រាជធានីភ្នំពេញ ៖ ការប្រកួតប្រដាល់មិត្តភាពកម្ពុជា-ថៃនៅលើសង្វៀនស៊ីអិនស៊ីកាលពីព្រឹកថ្ងៃសៅរ៍ ទី២១ មីនា ក្នុងចំណោមកីឡាករកម្ពុជាចំនួន៣រូបមានតែកីឡាករ ម៉ឺន មេឃាមកពីសមាគមកីឡាប្រដាល់ក្រសួងការពារជាតិប៉ុណ្ណោះដែលបានយកឈ្នះកីឡាករដោយពិន្ទុ។
ការប្រកួតរវាងកីឡាករ ម៉ឺន មេឃា ជាមួយកីឡាករថៃLink Loomពិតជាមានសភាពស្វិតស្វាញខ្លាំងណាស់ ។ ទោះបីជាកីឡាករថៃរូបនេះមានប្រៀបខាងកម្ពស់ជាងបន្តិចមែន តែមិនបានធ្វើឱ្យម៉ឺន មេឃា ខ្លាចរអាបន្តិចណាឡើយ ។
ពួកគេទាំងពីរបានបើកការវាយប្រហារគ្នាទៅវិញទៅមកយ៉ាងសាហាវបំផុតតាំងពីទឹកទី១មកម៉្លេះ។ កីឡាករLink Loomបានព្យាយាមសម្រុកចូលកៀកដើម្បីចាប់ក្រៀកវាយជង្គង់ តែត្រូវ ម៉ឺន មេឃា ដកថយហើយព្យាយាមទាត់សន្ធាប់ទៅលើជើងឆ្វេងសងវិញ ។ ទោះជាយ៉ាងណា ការប្រកួតគ្នាត្រឹមទឹកទី៣ពួកគេទាំងពីរមានប្រៀបប្រហាក់ប្រហែលគ្នា ប៉ុន្តែល្វែងខាងក្រោមរបស់កីឡាករថៃចាប់ផ្ដើមមានបញ្ហាបណ្ដើរៗដោយសារទម្ងន់ជើងរបស់ ម៉ឺន មេឃា ។ គ្រាន់តែចូលដល់ទឹកទី៤ភ្លាម ម៉ឺន មេឃា មិនបង្អង់ទុកយូរទៀតឡើយ ព្រោះគេដឹងថា ជើងឆ្វេងកីឡាករថៃម្នាក់នេះទប់ជំហរលែងចង់ជាប់ទៅហើយនោះ គេកាន់តែបង្កើនការទាត់សំដៅជើងខាងឆ្វេង បណ្ដាលឱ្យLink Loomដួលទៅលើក្ដារតាពីត្រូវអាជ្ញាកណ្ដាលរាប់៨រហូតដល់ទៅពីរដងភ្លាមៗ។
ទោះបីជាយ៉ាងណា កីឡាករថៃនៅតែអាច ក្រោកប្រកួតវិញយ៉ាងត្រដាបត្រដួសរហូត ដល់ចប់ទឹកទី៥ហើយត្រូវបានគណៈកម្មការរៀបចំការប្រកួតប្រកាសឱ្យ ម៉ឺន មេឃា ឈ្នះដោយពិន្ទុជាឯកច្ឆ័ន្ទ៥ទល់០។
ចំណែកពីរគូទៀតកីឡាករកម្ពុជា ប៉ោ ភារិទ្ធ មកពីសមាគមកីឡាប្រដាល់ក្រសួងកសិកម្មបានចាញ់កីឡាករថៃChhaleum Chhai ដោយពិន្ទុទាំងមិនអស់ចិត្ត និងកីឡាករ លី ភា មកពីក្លិបប៉ែនកាក់គុនខ្មែរ ក៏ចាញ់ពិន្ទុកីឡាករថៃSakun Pra ទាំងមិនអស់ចិត្តដូចគ្នា៕ (កែសម្រួលដោយ ៖ បុប្ផា)
ចែករំលែកព័តមាននេះ