លោកគួច ចំរើន៖ មិនមានការបិទទីក្រុងទេ តែបិទសណ្ឋាគារមួយតែប៉ុណ្ណោះ
- ព្រះសីហនុ
ខេត្តព្រះសីហនុ ៖ នៅថ្ងៃទី២៣ មីនា ឆ្នាំ២០២០ រដ្ឋបាលខេត្តព្រះសីហនុ ដឹកនាំដោយលោក គួច ចំរើន អភិបាលនៃគណៈអភិបាលខេត្ត…
ខេត្តព្រះសីហនុ ៖ នៅថ្ងៃទី២៣ មីនា ឆ្នាំ២០២០ រដ្ឋបាលខេត្តព្រះសីហនុ ដឹកនាំដោយលោក គួច ចំរើន អភិបាលនៃគណៈអភិបាលខេត្ត បានបើកកិច្ចប្រជុំបន្ទាន់មួយស្តីពីករណីវីរុសកូវីដ-១៩ ដែលកើតមាននៅខេត្តព្រះសីហនុលើអ្នកទេសចរជនជាតិបារាំង២៩ករណីបន្ថែម មានខ្មែរ២ករណីផងដែរ ដែលបានរកឃើញមានផ្ទុកវីរុសកូវីដ-១៩ នៅថ្ងៃទី២២ មីនា ។ ក្រុមអ្នកទេសចរជនជាតិបារាំងនេះ បានរកឃើញមុន២ករណីរួចមកហើយ សរុបទាំងអស់មានជនជាតិបារាំង៣១នាក់ និងខ្មែរ២នាក់ ។
ក្នុងកិច្ចប្រជុំបន្ទាន់នេះ លោកអភិបាលខេត្តព្រះសីហនុបានដាក់ចេញនូវវិធានការសំខាន់ៗ ដោយបានប្រកាសថា «ទោះបីជាបែបណា រដ្ឋបាលខេត្តមិនមានការបិទទីក្រុងនោះទេ តែបានបិទសណ្ឋាគារមួយតែប៉ុណ្ណោះ» ។ ជាមួយគ្នានេះ រដ្ឋបាលខេត្តបានត្រៀមសណ្ឋាគារចំនួន២ សរុបចំនួន១០៦បន្ទប់ ស្មើនឹង២០២គ្រែ និងអគារនៃមន្ទីរសុខាភិបាលខេត្តចំនួន២១បន្ទប់ ស្មើនឹង៤២គ្រែ សរុបទាំងអស់គឺមានចំនួន១២៧បន្ទប់ ស្មើនឹង២៤៤គ្រែ ដើម្បីទុកសម្រាប់ព្យាបាលអ្នកជំងឺកូវីដ-១៩ តាមបទបញ្ជារបស់សម្ដេចតេជោនាយករដ្ឋមន្ត្រី ។
ចំពោះពលករដែលត្រឡប់មកពីប្រទេសថៃថ្មីៗនេះ អាជ្ញាធរនឹងសូមឱ្យស្ថិតនៅដាច់ពីក្រុមគ្រួសារ សាច់ញាតិរបស់ខ្លួន១៤ថ្ងៃសិន ។ ប្រសិនបើមានករណីសង្ស័យកូវីដ ក៏ត្រូវរាយការណ៍ទៅគ្រូពេទ្យដែលប្រចាំការនៅតាមមណ្ឌលសុខភាព ឬក៏ទំនាក់ទំនងតាមលេខទូរសព្ទពិសេស ដែលរដ្ឋបាលខេត្តព្រះសីហនុបានផ្តល់ជូន ។អ្នកដែលផ្ទុកវីរុសកូវីដ-១៩ទាំង៣៣នាក់ ដែលរកឃើញថ្មីនេះ ត្រូវបានដាក់ឲ្យសម្រាកនៅតាមបន្ទប់ នៃសណ្ឋាគារមួយ ដោយមានដាក់ពង្រាយកម្លាំងនគរបាលការពារ មិនឲ្យមានការចេញចូលដោយគ្មានការអនុញ្ញាតឡើយ ។ ទន្ទឹមនេះ ក្រុមគ្រូពេទ្យត្រូវបានដាក់ឱ្យនៅប្រចាំការផងដែរដើម្បីតាមដាន និងព្យាបាលជំងឺពួកគាត់នៅក្នុងសណ្ឋាគារតែម្ដង ។
លោក គួច ចំរើន អភិបាលនៃគណៈអភិបាលខេត្តព្រះសីហនុបានធ្វើការអំពាវនាវផងដែរ សម្រាប់ប្រជាពលរដ្ឋថា ប្រសិនជាគ្មានការចាំបាច់ទេ ប្រជាពលរដ្ឋគ្រប់រូបគួរតែនៅក្នុងផ្ទះរៀងៗខ្លួន ដើម្បីរក្សាសុវត្ថិ ភាពផ្ទាល់ខ្លួន និងជៀសឱ្យឆ្ងាយពីការឆ្លងវីរុសកូវីដ-១៩ លើកលែងតែមានការចាំបាច់ ហើយក្រៅពីនេះ មន្ត្រីរាជការក៏ដោយ ប្រសិនបើគ្មានការចាំបាច់ធំដុំទេ គឺមិនបាច់ជួបជុំគ្នាទេ ដោយនាំគ្នាធ្វើការតាមប្រព័ន្ធអនឡាញ នាំគ្នាធ្វើការតាមទូរស័ព្ទក៏បានដែរ ៕
ចែករំលែកព័តមាននេះ