ប្រទេសកូឡុំប៊ី៖ ការបះបោរដ៏សាហាវមួយ បណ្ដាលឲ្យមនុស្សស្លាប់២៣នាក់និងរបួស៩០នាក់ ក្នុងនោះមានឆ្មាំគុក៧នាក់ ក្នុងពន្ធនាគារមួយនៃទីក្រុងបូហ្គោតា កាលពីយប់ថ្ងៃទី២១មីនា ពេលកំពុងមានការប្រកាសអាសន្នខាងសុខាភិបាល ដោយសារការឆ្លងរាលដាលនៃវីរុសCOVID-19 ដែលជាហេតុផលនៃការបិទរដ្ឋធានីកូឡុំប៊ី ហាមមិនឲ្យចេញចូលនិងឲ្យប្រជាជនស្ថិតក្នុងផ្ទះ។
កាលពីថ្ងៃទី២២មីនារដ្ឋមន្ត្រីក្រសួងយុត្តិធម៌កូឡុំប៊ី លោកស្រីម៉ាហ្គារីតាកាបែលឡូបានលើកឡើងថា ការបះបោរនោះដើ់ម្បីបង្កចលាចលក្នុងគោលបំណងរត់គេចចេញពីគុក ហើយលោកស្រីបដិសេធព័ត៌មាននានាដែលថា នោះជាចលនារបស់ពួកអ្នកទោស តវ៉ាប្រឆាំងលក្ខខណ្ឌអាក្រក់ក្នុងមន្ទីរឃុំឃាំងដែលអាចបណ្ដាលឲ្យមានភាពធ្ងន់ធ្ងរដល់គ្រោះថ្នាក់នៃការឆ្លង។
គូឡុំប៊ីពេលនេះរៀបរាប់ពីមនុស្សឆ្លងវីរុស២៣១នាក់ក្នុងនោះ២នាក់ស្លាប់ តាំងពីរកឃើញការឆ្លងក្នុងប្រទេសពីថ្ងៃទី៦មីនាមក។ លោកស្រីកាបែលឡូថ្លែងទៅកាន់សារព័ត៌មានថា មានការប៉ុនប៉ងដ៏ធំចង់រត់គេចចេញពីពន្ធនាគារឡាម៉ូដឹឡូ និងឲ្យមានការបះបោរក្នុងមជ្ឈមណ្ឌលឃុំឃាំងដទៃទៀតរបស់ប្រទេស។ លទ្ធផលនៃការប៉ុនប៉ងរត់គេចចេញ ពីពន្ធនាគារឡាម៉ូដឺឡូ បណ្ដាលឲ្យអ្នកទោស២៣នាក់ស្លាប់៕
ចែករំលែកព័តមាននេះ