ខេត្តព្រះវិហារ ៖ ដើម្បីឆ្លើយតបទៅនឹងស្ថានការនៃការរីករាលដាលនៃជំងឺកូវីដ-១៩ ដែលកំពុងកើតមាននាពេលបច្ចុប្បន្ននៅក្នុងប្រទេសកម្ពុជា អាជ្ញាធរខេត្តព្រះវិហារ បានសម្រេចជ្រើសយកទីតាំង២កន្លែង សម្រាប់ត្រៀមទុកដាក់សង្គ្រោះ និងព្យាបាលអ្នកជំងឺកូវីដ១៩ ។ ថ្លែងក្នុងឱកាសចុះពិនិត្យទីតាំង…
ខេត្តព្រះវិហារ ៖ ដើម្បីឆ្លើយតបទៅនឹងស្ថានការនៃការរីករាលដាលនៃជំងឺកូវីដ-១៩ ដែលកំពុងកើតមាននាពេលបច្ចុប្បន្ននៅក្នុងប្រទេសកម្ពុជា អាជ្ញាធរខេត្តព្រះវិហារ បានសម្រេចជ្រើសយកទីតាំង២កន្លែង សម្រាប់ត្រៀមទុកដាក់សង្គ្រោះ និងព្យាបាលអ្នកជំងឺកូវីដ១៩ ។
ថ្លែងក្នុងឱកាសចុះពិនិត្យទីតាំង ដើម្បីត្រៀមទុកដាក់សង្គ្រោះ និងព្យាបាលអ្នកផ្ទុកជំងឺកូវីដនៅខេត្តព្រះវិហារ នៅថ្ងៃទី២៣ ខែមីនា ឆ្នាំ២០២០នេះ លោក ប្រាក់ សុវណ្ណ អភិបាលខេត្ត និងជាប្រធានគណៈកម្មការប្រយុទ្ធប្រឆាំងនឹងជំងឺកូវីដ-១៩ ខេត្តព្រះវិហារ មានប្រសាសន៍ថា ក្រុមការងារបានចុះពិនិត្យទីតាំងចំនួន៣ទីតាំងផ្សេងៗគ្នា ទី១-មណ្ឌលសុវត្ថិភាពតាកឹង ស្ថិតនៅភូមិថ្នល់បែក ឃុំថ្មី ស្រុកគូលែន ។ ទី២- មជ្ឈមណ្ឌលបណ្តុះបណ្តាលវិជ្ជាជីវៈខេត្តព្រះវិហារ ស្ថិតនៅភូមិដំណាក់ សង្កាត់កំពង់ប្រណាក ក្រុងព្រះវិហារ និងទី៣ -សណ្ឋាគារហ្គ្រីនផាលែស ស្ថិតនៅភូមិអណ្តូងពោធិ៍ សង្កាត់កំពង់ប្រណាក ក្រុងព្រះវិហារ។
លោកអភិបាលខេត្ត បានបន្តថា ជាលទ្ធផលគណៈកម្មការប្រយុទ្ធប្រឆាំងនឹងជំងឺកូវីដ-១៩ ខេត្ត ដោយមានការឯកភាពយល់ព្រមពីម្ចាស់ទីតាំងបានសម្រេចជ្រើសរើសយកទីតាំងចំនួន២ទីតាំង គឺទី១- សណ្ឋាគារហ្គ្រីនផាលែស ក្រុងព្រះវិហារ សម្រាប់ព្យាបាលអ្នកផ្ទុកជំងឺកូវីដ-១៩ និងទី២- មណ្ឌលសុវត្ថិភាពតាកឹង ស្ថិតក្នុងឃុំថ្មី ស្រុកគូលែន ខេត្តព្រះវិហារ សម្រាប់ពិនិត្យប្រជាពលរដ្ឋដែលសង្ស័យថា មានផ្ទុកជំងឺកូវីដ-១៩ ។
ជាមួយគ្នានេះ លោក ប្រាក់ សុវណ្ណ បានអំពាវនាវដល់ប្រជាពលរដ្ឋទូទាំងខេត្តព្រះវិហារទាំងអស់មិនត្រូវធ្វេសប្រហែសនោះទេ ជាពិសេសមន្ត្រីពាក់ព័ន្ធត្រូវមានវិធានការ អនាម័យ អប់រំ ផ្សព្វផ្សាយដល់ប្រជាពលរដ្ឋ ក្នុងការការពារឲ្យបានម៉ឺងម៉ាត់ ដើម្បីរួមគ្នាបង្ការទប់ស្កាត់ ការឆ្លងរីករាលដាលនៃជំងឺដ៏កាចសាហាវនេះ ឲ្យមានប្រសិទ្ធភាពបំផុត ។
ដោយឡែកចំពោះបងប្អូនពលករ ដែលទើបត្រឡប់មកពីធ្វើការនៅក្រៅប្រទេស លោកអភិបាលខេត្ត បានណែនាំដល់គណៈកម្មការខេត្ត ជាពិសេសអាជ្ញាធរមូលដ្ឋាន ត្រូវតាមដាន និងក្ដាប់ឲ្យបានច្បាស់លាស់នូវស្ថិតិប្រជាពលរដ្ឋដែលបានចូលមកដល់មូលដ្ឋាន និងរាយការណ៍ជាប្រចាំថ្ងៃមករដ្ឋបាលខេត្ត ជាពិសេសត្រូវអប់រំណែនាំពួកគាត់ឲ្យបានយល់ និងអនុវត្តឲ្យបានខ្ជាប់ខ្ជួនអំពីវិធានការនៃការដាក់ខ្លួនឯងឲ្យនៅដាច់ដោយឡែកក្នុងរយៈពេល១៤ថ្ងៃ នៅតាមផ្ទះជាលក្ខណៈបុគ្គល ប៉ុន្តែក្នុងករណីមានការសង្ស័យ ត្រូវនាំពួកគេទៅពិនិត្យ និងព្យាបាលជាបន្ទាន់ ។ (កែសម្រួលដោយ ៖ បុប្ផា)
ចែករំលែកព័តមាននេះ