ខេត្តបាត់ដំបង ៖ ពលរដ្ឋម្នាក់បានដើរជាន់មីនផ្ទុះ បណ្ដាលឱ្យរងរបួសជើងម្ខាងយ៉ាងធ្ងន់ធ្ងរ កាលពីវេលាម៉ោង៨ និង២០នាទីព្រឹកនៅថ្ងៃទី២៤ មីនា ខណ:ដែលគាត់កំពុងដើររកបេះផ្លែសំរ៉ងនៅក្នុងព្រៃ ត្រង់ចំណុចភ្នំរទេះសេះ ស្ថិតក្នុងភូមិសាស្ត្រ…
ខេត្តបាត់ដំបង ៖ ពលរដ្ឋម្នាក់បានដើរជាន់មីនផ្ទុះ បណ្ដាលឱ្យរងរបួសជើងម្ខាងយ៉ាងធ្ងន់ធ្ងរ កាលពីវេ
លាម៉ោង៨ និង២០នាទីព្រឹកនៅថ្ងៃទី២៤ មីនា ខណ:ដែលគាត់កំពុងដើររកបេះផ្លែសំរ៉ងនៅក្នុងព្រៃ ត្រង់ចំណុចភ្នំរទេះសេះ ស្ថិតក្នុងភូមិសាស្ត្រ ភូមិឆករកា ឃុំសំឡូត ស្រុកសំឡូត ។ ទោះបីអាជ្ញាធរធ្លាប់អំពាវនាវប្រាប់ពីតំបន់ដែលមានគ្រោះថ្នាក់យ៉ាងណាក្តី ក៏មានប្រជាពលរដ្ឋខ្លះ នៅតែទៅដល់តំបន់គ្រោះថ្នាក់នេះដដែល ។
តាមមន្ត្រីកងរាជអាវុធហត្ថបានរាយការណ៍ថា ពលរដ្ឋរងគ្រោះខាងលើនោះ ឈ្មោះ ជន ហាក់ ភេទប្រុស អាយុ៣៩ឆ្នាំ រស់នៅភូមិឆករកា ឃុំសំឡូត ស្រុកសំឡូត ដែលបានរងរបួសធ្ងន់ប្រអប់ជើងខាងស្ដាំ ហើយទំនងអាចឈានដល់ការវះកាត់ទៀតផង។ ប្រភពពីមន្ត្រីដដែលប្រាប់ថា បុរសនោះ រួមជាមួយអ្នកភូមិប៉ុន្មាននាក់ទៀត បាននាំគ្នាចូលព្រៃនៅតំបន់ដ៏គ្រោះថ្នាក់នោះ ដើម្បីបេះឬរើសផ្លែសំរ៉ងភ្នំយកទៅលក់ តែអកុសល្យគាត់បានដើរជាន់គ្រាប់មីនដែលកប់ក្នុងដីបណ្ដាលឱ្យផ្ទះរបួសជើងម្ខាងយ៉ាងធ្ងន់ធ្ងរ ។ បើតាមមន្ត្រីរូបនេះ គ្រាប់មីនដែលបង្កគ្រោះថ្នាក់នោះ ជាប្រភេទ«មីនស្គរ» ដែលសេលសល់តាំងពីអំឡុងសង្គ្រាមកប់នៅក្នុងដី ដែលសព្វថ្ងៃតំបន់នោះ នៅតែមានសេសសល់នូវគ្រាប់យុទ្ឌភណ្ឌមិនផ្ទុះនៅរាយប៉ាយពេញព្រៃនៅឡើយ ។
សូមរំលឹកដែរថា បច្ចុប្បន្ននេះ នៅតាមតំបន់ជួរភ្នំ ឬ តំបន់ព្រៃនៅតាមភូមិសាស្ត្រខ្លះនៃស្រុកសំឡូត គ្រាប់យុទ្ធភណ្ឌមិនទាន់ផ្ទុះគ្រប់ប្រភេទ ដែលសេសសល់ពីសម័យសង្គ្រាម កំពុងមាននៅរាយប៉ាយពាសពេញព្រៃជួរភ្នំ ឬកប់នៅក្នុងដីនៅឡើយ បើទោះជាចំការមីនមួយផ្នែកធំ នៅក្នុងស្រុកនេះត្រូវបានបោសសំអាតដោយអង្គភាពកំចាត់មីននានារបស់កម្ពុជាក្ដី ។ ជារឿយៗ ប្រជាពលរដ្ឋនៅក្នុងស្រុកសំឡូតនេះ តែងជួបគ្រោះថ្នាក់ដោយសារយុទ្ធភណ្ឌមិនទាន់ផ្ទុះសេសសល់ពីសង្គ្រាមទាំងនោះ តាមរយ:ការកាប់ទន្ទ្រានព្រៃវាទយកដីបង្កបង្កើនផល ការរុករានកាប់បំផ្លាញព្រៃឈើ ការចូលព្រៃបេះបោចអនុផលព្រៃ ឬចូលពប្រៃបរបាញ់សត្វព្រៃជាដើម។ល។ និង។ល។ ប៉ុន្តែគេសង្កេតឃើញថា បើទោះជាហានិភ័យស្ថិតនៅចំពោះមុខធ្ងន់ធ្ងរយ៉ាងនេះក្ដី ក៏ពលរដ្ឋមួយចំនួននៅតែមិនញញើតនឹងភាពមហន្តរាយនេះដែរ ។ ផ្ទុយទៅវិញពួកគេនៅតែយកអាយុជីវិតទៅប្រថុយប្រថាន ជាមួយនឹងតំបន់មហាគ្រោះថ្នាក់នោះដដែល ។
ស្ថិតក្នុងស្ថានភាពបែបនេះ កន្លងទៅមន្ត្រីជំនាញឬអាជ្ញាធរតែងតែអំពាវនាវជាបន្តបន្ទាប់ ដល់ប្រជាពលរដ្ឋរស់នៅតាមតំបន់ដែលងាយគ្រោះថ្នាក់ដោយសារយុទ្ធភណ្ឌមិនទាន់ផ្ទុះ និងនៅតាមតំបន់ដទៃទៀត ដើម្បីឱ្យមានការប្រយ័ត្នចំពោះការដើររុករានចូលព្រៃ នៅតាមតំបន់ដែលសង្ស័យមានគ្រោះថ្នាក់ តែពលរដ្ឋមួយចំនួនហាក់មិនសូវយកចិត្តទុកដាក់ទៅលើការអំពាវនាវទេ ទើបនាំឱ្យមានគ្រោះថ្នាក់ដោយសារគ្រាប់មីនជាបន្តបន្ទាប់រហូតមកដល់ពេលនេះ។
យ៉ាងណាក៏ដោយ ករណីពលរដ្ឋដើរជាន់មីនបណ្ដាលឲ្យផ្ទុះរបួសជើងម្ខាងយ៉ាងធ្ងន់ធ្ងរខាងលើនេះ បើ
តាមប្រភពពីមន្ត្រីជំនាញថា ពេលនេះជនរងគ្រោះត្រូវបានបញ្ជូនដល់មន្ទីរពេទ្យខេត្តហើយ បន្ទាប់ពីបានសង្គ្រោះបឋមនៅមណ្ឌលសុខភាពមូលដ្ឋាន ។ ប៉ុន្តែយ៉ាងណាអាជ្ញាធរ ក៏ដូចជាមន្ត្រីជំនាញនៅតែបន្តធ្វើការអំពាវនាវដល់ពលរដ្ឋស្រុកសំឡូត និងតាមបណ្ដាស្រុកដទៃទៀត ឱ្យមានការប្រុងប្រយ័ត្នឱ្យបានខ្ពស់បំផុតចំពោះកាកសំណល់សង្គ្រាមទាំងនេះ ព្រោះបច្ចុប្បន្នគេជឿថា អាចនៅតែមានសេសសល់នៅក្នុងព្រៃតាមតំបន់ខ្លះ ទាំងនៅលើដីនិងកប់នៅក្នុងដីនៅឡើយ៕
ចែករំលែកព័តមាននេះ