊ុនបានយល់ព្រមទទួលយកសំណើរបស់ពលរដ្ឋមកអនុវត្ត និងសុំឱ្យក្រុមតៃកុងរថយន្តបើកបរតាមល្បឿនដែលច្បាប់បានកំណត់។
រហូតមកដល់ពេលនេះពលដ្ឋបានលើកសសរចេញហើយ អ្នកដំណើរក៏អាចឆ្លងកាត់បានធម្មតា។
សូមរំលឹកថា កន្លងមក រដ្ឋបាលសាលាស្រុក ក៏ធ្លាប់បានអប់រំណែនាំដល់ក្រុមតៃកុងរថយន្តច្រើនដងមកហើយ ទើបតែថ្ងៃនេះពលរដ្ឋទ្រាំមិនបានក៏នាំគ្នាធ្វើបែបនេះតែម្តង។ ហើយចាប់តាំងពីមានឡានដឹកថ្មឆ្លងកាត់យកថ្មទៅកសាងផ្លូវជាតិលេខ៣ មក ផ្លូវនេះមានការខូចខាតជាច្រើនកន្លែង៕ (កែសម្រួលដោយ ៖ បុប្ផា)
ចែករំលែកព័តមាននេះ