ខេត្តកោះកុង ៖ ប្រជាកសិករខ្មែរដែលរស់នៅក្នុងឃុំតាតៃ ក្រុងខេមរៈភូមិន្ទ ខេត្តកោះកុង នាពេលបច្ចុប្បន្ននេះ កំពុងតែមានភាពរីករាយ និងមមាញឹកនៅក្នុងការចុះដាំដំណាំហូបផ្លែផ្សេងៗ ដូចជា ដំណាំម្នាស់ ដំណាំម៉ាក់ប្រេង ដំណាំម៉ាក់ប្រាំង ស្វាយគ្រប់ប្រភេទ ធុរេន និងសាវម៉ាវ ដែលកំពុងតែមានភាពរីកចម្រើន គួរឲ្យមោទនភាពសម្រាប់ពលរដ្ឋជាប្រជាកសិករក្នុងខេត្តកោះកុង ស្ទើរតែគ្រប់ទីកន្លែង។
យោងតាមការរៀបរាប់ពីប្រជាកសិករ ដែលស្ថិតនៅក្នុងឃុំតាតៃ ក្រុងខេមរៈភូមិន្ទ បានរៀបរាប់ឲ្យថា ចំពោះដំណាំមករានេះ គឺមានភាពងាយស្រួលនៅក្នុងការដាំណាស់ គឺមិនពិបាកនៅក្នុងការថែទាំដាក់ជី ឬក៏បាញ់ថ្នាំទេ គឺត្រូវការទឹកជាប្រចាំតែប៉ុណ្ណោះ ។ ម្យ៉ាងវិញទៀតដំណាំម៉ាក់ប្រាំងវិញ ចំពោះការដាំដុះ គឺមានរយៈពេល7ទៅ8ឆ្នាំ ទើបទទួលបានផលមកវិញ។
ប្រភពដដែលបន្តថា ក្រោយពីទទួលផលហើយ ដំណាំនេះនឹងផ្ដល់ផលជារៀងរហូត ហើយនៅក្នុងពេលបច្ចុប្បន្ននេះ ចំពោះតម្លៃទីផ្សារ នៅក្នុងការលក់ជូនទៅភ្ញៀវជាតិ និងអន្តរជាតិ នៅក្នុងរដូវទទួលផលផ្លែម៉ាក់ប្រាំងនេះ គឺមានភាពខុសប្លែកគ្នាជាងឆ្នាំកន្លងទៅ។ ហើយឆ្នាំកន្លងទៅតម្លៃផ្លែម៉ាក់ប្រាំងក្នុងមួយគីឡូក្រាម គឺមានតម្លៃ 15000 រៀល ប៉ុន្តែសម្រាប់ឆ្នាំ2020 នេះ តម្លៃផ្លែម៉ាក់ប្រាំង គឺមានតម្លៃ2ម៉ឺន ទៅ2ម៉ឺន5ពាន់រៀល ក្នុង1គីឡូក្រាម។
ប្រភពដដែលបន្តទៀតថា ផ្លែម៉ាក់ប្រាំងនេះ ជាដំណាំដែលគ្មានដាក់ជីគីមី ដោយប្រើជីធម្មជាតិសុទ្ធសាធតែម្ដង ។
ចំណែកប្រជាកសិករដែលជាអ្នកបង្កបង្កើនដំណាំហូបផ្លែម៉ាក់ប្រាំងនេះ លោកបានអំពាវនាវដល់ប្រជាជនខ្មែរទូទៅ សូមឱ្យមានការគាំទ្រអំពីផលដំណាំខ្មែរយើងផង។ ដោយ ៖ សំបូរ (កែសម្រួលដោយ ៖ បុប្ផា)
ចែករំលែកព័តមាននេះ