ខេត្តកំពង់ឆ្នាំង ៖ ដើមឈើព្រៃលិចទឹកតូច-ធំរាប់ពាន់ដើមក្នុងតំបន់៣ នៅចំណុចច្រកស្នោរ និងមួយចំនួនទៀតនៅក្នុងតំបន់អភិរក្សព្រែកហានាង ប្រមាណជាង៤ហិកតា ស្ថិតនៅក្នុងឃុំកំពង់ព្រះគគីរ ស្រុកបរិបូណ៌ ត្រូវបានជនពុំស្គាល់មុខធ្វើការកាប់ទន្ទ្រានយកដីធ្វើជាកម្មសិទ្ធិ ។ ជាក់ស្តែង កាលពីព្រឹកថ្ងៃទី២២ មីនា សមាជិកសហគមន៍នេសាទ ឃុំកំពង់ព្រះគគីរ រួមនិងអ្នកកាសែត១ក្រុម សហការគ្នាចុះតទៅពិនិត្យដោយផ្ទាល់និងថតផ្តិតយករូបភាព ដើម្បីរាយការណ៍ និងជុំរុញអោយមន្ត្រីជំនាញចំណាត់ការជនល្មើសតាមផ្លូវច្បាប់ ។
តាមការបញ្ជាក់របស់សមាជិកសហគមន៍នេសាទកំពង់ព្រះគគីរបានបញ្ជាក់ឲ្យដឹងថា នៅចំណុចខ្នងកោះព្រែកហានាង តំបន់អភិរក្សប្រមាណ១អាទិត្យមុន ព្រៃឈើលិចទឹកក្រាស់ៗដែលដើរចូលស្ទើមិនរួចប្រមាណ២ហិកតា ត្រូវបានជនល្មើសកាប់ដុតបំផ្លាញនិងឈូសឆាយរាប ធ្វើជាដៅស្រែយកជាកម្មសិទ្ធ ។
ករណីនេះ សមាជិកសហគមន៍ បានស្គាល់អត្តសញ្ញាជនល្មើសខ្លះៗហើយ ដើម្បីរាយការណ៍មន្ត្រីជំនាញចាត់ការតាមផ្លូវច្បាប់ ។ ដោយឡែកនៅចំណុចច្រកស្នោរវិញ ដើមរាំងតូចធំ រាប់ពាន់ដើមជាប់ក្បាលស្រែប្រមាណ២ហិកតា ក៏ត្រូវបានគេកាប់ថ្មីៗដោយរណាយន្ត ដើម្បីពង្រីកដីស្រែយកជាកម្មសិទ្ធផងដែរ ។ ចំណែកជនល្មើសត្រូវបានសង្ស័យថា គ្មាននរណាក្រៅពីម្ចាស់ដីស្រែនៅជាប់ចំណុចនេះឡើយ។ ចំពោះរឿងគួរអោយសោកស្តាយបំផុតទៀតនោះ នៅជិតច្រកស្នោរ ជាចំណុចទួលព្រៃឈើស្រោងៗ ធំៗ និងខ្ពស់ៗរាប់រយដើម ដែលមានទំហំប្រមាណជាងកន្លះហិកតា ក៏ត្រូវបានគេចាប់ផ្តើមកាប់រំលំកាលពីប្រមាណ១០ថ្ងៃមុនផងដែរ ក្នុងគោលបំណងយកដីជាកម្មសិទ្ធ ។
មន្ត្រីសហគមន៍នេសាទឃុំកំពង់ព្រះគគីរ បានអោយដឹងទៀតថា កាលពីឆ្នាំមុន(២០១៩) ដីព្រៃលិចទឹកនៅចំណុចច្រកស្នោរជាង៤ហិកតា ក៍ត្រូវបានជនល្មើសកាប់ទន្ទ្រានយកដីជាកម្មសិទ្ធផងដែរ ដែលរឿងនេះខាងសហគមន៍បានរាយការទៅលោកប្រធានសង្កាត់នេសាទស្រុកបរិបូណ៌រួចហើយ សុំអោយជួយបោះផ្លាកហាមឃាត់ការកាប់ព្រៃលិចទឹកនៅតំបន់នេះ ។ប៉ុន្តែខាងមន្ត្រីជំនាញមិនឃើញចំណាត់ការឡើយ ទើបឆ្នាំនេះកើតមានការទន្ទ្រានកាប់ព្រៃលិចទឹកនៅតំបន់នេះបន្តទៀត ។
ទាក់ទងនិងការកាប់បំផ្លាញព្រៃលិចទឹកនៅក្នុងចំណុចទាំង៤នេះដែរ លោក លី ឡា នាយខណ្ឌរដ្ឋបាលជលផល និងលោក ងិន ហ៊ុន ប្រធានមន្ទីកសិកម្ម រុក្ខាប្រមាញ់និងនេសាទ ខេត្ត កំពង់ឆ្នាំង បាននិយាយថា សមត្ថកិច្ចជំនាញ នឹងចុះទៅពិនិត្យ ធ្វើការវាស់វែង និយាមកាមអោយបានច្បាស់ លាស់ នៅតាមចំណុចនិមួយៗ ដែលបានខូចខាត និងស្រាវជ្រាវរកអត្តសញ្ញាណជនល្មើស ដើម្បីកសាងសំណុំរឿងដាក់ជូនតុលាការចាត់ការជនល្មើសតាមផ្លូវច្បាប់ ៕
ចែករំលែកព័តមាននេះ