ហុងកុង ៖ គ្រូពេទ្យម្នាក់ ដែលមានភារកិច្ចពិនិត្យអ្នកទេសចរដែលវិលត្រឡប់នៅអាកាសយានដ្ឋានអន្តរជាតិហុងកុង គឺជាមនុស្សម្នាក់ក្នុងចំណោមមនុស្សយ៉ាងតិច ១០នាក់ ដែលបានធ្វើតេស្តវិជ្ជមានបឋមសម្រាប់កូវីដ១៩ កាលពីថ្ងៃច័ន្ទ។
បុគ្គលិកមន្ទីរសុខាភិបាល ដែលជាបុគ្គលិកធ្វើការនៅព្រលានយន្តហោះចាប់តាំងពីថ្ងៃទី១៦ ខែមីនា កំពុងត្រូវបានព្យាបាលនៅមន្ទីរពេទ្យ Prince of Wales នៅ Sha Tin។
ប្រភពមួយបាននិយាយថា៖ «លោកស្រីវេជ្ជបណ្ឌិត ទទួលខុសត្រូវភាគច្រើនក្នុងការចុះហត្ថលេខាលើការសម្រេចដាក់ឱ្យនៅដាច់ដោយឡែក និងជាអ្នកសួរសំណួរអ្នកដំណើរ»។
គេមិនទាន់ដឹងច្បាស់ទេថា តើនាងឆ្លងវីរុសនេះដោយរបៀបណា? ប្រសិនបើមានការបញ្ជាក់ នាងអាចជាវេជ្ជបណ្ឌិតដំបូងគេនៅហុងកុង ដែលបានឆ្លងជំងឺនេះពេលកំពុងធ្វើការនៅទីក្រុង។
ប្រភពវេជ្ជសាស្ត្របាននិយាយថា វេជ្ជបណ្ឌិតត្រូវបានប្រគល់ភារកិច្ចត្រួតពិនិត្យករណីគ្មានរោគសញ្ញា ក្នុងចំណោមអ្នកដំណើរដែលវិលត្រឡប់មកទីក្រុងវិញ ហើយបានពាក់ត្រឹមតែម៉ាសការពារបន្តិចបន្តួចប៉ុណ្ណោះ។ កាលពីមុនវេជ្ជបណ្ឌិតពីរនាក់ផ្សេងទៀត ត្រូវបានគេយល់ថា បានឆ្លងវីរុសនេះ បន្ទាប់ពីធ្វើដំណើរទៅបរទេស។
ប្រសិនបើការធ្វើតេស្តវិជ្ជមាននៅថ្ងៃច័ន្ទ ត្រូវបានបញ្ជាក់ថា វានឹងធ្វើឱ្យចំនួនអ្នកឆ្លងទីក្រុងកើនដល់ ៣២៧នាក់ ដោយមានមនុស្ស ៤នាក់បានបាត់បង់ជីវិត។
ទីក្រុងហុងកុង បានរាយការណ៍ពីភាពធ្ងន់ធ្ងរនៃករណីចំនួន៤៤ កាលពីថ្ងៃអាទិត្យ ដែលជាចំនួនកើនឡើងខ្ពស់បំផុតក្នុងរយៈពេល ២ថ្ងៃចាប់តាំងពីការផ្ទុះឡើង៕ ដកស្រង់ចេញពីវេបសាយ ៖ thestar (កែសម្រួលដោយ ៖ បុប្ផា)
ចែករំលែកព័តមាននេះ