រាជធានីភ្នំពេញ ៖ នៅរសៀលថ្ងៃទី ២២ ខែមីនា ឆ្នាំ២០២០ នេះ នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលបានបង្ហាញនូវព័ត៌មានមួយថាក្នុងចំណោមអ្នកផ្ទុកកូវីដ ១៩ ចំនួន ៥៣ រូបនៅកម្ពុជាកន្លងមក គឺមានមន្ត្រីជាន់ខ្ពស់ខ្មែរមួយរូបផងដែរ ។
នាយកដ្ឋានប្រយុទ្ធនឹងជំងឺឆ្លងបានបង្ហោះសារមានខ្លឹមសារថា «យើងបានបញ្ចូលទិន្នន័យមន្ត្រីជាន់ខ្ពស់ម្នាក់ជនជាតិខ្មែរ ធ្វើដំណើរពីស្រុកបារាំងដែលមានវិជ្ជមាន COVID19 ក្នុងតារាងទិន្នន័យរួមតាំងពីថ្ងៃទី១៨ ខែមីនា ២០២០ ម៉្លេះ (សូមពិនិត្យក្នុងតារាងចាស់គូសរង្វង់ក្រហម) យើងគ្មានហេតុផលលាក់ទិន្នន័យ យើងធ្វើតាមជំនាញបច្ចេកទេសដោយមានសហការជិតស្និទ្ធជាមួយអង្គការ WHO USCCDC និងវិទ្យាស្ថានប៉ាស្ទ័រកម្ពុជា»។
ប្រភពដដែលបានបញ្ជាក់អះអាងថា «រហូតម៉ោង ២:៣០រសៀល ថ្ងៃទី ២២ មីនា ២០២០ យើងរកឃើញអ្នកជំងឺ សរុបទាំងអស់ចំនួន ៥៣ករណី ។ រហូតពេលនេះយើងបានព្យាបាលជាសះស្បើយពីរនាក់ហើយ គឺជនជាតិចិន១នាក់ និងជនជាតិអង់គ្លេស១នាក់ ។ យើងពុំទាន់រកឃើញភ័ស្តុតាងបញ្ជាក់ថា មានការឆ្លងក្នុងសហគមន៍នៅឡើយទេ តែលទ្ធភាពនឹងអាចកើតមានឡើង»។
យ៉ាងណាមិញ CDC មិនបានបញ្ជាក់លម្អិតនៃអត្តសញ្ញាណមន្ត្រីជាន់ខ្ពស់រូបនោះឡើយ ដោយសារតែការការពារឯកជនភាពរបស់បុគ្គលដែលផ្ទុកវីរុសកូវីដ ១៩ នោះ ។ ប្រភពក្រៅផ្លូវការបានឲ្យដឹងថា មន្ត្រីជាន់ខ្ពស់រូបនោះមានតួនាទីជាអគ្គនាយកនៅក្រសួងមួយ ៕
ចែករំលែកព័តមាននេះ