ប្រទេសអីុតាលី៖ ការឆ្លងនៃវីរុសCOVID-19 ត្រឹមថ្ងៃទី២២ មីនា មានការរាលដាលខ្លាំងបំផុតនៅអឺរ៉ុប ពិសេសនៅអីុតាលី ដែលសភាពការណ៍នៅទីនោះ បានងាកទៅរកសោកនាដកម្ម ហើយនៅសហរដ្ឋអាមេរិកការព្រួយបារម្ភមានការកើនឡើង ប្រឈមមុខនឹងបណ្ដាមន្ទីរពេទ្យដែលអាចមានអ្នកជំងឺពេញលើសចំណុះ ។រលកនៃការឆ្លងលើកទី២ហាក់ដូចជាមាននៅអាសីុ ចំណែកភ្នែកកំពុងបាញ់ឆ្ពោះទៅរកអាហ្វ្រិក។ ពេលនេះពាក្យស្លោកដើម្បីចៀសវាងការប្រមូលផ្ដុំនិងការប្រាស្រ័យទាក់ទងដែលសម្រួលដល់ការចម្លងដែលមានពាសពេញលើពិភពលោកគឹ ចូរអ្នកនៅតែក្នុងផ្ទះកុំចេញក្រៅ។
ពីក្រុងវូហានប្រទេសចិនរហូតដល់ក្រុងញូវយ៉ក មនុស្សជិត១ពាន់លាននាក់ហើយត្រូវស្ថិតនៅក្នុងផ្ទះ ដើម្បីចៀសវាងការប៉ះពាល់នឹងវីរុស ដែលឆ្លងដល់មនុស្សជាង៣២០.០០០នាក់ហើយលើពិភពលោក ក្នុងនោះពាក់កណ្ដាលនៅអឹរ៉ុប។ មនុស្សជាង១៤.០០០នាក់បានបាត់បង់ជីវិតរួចហើយ ក្នុងនោះជាង៧.៥០០នាក់នៅអឺរ៉ុប។ ប្រទេសដែលរងការប៉ះពាល់ខ្លាំងជាងគេដោយសារវីរុសនេះគឹអីុតាលី ជាមួយមនុស្សស្លាប់៥.៤៧៦នាក់។ ខណៈដែលការឆ្លងបណ្ដាលឲ្យមនុស្សស្លាប់ថ្មី៦៥១នាក់ រយៈពេល២៤ម៉ោងចុងក្រោយនេះ នាយករដ្ឋមន្ត្រីអីុតាលីលោកGIUSEPPE CONTE ប្រកាសពីការបញ្ឈប់រាល់សកម្មភាពផលិតកម្មលើដែនដីរបស់ប្រទេស ដែលនោះជារឿងចាំបាច់បំផុត។
ប្រទេសអេស្ប៉ាញជាប្រទេសអឺរ៉ុបទី២រងការប៉ះពាល់ខ្លាំងជាងគេនៅអឹរ៉ុប មានអ្នកស្លាប់ថ្មីជិត៤០០នាក់ រយៈពេល២៤ម៉ោងចុងក្រោយនេះ ដែលមានការកើនឡើង៣០% នាំឲ្យចំនួនសរុបនៃអ្នកស្លាប់កើនដល់១.៧២០នាក់។ មន្ទីរពេទ្យធំមួយកំពុងតែដាក់ឲ្យដំណើរការនៅក្រុងម៉ាឌ្រីដ ចំណែករដ្ឋាភិបាលអេស្ប៉ាញស្នើពន្យារពេលការបង្ខាំងមនុស្សឲ្យនៅក្នុងផ្ទះកុំចេញក្រៅរហូតដល់ថ្ងៃទី១១មេសា។
នៅបារាំងដែលនៅទីនោះមានមនុស្សស្លាប់ដោយសារវីរុស ឡើងដល់យ៉ាងតិច៦៧៤នាក់ ក្នុងនោះលើកដំបូងមានគ្រូពេទ្យម្នាក់ស្លាប់ ប្រធានាធិបតីប្រទេសនេះលោកអេមម៉ានុយអែលម៉ាក្រុនត្រៀមពន្យារពេល ការបង្ខាំងមនុស្សឲ្យនៅក្នុងផ្ទះ។ រវាងថ្ងៃទី២១និង២២មីនា នៅបារាំងមានអ្នកស្លាប់ថ្មី១១២នាក់ទៀត។ ចំនួនអ្នកជំងឹដែលស្ថិតក្នុងមន្ទីរពេទ្យ បានឡើងដល់៧.២៤០នាក់ ក្នុងនោះ១.៧៤៦នាក់បានជាសះស្បើយឡើងវិញ។នៅប្រទេសអង់គ្លេសជាប់ជិតខាងបារាំងដែលចំនួនអ្នកឆ្លងនិងអ្នកស្លាប់មានការកើនឡើង នាយករដ្ឋមន្ត្រីលោកបូរីសចនសុននាថ្ងៃទី២២មីនា បានព្រមានថារយៈពេលប៉ុន្មានសប្ដាហ៍៍ខាងមុខនេះ យើងអាចមានស្ថានភាពដូចគ្នានៅអីុតាលីដែរ។
នៅអាល្លឹម៉ង់នាថ្ងៃទី២២មីនាបានពង្រឹងបណ្ដាវិធានការរារាំងកុំឲ្យមនុស្សនៅជុំក្បែរគ្នាខ្លាចឆ្លង ដោយហាមឃាត់ជាពិសេសការជួបជុំគ្នាលើសពី២នាក់ទៅ ដើម្បីកម្រិតការឆ្លង។ អធិការបតីអាល្លឺម៉ង់លោកស្រីអេនហ្សឺឡាម័រកែល ក្នុងសន្និសីទសារព័ត៌មានមួយថ្លែងថា ទិសដៅគឺឲ្យចំណេញពេល ក្នុងការប្រយុទ្ធរបស់យើងប្រឆាំងវីរុស។ លោកស្រីបន្តថា រយៈពេលយ៉ាងតិច២សប្ដាហ៍ ការប្រមូលផ្ដុំមនុស្សលើសពី២នាក់ទៅ នឹងត្រូវហាមឃាត់ លើកលែងតែបណ្ដាមនុស្សដែលរស់នៅក្នុងផ្ទះជាមួយគ្នា និងការជួបជុំដើម្បីការងារ។
លោកស្រីម័រកែលខ្លួនឯងផ្ទាល់ក្រោយប៉ះពាល់ជាមួយគ្រូពេទ្យម្នាក់ដែលឆ្លងវីរុស បានបង្ខាំងខ្លួនឯងនៅដាច់ពីគេ៕
ចែករំលែកព័តមាននេះ