សៀមរាប ៖ នៅរសៀលថ្ងៃទី២៣ ខែមីនានេះ ប្រធានមន្ទីរសុខាភិបាលខេត្តសៀមរាបអះអាងថា បុរសជនជាតិខ្មែរម្នាក់ដែលបានឆ្លងមេរោគកូវីដ១៩ បន្ទាប់ពីត្រឡប់មកពីម៉ាឡេស៊ីវិញឥឡូវនេះត្រូវបានធ្វើតេស្តលទ្ធផលឃើញថា អវិជ្ជមានមេរោគកូវីដ១៩ នេះហើយ ។…
សៀមរាប ៖ នៅរសៀលថ្ងៃទី២៣ ខែមីនានេះ ប្រធានមន្ទីរសុខាភិបាលខេត្តសៀមរាបអះអាងថា បុរសជនជាតិខ្មែរម្នាក់ដែលបានឆ្លងមេរោគកូវីដ១៩ បន្ទាប់ពីត្រឡប់មកពីម៉ាឡេស៊ីវិញឥឡូវនេះត្រូវបានធ្វើតេស្តលទ្ធផលឃើញថា អវិជ្ជមានមេរោគកូវីដ១៩ នេះហើយ ។
លោកវេជ្ជបណ្ឌិត ក្រុស សារ៉ាត ប្រធានមន្ទីរសុខាភិបាលខេត្តសៀមរាបបានឱ្យដឹងនៅព្រឹកថ្ងៃទី២៣ ខែមីនា ឆ្នាំ២០២០នេះថា រហូតមកដល់បច្ចុប្បន្ននេះ សភាពអ្នកផ្ទុកកូវីដ១៩ ចំនួន២នាក់ នៅខេត្តសៀមរាបមានសុខភាពធម្មតា ។ លោកបានបន្តថា «ចំពោះករណីបុរសជនជាតិខ្មែរ អាយុ៣៨ឆ្នាំ ដែលបានឆ្លងពីបុរសជនជាតិជប៉ុនកន្លងទៅនេះ គឺបានធ្វើតេស្តចំនួន៧ដងហើយជាលទ្ធផល គឺនៅតែវិជ្ជមានមេរោគកូវីដ១៩ ប៉ុន្តែមេរោគនៅមានចំនួនតិច» ។ លោកវេជ្ជបណ្ឌិតសង្ឃឹមថា នឹងអវិជ្ជមាននៅក្នុងពេលដ៏ឆាប់ខាងមុខនេះ ខណៈបុរស ជនជាតិខ្មែរម្នាក់ទៀតដែលបានឆ្លងមេរោគកូវីដ១៩ បន្ទាប់ពីត្រឡប់មកពីប្រទេសម៉ាឡេស៊ី ឥឡូវនេះត្រូវបានធ្វើតេស្តកុងត្រូលលើកទី១ លទ្ធផលឃើញថាអវិជ្ជមានមេរោគកូវីដ១៩ នេះហើយនៅថ្ងៃទី២៣ ខែមីនានេះ ហើយនឹងធ្វើតេស្តកុងត្រូលលើកទី២ទៀត។
ប្រសិនបើតេស្តលើកទី២ អវិជ្ជមានទៀតនោះ គឺមានន័យថា គាត់បានជាសះស្បើយ ពីជំងឺCOVID-19នេះហើយ ។ គាត់នឹងអាចចាកចេញពីមន្ទីរពេទ្យ ហើយបន្តការងារចត្តាឡីស័កនៅផ្ទះខ្លួនឯងបន្តទៀត ។ ចំពោះករណីពលករខ្មែរដែល ត្រឡប់មកពីប្រទេសថៃវិញ មន្ត្រីជំនាញសហការជាមួយអាជ្ញាធរមូលដ្ឋាន ធ្វើការត្រួតពិនិត្យតាមដាន សុខភាពរបស់ពួកគាត់យ៉ាងយកចិត្តទុកដាក់ ហើយបើតាមប្រកាស របស់រដ្ឋាភិបាលគឺត្រូវឱ្យគាត់រក្សានៅក្នុងផ្ទះដោយមិនពាក់ព័ន្ធជាមួយអ្នកណាចំនួន១៤ថ្ងៃ ។
លោកវេជ្ជបណ្ឌិត ក្រុស សារ៉ាត់ បន្ដថា ចំពោះអ្នកដែលធ្លាប់ពាក់ព័ន្ធប៉ះពាល់ ជាមួយអ្នកជំងឺកូវីដ១៩ និងអ្នកសង្ស័យ បានមកធ្វើតេស្ត រហូតមកដល់ពេលនេះ មានចំនួន១៧២នាក់ ហើយជាលទ្ធផលអ្នកទាំងអស់នេះអវិជ្ជាមានមេ រោគកូវីដ១៩ទាំងអស់។ លោកវេជ្ជបណ្ឌិត បានបញ្ជាក់ថា មកដល់ពេលនេះ ប្រជាពលរដ្ឋមានការយល់ដឹងខ្ពស់ ចូលរួមសហការអនុវត្តវិធានការបង្ការ ការពារ ទប់ស្កាត់ ភ្ញាក់រលឹកមករកសេវាពិគ្រោះជា មួយគ្រូពេទ្យ ក្នុងករណីមានការសង្ស័យ៕
ចែករំលែកព័តមាននេះ