ខេត្តសៀមរាប ៖ ព្រៃលិចទឹកនៅចំណុចព្រៃសហគមន៍នេសាទថ្នល់ដាច់ ឃុំដានរុន និងព្រៃសហគមន៍ នេសាទព្រែកស្រមោច ក្នុងឃុំកំពង់ឃ្លាំង ត្រូវភ្លើងឆេះអស់ជាង១០ហិកតា ក្នុងរយៈពេល៣ថ្ងៃ ទើបរលត់ ខណៈ មានការសហការពីមន្ត្រីជលផល និង អាជ្ញាធរស្រុក ដឹកនាំដោយលោក ម៉ក់ ប្រុស អភិបាលស្រុកសូទ្រនិគម និង ដឹកនាំកម្លាំង ដោយលោកឧត្តមសេនីយ៍ត្រី ភឹង សម្បត្តិ ស្នងការរងទទួលការិយាល័យពន្លត់ បង្ការ និងសង្គ្រោះ ក្នុងនោះមានរថយន្តពន្លត់អគ្គិភ័យចំនួន៣គ្រឿង និងត្រាក់ទ័រចំនួន៥គ្រឿង ទើបអាចទប់ស្ថានភាពនោះបានដោយជោគជ័យ។
ហេតុការណ៍ភ្លើងឆេះព្រៃលិចទឹកខាងលើនោះបានកើតឡើងអស់រយៈពេល៣ថ្ងៃ ចាប់ពីថ្ងៃទី២០ដល់ថ្ងៃទី២២ ខែមីនា ឆ្នាំ២០២០ ស្ថិតនៅក្នុងភូមិសាស្ត្រ តំបន់ព្រៃលិចទឹក ចំណុចព្រៃសហគមន៍នេសាទថ្នល់ដាច់ ឃុំដានរុន និង ព្រៃសហគមន៍នេសាទព្រែកស្រមោច ឃុំកំពង់ឃ្លាំង ស្រុកសូទ្រនិគម ខេត្តសៀមរាប ហើយភ្លើងបានរលត់ទៅវិញនៅថ្ងៃទី២២ ខែមីនា ឆ្នាំ២០២០នេះ។
បើតាមប្រភពពីសមត្ថកិច្ចមូលដ្ឋានបានប្រាប់កាលពីរសៀលថ្ងៃទី២២ ខែមីនា ឆ្នាំ២០២០ នេះថា ករណីភ្លើងឆេះព្រៃនៅតំបន់ព្រៃលិចទឹកខាងលើនោះ មានប្រជាពលរដ្ឋទៅមើលគោ ក្របី នៅឯវាលព្រៃសហគមន៍ ហើយប្រហែលជានាំគ្នាដុតភ្លើងរកឃ្មុំ ទើបធ្វើឱ្យឆាបឆេះ រាលពេញព្រៃ ខណៈពេលនោះមានបងប្អូនប្រជាពលរដ្ឋនៅក្នុងតំបន់ព្រៃសហគមន៍បានរាយការណ៍មកថា មានភ្លើងឆេះព្រៃ ទើបកម្លាំងបាននាំគ្នាចុះជួយអន្តរាគមន៍តែម្តង។
តាមប្រភពដដែលបានបន្តថា បន្ទាប់ពីបាននាំគ្នាដាក់ទឹកក្នុងគោយន្តសណ្តោងរឺម៉ក់យកទៅបាញ់ពន្លត់ ប៉ុន្តែមិនរលត់នោះទេ ខណៈខ្យល់បក់បោកកាន់តែខ្លាំង ទើបសុំអន្តរាគមន៍ពីលោកអភិបាលស្រុកសូទ្រនិគមន៍ និងមន្ត្រីជលផល ព្រមទាំងសុំអន្តាគមន៍ពីលោកស្នងការខេត្ត ដើម្បីឱ្យរថយន្តពន្លត់អគ្គិភ័យរបស់ស្នងការខេត្ត និងរថយន្តពន្លត់អគ្គិភ័យរបស់អធិការស្រុកបានចំនួន៣គ្រឿងចុះជួយអន្តរាគមន៍ ទើបអាចទប់ទល់ស្ថានការណ៍ភ្លើងឆេះព្រៃយ៉ាងខ្លាំងនេះបានដោយជោគជ័យ។
តាមប្រភពដដែលបានបញ្ជាក់ទៀតថា ក្នុងប្រតិបត្តិការជួយពន្លត់ភ្លើងឆេះព្រៃខាងលើនោះ រួមមាន រថយន្តពន្លត់អគ្គិភ័យរបស់ស្នងការខេត្តចំនួន២គ្រឿង ប្រើទឹកអស់ចំនួន១០គ្រឿង ដើម្បីទប់ទល់ភ្លើងឆេះព្រៃ ស្ថិតនៅចំនុចភូមិថ្នល់ដាច់ ឃុំដានរុន។ រថយន្តពន្លត់អគ្គិភ័យរបស់អធិការនគរបាលស្រុកសូទ្រនិគម ចំនួន១គ្រឿង ប្រើទឹកអស់៥គ្រឿង និង ត្រាក់ទ័រចំនួន៥គ្រឿង មានសណ្តោងរឺម៉ក់ទឹក ម៉ាស៊ីនបូមទឹកចំនួន៤គ្រឿង និងម៉ាស៊ីនបាញ់ថ្នាំចំនួន៦គ្រឿង ដើម្បីអាចទប់ទល់ភ្លើងឆេះព្រៃស្ថិតនៅចំនុច ឃុំកំពង់ឃ្លាំង។
តាមប្រភពដដែលបានបញ្ជាក់ទៀតថា ដោយសាររថយន្តពន្លត់អគ្គិភ័យលំបាកក្នុងការធ្វើដំណើរចូលទៅជួយ ព្រោះផ្លូវចង្អៀត ហើយខ្យល់បក់ខ្លាំង ទើបភ្លើងរាលឆេះច្រើនកន្លែង ហើយព្រៃក្រាស់ កំដៅខ្លាំងផង ទើបងាយស្រួលឆេះបែបនេះ ណាមួយប្រភពទឹកនៅឆ្ងាយផង ទើបមានការយឺតយ៉ាវក្នុងការជួយ ។ ស្ថានភាពជាក់ស្តែង ពុំអាចទប់ស្កាត់បាន ដោយសារមិនមានការចូលរួមពីប្រជាពលរដ្ឋ។
សូមបញ្ជាក់ផងដែរថា មកដល់វេលាម៉ោង៤រសៀលថ្ងៃទី២២ ខែមីនា ឆ្នាំ២០២០នេះ ស្ថានភាពភ្លើងឆេះព្រៃនៅតំបន់ព្រៃលិចទឹក ក្នុងភូមិសាស្ត្រឃុំកំពង់ឃ្លាំង ស្រុកសូទ្រនិគម ខេត្តសៀមរាប បានឆេះឡើងវិញ បណ្តើរៗទៀតហើយ ខណៈនោះអាជ្ញាធរស្រុក និង កម្លាំងសមត្ថកិច្ច និងមន្ត្រីជលផល ព្រមទាំងមន្ត្រីសហគមន៍នៅមិនទាន់ចង់ឱ្យប្រភព ព័ត៌មានចុះផ្សាយទេ ព្រោះភ្នាក់ងារកោះសន្តិភាពបានទូរស័ព្ទសួរអភិបាលស្រុក លោក ម៉ក់ ប្រុស គាត់ឱ្យសួរទៅលោកឧត្តមសេនីយ៍ត្រី ភឹង សម្បត្តិ ស្នងការរងទទួលការិយាល័យ ពន្លត់ បង្ការ និងសង្គ្រោះអគ្គិភ័យ ហើយលោកស្នងការរងឱ្យសួរទៅប្រធានការិយាល័យពន្លត់ បង្ការ និងសង្គ្រោះ ហើយលោកប្រធានការិយាល័យបានប្រាប់វិញថា ចាំលោកឆ្លងយោបល់លោកស្នងការរងសិន៕ (កែសម្រួលដោយ ៖ ធីតា)
ចែករំលែកព័តមាននេះ