វង់ល្ខោនត្រូវលើកពេលសម្តែងជិត៣០រោង ដោយសារវីរុស COVID-19
- ភ្នំពេញ
រាជធានីភ្នំពេញ ៖ លោក អុល សំអាង ប្រធានក្រុមល្ខោនបាសាក់មហាជន អុល សំអាង រាជធានីភ្នំពេញ បានអះអាងថា…
រាជធានីភ្នំពេញ ៖ លោក អុល សំអាង ប្រធានក្រុមល្ខោនបាសាក់មហាជន អុល សំអាង រាជធានីភ្នំពេញ បានអះអាងថា…
រាជធានីភ្នំពេញ ៖ លោក អុល សំអាង ប្រធានក្រុមល្ខោនបាសាក់មហាជន អុល សំអាង រាជធានីភ្នំពេញ បានអះអាងថា ដោយសារការរីករាលដាលនៃជំងឺ COVID-19 វង់ល្ខោនរបស់លោកត្រូវបានគេលើកពេលនៃការសម្តែងប្រមាណជិត៣០រោង ខណៈពេលដែលចំនួនដែលនៅសេសសល់កំពុងតែស្ថិតនៅក្នុងការពិចារណានៅឡើយពីម្ចាស់កម្មវិធី។
យ៉ាងណាចំពោះការអាក់ខាននៃការសម្តែងនាពេលនេះ លោកមិនមានចិត្តសោមនស្ស និងខឹងសម្បាត្អូញត្អែរអ្វីនោះឡើយ ដោយសារតែនេះជាការសម្រេចចិត្តពីម្ចាស់កម្មវិធី ហើយនេះជាការចូលរួមជាមួយរាជរដ្ឋាភិបាល និងក្រសួងសុខាភិបាលកម្ពុជា ដើម្បីរួមគ្នាទប់ស្កាត់ការរីករាលនៃជំងឺកូវីដ១៩នេះ។
ថ្លែងប្រាប់កោះសន្តិភាពតាមសារអេឡិចត្រូនិច កាលពីថ្ងៃទី២៣ ខែមីនា ឆ្នាំ២០២០នេះលោក អុល សំអាង បានឲ្យដឹងថា ចាប់ពីពាក់កណ្តាលខែមីនា ពោលគឺតាំងសេចក្តីប្រកាសពីក្រសួងឲ្យផ្អាកការសម្តែងសិល្បៈនោះរួចមក វង់ល្ខោនបាសាក់របស់លោកត្រូវបានគេលើកពេលសម្តែងប្រមាណ៣០រោងរួចហើយ។
លោកបញ្ជាក់ថា សម្រាប់កម្មវិធីសម្តែងក្រោយចូលឆ្នាំខ្មែរវិញនោះ គឺនៅមិនទាន់មានដំណឹងពីការលើកពេល ឬយ៉ាងណានោះឡើយ ប៉ុន្តែបានត្រៀមខ្លួនរួចជាស្រេចក្នុងពេលដែលម្ចាស់កម្មវិធីមានបំណងលើកពេលដូចគ្នា ដោយសារយើងក៏មានការព្រួយបារម្ភពីសុខភាពរបស់ក្រុមសិល្បៈយើងផងដែរ។
លោកបន្តថា យើងបានគិតពីសុខភាពអ្នកសិល្បៈយើង បើទោះបីយើងដឹងថា ពួកគាត់មានជីវភាពខ្វះខាត ហើយមិនបានសម្តែងរកកម្រៃ តែបើយោងទៅតាមស្ថានការរបស់សង្គម និងវិធានការរបស់រដ្ឋាភិបាល គឺយើងត្រូវតែអនុវត្ត ព្រោះវិធានការនេះមិនមែនតែកម្ពុជានោះទេ គឺទូទាំងពិភពលោក ដែលមានមេរោគកូវីដ១៩ រីករាលដាលនេះ។
លោក អុល សំអាង បានបន្ថែមថា សុខភាពគឺជារឿងសំខាន់ កាលណាយើងមានសុខភាពល្អនោះ យើងអាចបន្តការសម្តែង និងប្រកបរបររកស៊ីផ្សេងៗ អញ្ចឹងហើយលោកសំណូមពរដល់សិល្បករ សិល្បការិនីយើងទាំងអស់ឲ្យមានការអត់ធ្មត់នៅក្នុងកាលៈទេសៈដ៏លំបាកនេះ។
លោកបន្តថា ដំណាក់កាលនេះ គឺយើងត្រូវមានការរួបរួមសាមគ្គីគ្នា ហើយក្នុងនាមយើងជាអ្នកសិល្បៈ គួរតែចូលរួមផ្សព្វផ្សាយទៅដល់មហាជនឲ្យមានការយល់ដឹងទាំងអស់គ្នាចំពោះការទប់ស្កាត់ ការពារ និងចូលរួមធ្វើអនាម័យកុំឲ្យឆ្លងនូវជំងឺកូវីដ១៩ នេះ។
បើតាមលោក អុល សំអាង ស្ថិតក្នុងដំណាក់កាលនេះ ក្នុងនាមជាប្រជាពលរដ្ឋ និងសិល្បករខ្មែរយើងមិនត្រូវបានការឌឺដង ឡកឡឺយដាក់គ្នាទៅវិញទៅមកឡើយ គឺគួរមានការរួបរួមគ្នាទប់ទល់ប្រឆាំង និងថែសុខភាពឲ្យបានល្អទាំងអស់គ្នា ដើម្បីបង្កាពីការរីករាលឆ្លងនៃជំងឺកូវីដ១៩ នេះ៕ (កែសម្រួលដោយ ៖ បុប្ផា)
ចែករំលែកព័តមាននេះ