រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់ ត្រូវបានកម្លាំងនគរបាលប៉ុស្ដិ៍រដ្ឋបាលដង្កោ ដេញតាមឃាត់ខ្លួន រួចនាំសាកសួរ និងកសាងសំណុំរឿង ដើម្បីបញ្ជូនទៅកាន់សាលាដំបូងរាជធានីភ្នំពេញ ចាត់ការតាមច្បាប់…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់ ត្រូវបានកម្លាំងនគរបាលប៉ុស្ដិ៍រដ្ឋបាលដង្កោ ដេញតាមឃាត់ខ្លួន រួចនាំសាកសួរ និងកសាងសំណុំរឿង ដើម្បីបញ្ជូនទៅកាន់សាលាដំបូងរាជធានីភ្នំពេញ ចាត់ការតាមច្បាប់ នៅពេលដែលជនសង្ស័យរូបនោះលួចរថយន្ដឈ្នួល១គ្រឿង ខណៈម្ចាស់ចតទុកនៅលើចិញ្ចើមផ្លូវ ហើយរវល់ហៅម៉ូយដោយអត់ដកសោរចេញ ។
សេចក្តីរាយការណ៍បន្តថា ហេតុការណ៍ខាងលើនេះ បានកើតឡើងកាលពីម៉ោង៨និង២០នាទីព្រឹក ថ្ងៃទី២៤ ខែមីនា ឆ្នាំ២០២០ នៅតាមផ្លូវលេខ២១៧ ត្រង់ចំណុចខាងមុខស្ថានីយប្រេងសាំង LHR ស្ថិតនៅក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។
សេចក្តីរាយការណ៍បន្តទៀតថា ជនសង្ស័យខាងលើនោះឈ្មោះ ឌៀប ចេក អាយុ៣០ឆ្នាំ មុខរបរមិនពិតប្រាកដ គឺជាមុខសញ្ញាចោរកម្មដែលធ្លាប់ធ្វើសកម្មភាពលួចទ្រព្យសម្បត្តិអ្នកដទៃច្រើនដងមកហើយ ហើយជននេះស្នាក់នៅផ្ទះជួលម្តុំរោងចក្រដំបូលខៀវ ក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ។ លុះចុងក្រោយនេះបានលួចរថយន្តតាក់ស៊ីម៉ាក SSANG YONG ISTANA ពណ៌ស ពាក់ស្លាកលេខភ្នំពេញ 2AK-2821 ដែលជាកម្មសិទ្ធិរបស់បុរសរងគ្រោះឈ្មោះ រ៉េត ពន្លក អាយុ៣៤ឆ្នាំ មុខរបររត់តាក់ស៊ី មានទីលំនៅក្នុងភូមិវែង ឃុំទ្រា ស្រុកសំរោង ខេត្តតាកែវ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ បុរសអ្នករត់រថយន្តឈ្នួលខាងលើបានបើករថយន្តចេញពីផ្ទះដឹកភ្ញៀវមកកាន់រាជធានីភ្នំពេញ លុះដាក់មនុស្សចេញពីក្នុងរថយន្តអស់ ក៏បើករថយន្តទៅកាន់ចំណុចកើតហេតុ រួចឈប់ចតនៅលើចិញ្ចើមផ្លូវ ដោយមិនបានដកកូនសោរចេញពីក្នុងរថយន្តឡើយ។ បន្ទាប់មកជនរងគ្រោះក៏បានឈរហៅម៉ូយ ដើម្បីជិះរថយន្តត្រឡប់ទៅកាន់ខេត្តតាកែវវិញ ។
ប្រភពដដែលបន្តថា ឆ្លៀតពេលដែលម្ចាស់រថយន្តរវល់ ស្រាប់តែជនសង្ស័យទៅដល់ឡើងចូលទៅក្នុងរថយន្ត រួចកាច់សោរបញ្ឆេះបើកចេញគេចខ្លួនបាត់យ៉ាងលឿន។ ប៉ុន្តែភ្លាមៗនោះ ត្រូវបានម្ចាស់ឃើញទាន់ រួចក៏ស្រែកឆោឡោឱ្យអ្នកជិតខាងជួយ និងបើករថយន្តដេញតាមពីក្រោយ រហូតដល់ចំណុចខាងមុខខ្លោងទ្វារចូលបញ្ជាការដ្ឋានកងរាជអាវុធហត្ថខណ្ឌដង្កោ ក៏ត្រូវកម្លាំងនគរបាលប៉ុស្តិ៍ដង្កោ ដែលកំពុងជិះម៉ូតូល្បាតតាមផ្លូវជួយធ្វើអន្តរាគមន៍ រួចឃាត់បានទាំងរថយន្ត និងជនសង្ស័យតែម្ដង ។
ក្រោយពេលចាប់ខ្លួននាំយកទៅសាកសួរ ជនសង្ស័យបានសារភាពថា ខ្លួនពិតជាបានធ្វើសកម្មភាពលួចរថយន្តរបស់ជនរងគ្រោះប្រាកដមែន និងកន្លងមក ធ្លាប់បានធ្វើសកម្មភាពលួចទ្រព្យសម្បត្តិរបស់ប្រជាពលរដ្ឋក្នុងរាជធានីភ្នំពេញជាច្រើនលើកថែមទៀតផង៕ (កែសម្រួលដោយ ៖ បុប្ផា)
ចែករំលែកព័តមាននេះ