ខេត្តព្រះសីហនុ ៖ បើតាមសេចក្តីរាយការណ៍បឋមពីសមត្ថកិច្ចបានប្រាប់ឱ្យថា មនុស្សម្នាក់បានបាត់បង់ជីវិត ខណៈបញ្ជូនទៅដល់មន្ទីរពេទ្យ និង៥នាក់ផ្សេងទៀតត្រូវរងរបួសស្រាល-ធ្ងន់នៅក្នុងឧបទ្ទវហេតុផ្ទុះយ៉ាងកក្រើក ដោយរបូតមុខតំណរទុយោទឹកនៅការដ្ឋាន ដែលមានទីតាំងស្ថិតនៅត្រង់ចំណុចកែងបត់ដែលតភ្ជាប់ជាមួយវិថីកម្មករ (ផ្លូវសេតេ) ស្ថិតក្នុងភូមិ២ សង្កាត់លេខ៣ ក្រុង-ខេត្តព្រះសីហនុ។
ជនរងគ្រោះនៅក្នុងឧបទ្ទវហេតុខាងលើ១-ឈ្មោះ សៀង ខា ភេទប្រុស អាយុ២៩ឆ្នាំ មានទីលំនៅភូមិកំបោរ ឃុំស្វាយស ស្រុកវ៉ារិន ខេត្តសៀមរាប (បានបាត់បង់ជីវិតពេលបញ្ជូនទៅដល់គ្លីនិក) ។ ២-ឈ្មោះ សៀម ប៉ាក ភេទប្រុស អាយុ៤៥ឆ្នាំ មានទីលំនៅភូមិ-ឃុំជាមួយគ្នា ( រងរបួសធ្ងន់)។ ៣-ឈ្មោះ ប៉ុម លីម ភេទប្រុស អាយុ១៩ឆ្នាំ មានទីលំនៅភូមិតំណាក់កន្ទួត ឃុំតំណាក់កន្ទួត ស្រុកកំពង់ត្រាច ខេត្តកំពត( របួសធ្ងន់)។ ៤-ឈ្មោះ លី ជិនជា ភេទប្រុស អាយុ១៨ឆ្នាំ មានទីលំនៅភូមិអង្គារ ភូមិក្តឿងរាយ ស្រុកកញ្ចៀច ខេត្តព្រៃវែង ( របួសធ្ងន់ )។ ៥-ឈ្មោះ ត្រឹង ប៊ុង ភេទប្រុស អាយុ៣២ ឆ្នាំ មានទីលំនៅភូមិកំបោរ ឃុំស្វាយស ស្រុកវ៉ារិន ខេត្តសៀមរាប (របួសស្រាល) និង៦-ឈ្មោះ សំ សិទ្ធីរាជ ភេទប្រុស អាយុ២៤ ឆ្នាំ មានទីលំនៅភូមិ៥ សង្កាត់លេខ៤ ក្រុង,ខេត្តព្រះសីហនុ (របួសស្រាល) ។
ប្រភពដដែលបន្តថា មុនពេលកើតហេតុ ខណៈពេលដែលក្រុមកម្មករជីកដី ដើម្បីតទុយោទឹក បន្ទាប់ពីពួកគេតរួច ក៏បានបើកក្បាលរ៉ូប៊ីណេទឹក (វ៉ាន) ដើម្បីសាកល្បងបង្ហូរទឹក ស្រាប់តែផ្ទុះដាច់មុខដំណរ បង្កឲ្យមានមនុស្សបាត់បង់ជីវិតម្នាក់ និងរងរបួសស្រាល-ធ្ងន់ចំនួន៥នាក់ផ្សេងទៀត ហើយត្រូវបានរថយន្តសង្គ្រោះគ្លីនិកឯកជន ដឹកយកទៅសង្គ្រោះភ្លាមៗផងដែរ។
បើតាមអ្នកធ្វើការនៅទីនោះ បានបញ្ជាក់ប្រាប់សមត្ថកិច្ចថា គ្រោះថ្នាក់នេះ កើតឡើង ក្រោយពីបានតមុខតំណរទុយោទឹក ដែលមានមុខកាត់0,៣ម៉ែត្រ រួចក្រុមកម្មករក៏ចាប់ផ្តើមបើកទឹកសាកល្បង ដើម្បីឲ្យអតិថិជនប្រើប្រាស់ ក៏ផ្ទុះមានកម្លាំងខ្លាំងជាងផ្ទុះគ្រាប់ទៅទៀត បង្កឲ្យមានការភ្ញាក់ផ្អើល ហើយក្រុមកម្មករដែលកំពុងតទុយោទឹករងរបួសដេកពេញផ្លូវតែម្តង។
បើតាមមេការធ្វើផ្លួវបាននិយាយថា មកពីក្រុមកម្មករតបណ្តាញទឹកមិនមានជំនាញ មុខតំណរនេះទៀតសោតយកតំណរជ័រតបិទមុខទុយោទឹកដែក ធ្វើម្តេចនឹងជាប់កើត នេះជាសោកនាដកម្មមិនគួរឲ្យកើតមានឡើងសោះ។
បច្ចុប្បន្នជនរងគ្រោះកំពុងសម្រាកព្យាបាលនៅគ្លីនិកឯកជនក្នុងខេត្តព្រះសីហនុ ដោយឡែក សពជនរងគ្រោះ សមត្ថកិច្ចបានធ្វើកំណត់ហេតុ រួចប្រគល់ជូនសាច់ញាតិ ដើម្បីចាត់ចែងធ្វើបុណ្យទៅតាមប្រពៃណី។ (កែសម្រួលដោយ ៖ បុប្ផា)
ចែករំលែកព័តមាននេះ