ខេត្តបន្ទាយមានជ័យ ៖ សណ្ឋាគារមួយកន្លែងនៅក្នុងក្រុងសិរីសោភ័ណ ត្រូវបានទុកជាកន្លែងត្រៀមបម្រុង សម្រាប់ពិនិត្យ ថែទាំ និងព្យាបាល ករណីរីករាលដាលនៃវីរុសកូវីដ-១៩។ ការយកសណ្ឋាគារខាងលេីនេះត្រៀមទុកបម្រុង គឺស្របពេលបងប្អូនប្រជាពលដ្ឋខ្មែរដែលធ្វេីការនៅប្រទេសថៃ…
ខេត្តបន្ទាយមានជ័យ ៖ សណ្ឋាគារមួយកន្លែងនៅក្នុងក្រុងសិរីសោភ័ណ ត្រូវបានទុកជាកន្លែងត្រៀមបម្រុង សម្រាប់ពិនិត្យ ថែទាំ និងព្យាបាល ករណីរីករាលដាលនៃវីរុសកូវីដ-១៩។ ការយកសណ្ឋាគារខាងលេីនេះត្រៀមទុកបម្រុង គឺស្របពេលបងប្អូនប្រជាពលដ្ឋខ្មែរដែលធ្វេីការនៅប្រទេសថៃ និងបណ្តាប្រទេសផ្សេងៗទៀតជាច្រេីនរយនាក់សម្រុកមកស្រុកវិញ ដែលជាកត្តាគួរឲ្យព្រួយបារម្ភពីការរីករាលដាលនៃវីរុសប្រភេទនេះ។
កាលពីថ្ងៃទី២៤ ខែមីនា ឆ្នាំ២០២០ លោក អ៊ុំ រាត្រី អភិបាលខេត្ត និងជាប្រធានគណៈបញ្ជការឯកភាពរដ្ឋបាលខេត្ត អមដំណើរដោយលោក ហ៊ឹល រ៉ាយ៉ា អភិបាលនៃគណៈអភិបាលក្រុងសិរីសោភ័ណ មេបញ្ជាការប្រតិបត្តិការសឹករងបន្ទាយមានជ័យ បានដឹកនាំកងកម្លាំងចម្រុះទាំងបីប្រភេទ ចុះសម្អាតបរិវេណ សណ្ឋាគារមួយកន្លែងយីហោ «ព្រះចន្ទ» ស្ថិតក្នុងក្រុងសិរីសោភ័ណ។
លោកអភិបាលខេត្តបានបន្តថា ការជួលសណ្ឋគារមួយកន្លែងនេះក្នុងរយៈពេល២ខែ ដើម្បីត្រៀមបម្រុងទុកធ្វើជាកន្លែងសម្រាប់ពិនិត្យ ថែទាំ និងព្យាបាល ក្នុងករណីចាំបាច់ណាមួយនៃការីករាលដាលវីរុសកូវីដ-១៩ និងអនុវត្តទៅតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក៏ដូចជាទប់ស្កាត់ការរីករាលដាលនៃវីរុសកូវីដ-១៩ ដែលបច្ចុប្បន្នប្រទេសកម្ពុជាក៏រកឃើញមានអ្នកផ្ទុកជំងឺប្រភេទនេះផងដែរ ។
សូមបញ្ជាក់ថា ៖ កម្ពុជា-ថៃបានសម្រេចធ្វេីការបិទច្រករបៀងមួយចំនួនជាបណ្តោះអាសន្ន ដើម្បីទប់ស្កាត់ការរីករាលដាលនៃវីរុសកូវីដ-១៩ ខណៈមេរោគប្រភេទនេះបានឆ្លងរាលដាលពាសពេញសកលលោក ។ ជាមួយនឹងការបិទច្រករបៀងនេះដែរ នៅច្រកទ្វាអន្តរជាតិប៉ោយប៉ែត ក៏ត្រូវបានរឹតបន្តឹងការត្រួតពិនិត្យសុខភាពយ៉ាងយកចិត្តទុកផងដែរពីសំណាក់មន្ត្រីជំនាញសុខាភិបាល និងកងកម្លាំងអន្តោប្រវេសន៍នៅតាមច្រកទ្វារ ដោយតម្រូវឲ្យបងប្អូនដែលមកពីប្រទេសថៃចូលតាមច្រកទ្វានេះ ពិនិត្យសុខភាព និងវាស់កំដៅ បើករណីរកឃើញថាបងប្អូនណាម្នាក់មានកំដៅខុសធម្មតា និងមានសុខភាពមិនសូវល្អ ត្រូវបញ្ជូនទៅមន្ទីរពេទ្យដាក់នៅដាច់ដោយឡែករយៈពេល១៤ថ្ងៃ ឬ២សប្តាហ៍ដើម្បីតាមដានជាបន្តទៀត។
ដោយឡែកនៅថ្ងៃទី២៤ ខែមីនា ឆ្នាំ២០២០នេះដែរ រដ្ឋបាលខេត្តបន្ទាយមានជ័យ បានចេញសេចក្តីជូនដំណឹង២ ទាក់ទងនឹងការប្រកាសផ្អាកកម្មវិធីសង្ក្រាន្តទាំង៣ទីតាំងរួមមាន សង្ក្រាន្តបន្ទាយឆ្មារ, សង្ក្រាន្តសិរីសោភ័ណ និងសង្ក្រាន្តក្រុងប៉ោយប៉ែត។ ម្យ៉ាងទៀត រដ្ឋបាលខេត្តក៏ជូនដំណឹងដល់បងប្អូនប្រជាពលរដ្ឋដែលត្រលប់មកពីប្រទេសនានាចូលមកកម្ពុជា ជាពិសេសបងប្អូនជាពលករមកពីប្រទេសថៃ សូមរាយការណ៍មកអាជ្ញាធរ ហើយត្រូវដាក់ខ្លួនឯងឲ្យនៅដាច់ដោយឡែករយៈពេល១៤ថ្ងៃ។ បើសិនមានអាការៈសង្ស័យណាមួយដូចជា ៖ ក្អក ឡើងកំដៅ៣៨អង្សាសេ ពិបាកដកដង្ហើម សូមរាយការណ៍ទៅអាជ្ញាធរ ឬទៅមន្ទីពេទ្យជាបន្ទាន់ ៕ (កែសម្រួលដោយ ៖ ធីតា)
ចែករំលែកព័តមាននេះ