រាជធានីភ្នំពេញ ៖ យោងតាមការអះអាងរបស់មន្ត្រីជាន់ខ្ពស់របស់គណៈកម្មការអូឡាំពិកកម្ពុជា កីឡាករគ្រប់ផ្នែកកំពុងត្រូវបានលុបចោលគម្រោងហ្វឹកហាត់ជាទ្រង់ទ្រាយធំៗ ដោយគម្រោងហ្វឹកហាត់នៅក្រៅ គឺត្រូវលុបចោលតែម្ដង ដែលស្ថានភាពនេះ ក៏នឹងធ្វើឱ្យប៉ះពាល់ដល់សមត្ថភាពរបស់កីឡាករ កីឡាការិនីជៀសមិនផុត ដោយសារតែការហ្វឹកហាត់ធំៗត្រូវបានលុបចោល។ យ៉ាងណាមិញ មានការបញ្ជាក់ថា កីឡាករ កីឡាការិនីភាគច្រើន ក៏បង្វែរការហ្វឹកហាត់ មកហ្វឹកហាត់ជាលក្ខណៈក្នុងស្រុកបែបឯកជនៗ និងបែបនៅផ្ទះជាជំនួសវិញ។
លោក វ៉ា ត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា បានបញ្ជាក់ប្រាប់ពាក់ព័ន្ធនឹងស្ថានភាពនេះថា កម្ពុជាអាចនឹងលុបចោលគម្រោងចេញទៅហ្វឹកហាត់ នៅក្រៅប្រទេស របស់ប្រភេទកីឡាមួយចំនួននៅឆ្នាំនេះ ដោយសារតែបញ្ហារីករាលដាលនៃ COVID-19 នៅតែបន្តកើនឡើង ។
លោកថា នេះគឺជាស្ថានភាពបង្ខំមួយដែលមន្ត្រីពាក់ព័ន្ធ និងកីឡាករ កីឡាការិនីទាំងអស់ ត្រូវតែបង្ខំចិត្តធ្វើ ដោយមិនអាចជម្នះទៅហ្វឹកហាត់នៅក្រៅប្រទេស ឬហ្វឹកហាត់ជាទ្រង់ទ្រាយធំៗក្នុងស្រុក ហើយបែរជាប្រឈមនឹងហានិភ័យនៃជំងឺកូវីដ១៩នោះទេ។ លោកថា ការហ្វឹកហាត់ដែលមានលក្ខណៈជុះៗគ្នាជាច្រើន គឺមិនអាចធ្វើទៅបានទៀតទេ។
លោកអះអាងថា គម្រោងហ្វឹកហាត់ក្រៅស្រុកត្រូវបានលុបចោលមិនតិចនោះទេ បើទោះជាបណ្ដាប្រទេសជាដៃគូបានផ្ដល់អាហារូបករណ៍ដល់កីឡាករ កីឡាការិនី ដែលគម្រោងទាំងនោះ គឺបណ្ដាប្រទេសដែលផ្ដល់ឱកាសឱ្យទៅ ផ្ដល់ឱ្យលក្ខខណ្ឌច្រើនយ៉ាងដល់កីឡាករ និងកីឡាការិនីកម្ពុជា។
លោកបន្ថែមថា កីឡាករដែលគ្រោងចេញទៅហ្វឹកហាត់នៅក្រៅប្រទេសឆ្នាំនេះ មានចំនួន ១១០នាក់ តែលោកមិនបានបញ្ជាក់លម្អិតពីប្រភេទកីឡាទាំងនោះឡើយ ដោយក្នុងចំណោមអ្នកទាំងនោះ មិនទាន់ប្រាកដថា នឹងលុបទាំងអស់ទេ តែភាគរយនៃការលុបចោលទាំងអស់ គឺនឹងកើតឡើង បើស្ថានភាពរីករាលដាលនៅតែបង្កការប៉ះពាល់។
លោកអះអាងថា បញ្ហានេះ មិនបានជះឥទ្ធិពលធ្ងន់ធ្ងរដល់ការអភិវឌ្ឍន៍វិស័យកីឡានៅកម្ពុជានោះទេ តែវារាំងស្ទះដល់ការពង្រឹងសមត្ថភាព ជាពិសេសនៅពេលកីឡាករ និងកីឡាការិនី ក៏មិនចង់ទៅហ្វឹកហាត់នៅក្រៅ និងការហ្វឹកហាត់ក្នុងស្រុកជាទ្រង់ទ្រាយធំៗដែរនោះ។
យ៉ាងណាមិញលោកថា ដ្បិតកម្ពុជា នឹងបង្វែរការហ្វឹកហាត់នៅក្រៅប្រទេស មកពង្រឹងការហ្វឹកហាត់នៅក្នុងស្រុកតាមរយៈនាំគ្រូបង្វឹកបរទេសល្អៗមកបង្វឹកនៅកម្ពុជា ។ សម្រាប់លោក វ៉ា ត់ ចំរើន ការហ្វឹកហាត់នៅក្រៅប្រទេស មិនខុសគ្នាពីការហ្វឹកហាត់នៅក្នុងស្រុកនោះទេ ឲ្យតែកីឡាករយកចិត្តទុកដាក់ និងខិតខំហ្វឹកហាត់ ។
លោក វ៉ាត់ ចំរើន បន្តថា ក្នុងចំណោមកីឡាករទាំង១១០នាក់ខាងលើ ដែលត្រូវចេញបង្វឹកនៅក្រៅប្រទេស មិនមែនមានន័យថា សុទ្ធតែត្រូវផ្អាកការហ្វឹកហាត់នៅក្រៅប្រទេសនោះទេ ព្រោះកម្ពុជា កំពុងពិចារណាបង្វែរពីប្រទេសដែលមានការរីករាលដាលនៃ COVID-19 តែអាចទៅហ្វឹកហាត់នៅប្រទេសផ្សេង ដែលមិនសូវផលប៉ះពាល់ជំនួសវិញ។ នេះបើតាមការបញ្ជាក់របស់លោក វ៉ាត់ ចំរើន ដែលអះអាងថា គម្រោងបញ្ជូនកីឡាករទៅហ្វឹកហាត់នៅបរទេសនៅតែរក្សានៅដដែល ប្រសិនបើការរីករាលនៃ COVID-19 មានភាពធូរស្បើយ ។
គួរបញ្ជាក់ផងដែរថា ការរីករាលដាលនៃ COVID-19 បានធ្វើឲ្យកម្ពុជាផ្អាក និងពន្យាពេលរៀបចំព្រឹត្តិការណ៍មួយចំនួនដូចជា ការប្រកួតពានរង្វាន់លីគកំពូល និងពានរង្វាន់សម្តេច ហ៊ុន សែន, ពានរង្វាន់បាល់ទាត់យុវជនអាយុក្រោម១៨ឆ្នាំ និង១៦ឆ្នាំ, ការប្រកួតកីឡាជាតិលើកទី៣, ការប្រកួតកីឡាសិស្សបឋមសិក្សាថ្នាក់ជាតិ, រំសាយការប្រមូលផ្តុំក្រុមកីឡាករជម្រើសជាតិថ្នាល និងផ្អាកសង្វៀនប្រដាល់តាមស្ថានីយទូរទស្សន៍ ជាដើម ។
បញ្ហានេះដែរ រាជរដ្ឋាភិបាលកម្ពុជា បានសម្រេចបិទសាលារៀន និងគ្រឹះស្ថានសិក្សានានា, KTV, រោងភាពយន្ត, ក្លិបកម្សាន្តនានា, ផ្អាកចូលទស្សនាក្នុងព្រះបរមរាជវាំង និងពិធីជួបជុំបែបសាសនាផ្សេងៗ ។ COVID-19 មិនត្រឹមតែឆ្លងដល់មនុស្សប៉ុណ្ណោះទេ តែវាធ្វើឲ្យប៉ពាល់វិស័យសេដ្ឋកិច្ច ពាណិជ្ជកម្ម ទេសចរណ៍ និងជីវភាពរបស់ប្រជាពលរដ្ឋទៀតផង ។
គិតត្រឹមព្រឹកថ្ងៃទី២៣ ខែមីនា ឆ្នាំ២០២០ កម្ពុជា បានរកឃើញអ្នកផ្ទុកជំងឺរលាកផ្លូវដង្ហើម បង្កឡើងដោយមេរោគ COVID-19 ចំនួន៨៦នាក់ហើយ ក្រោយរកឃើញពីរករណីបន្ថែមទៀត ក្នុងនោះ១ករណីកើតនៅខេត្តកោះកុង និង១ករណីទៀត នៅខេត្តកំពង់ចាម ៕ (កែសម្រួលដោយ ៖ បុប្ផា)
ចែករំលែកព័តមាននេះ