ខេត្តព្រះវិហារ ៖ បើតាមសេចក្តីរាយការណ៍បានឱ្យដឹងថា ដោយសង្កេតឃើញរយៈពេលជិត១ខែមកនេះ តំបន់រមណីយដ្ឋានវប្បធម៌ប្រវត្តិសាស្ត្រ ប្រាសាទកោះកែរ ដែលតែងតែមានភ្ញៀវជាតិ និងអន្តរជាតិចូលមកកម្សាន្តជាហូរហែនោះ បានប្រែមកជាសភាពស្ងាត់ជ្រងំ រីឯអាជីវករបម្រើសេវាកម្មទេសចរណ៍នៅទីនោះ…
ខេត្តព្រះវិហារ ៖ បើតាមសេចក្តីរាយការណ៍បានឱ្យដឹងថា ដោយសង្កេតឃើញរយៈពេលជិត១ខែមកនេះ តំបន់រមណីយដ្ឋានវប្បធម៌ប្រវត្តិសាស្ត្រ ប្រាសាទកោះកែរ ដែលតែងតែមានភ្ញៀវជាតិ និងអន្តរជាតិចូលមកកម្សាន្តជាហូរហែនោះ បានប្រែមកជាសភាពស្ងាត់ជ្រងំ រីឯអាជីវករបម្រើសេវាកម្មទេសចរណ៍នៅទីនោះ បានត្អូញត្អែរថា លក់ដូរពុំដាច់ដែរ ។
ថ្លែងប្រាប់អ្នកយកព័ត៌មាន អ្នកស្រី កុក ស្រីមុំ ជាអាជីវករលក់ដូរនៅក្នុងតំបន់ប្រាសាទកោះកែរ បានលើកឡើងថា ធ្លាប់តែភ្ញៀវទេសចរជាតិ និងអន្តរជាតិ ដូចជាចិន ជប៉ុន អឺរ៉ុប តែងតែបញ្ជាការកុម្មង់ម្ហូបអាហារនៅក្នុងអាហារដ្ឋានរបស់អ្នកស្រី តែគិតមកដល់បច្ចុប្បន្ននេះជិត១ខែហើយ ដែលប្រាសាទកោះកែរ លែងសូវមានភ្ញៀវចូលមកលេងកម្សាន្ត ដោយសារតែឥទ្ធិពលនៃការចម្លងវីរុស កូវីដ១៩ ។
អ្នកស្រីបន្តថា ទោះជាបែបនេះក្តី អ្នកស្រីនៅតែបន្តបម្រើសេវាកម្មនេះ នឹងបន្តពង្រឹងអនាម័យ ដូចជាការដាក់ទឹកអាល់កុល ជែលលាងសម្អាតដៃ ដល់ភ្ញៀវទេសចរដែលចូលមករកសេវាកម្មម្ហូបអាហារជាប្រចាំ ដើម្បីចូលរួមការពារការឆ្លងវីរុសកាចសាហាវនេះ ។
ជាមួយគ្នានេះ លោក គង់ ពុទ្ធិការ អគ្គនាយកអាជ្ញាធរជាតិព្រះវិហារ មានប្រសាសន៍ថា ការស្ងប់ស្ងាត់ភ្ញៀវនេះ មិនត្រឹមតែកោះកែរនោះទេ ចំពោះប្រាសាទព្រះវិហារ ក៏មានភាពស្ងប់ស្ងាត់ដែរ ដោយសារតែមានការផ្ទុះរីករាលដាលនៃវីរុសកូវីដ១៩ ។
ទោះជាបែបនេះក្តី អាជ្ញាធរជាតិព្រះវិហារ នៅតែបន្តសហការជាមួយរាជរដ្ឋាភិបាល និងណែនាំដល់មន្ត្រីឆ្មាំ ពលករទាំងអស់នៃអាជ្ញាធរជាតិព្រះវិហារ ត្រូវបង្កើនការត្រួតពិនិត្យសុខភាព វាស់កម្តៅជាប្រចាំមុនពេលចូលធ្វើការងារ និងចែកម៉ាសដល់ពួកគេសម្រាប់ប្រើប្រាស់ឲ្យបានគ្រប់ៗគ្នា ។ (កែសម្រួលដោយ ៖ បុប្ផា)
ចែករំលែកព័តមាននេះ