រាជធានីភ្នំពេញ ៖ កម្លាំងសមត្ថកិច្ចចម្រុះមួយក្រុមដែលដឹកនាំដោយលោកឧត្តមសេនីយ៍ទោ ឡុង ស្រេង អនុប្រធាននាយកដ្ឋានប្រឆាំងបទល្មើសក្លែងក្លាយនៃក្រសួងមហាផ្ទៃ លោក ទូច ផល្លា មន្ត្រីភ្នាក់ងារត្រួតពិនិត្យឱសថនៃក្រសួងសុខាភិបាល…
រាជធានីភ្នំពេញ ៖ កម្លាំងសមត្ថកិច្ចចម្រុះមួយក្រុមដែលដឹកនាំដោយលោកឧត្តមសេនីយ៍ទោ ឡុង ស្រេង អនុប្រធាននាយកដ្ឋានប្រឆាំងបទល្មើសក្លែងក្លាយនៃក្រសួងមហាផ្ទៃ លោក ទូច ផល្លា មន្ត្រីភ្នាក់ងារត្រួតពិនិត្យឱសថនៃក្រសួងសុខាភិបាល និងមានការសម្របសម្រួលអំពីសំណាក់លោក សាយ ណូរ៉ា ព្រះរាជអាជ្ញារងអមសាលាតំបូងរាជធានីភ្នំពេញ បានធ្វើការចុះបង្ក្រាបទីតាំងស្តុកទុក និងចែកចាយអាល់កុលក្លែងក្លាយមួយកន្លែង ដោយធ្វើការដកបានរហូតទៅដល់ចំនួន១៩ធុងសាំង និងប៊ីដុងចំណុះ៣០លីត្រចំនួន ៧៥ប៊ីដុងទៀតផងដែរ ដែលឈ្មួញបានលួចលាក់នាំចូលមកនោះ ។
ប្រតិបត្តិការចុះបង្ក្រាបខាងលើនេះដែរបានធ្វើឡើងកាលពីវេលាម៉ោង៣និង៣០នាទីរសៀលថ្ងៃទី២១ ខែ មីនា ឆ្នាំ២០២០ នៅចំណុចផ្ទះលេខ២៤C ផ្លូវលេខ៣២៨ ក្នុងសង្កាត់ទួលស្វាយព្រៃទី១ ខណ្ឌបឹងកេងកង។
តាមប្រភពព័ត៌មានពីសមត្ថកិច្ចបានប្រាប់ឱ្យដឹងថា ក្រោយពីកើតមានករណីផ្ទុះវីរុស COVID-19 នេះមក គេសង្កេតឃើញថា នៅគ្រប់ឱសថស្ថានលក់ថ្នាំពេទ្យ ឬតាមទីសាធារណៈផ្សេងៗបានដាក់លក់អាល់កុល ឬ ជែលលាងដៃ ដែលគ្រប់គ្នាមិនបានដឹងអំពីប្រភពច្បាស់លាស់ និងម្យ៉ាងទៀតវាអាចធ្វើអោយប៉ះពាល់ដល់សុខភាពរបស់ប្រជាពលរដ្ឋទូទៅទៀតនោះ ទើបកម្លាំងសមត្ថកិច្ចចម្រុះ ក្រោមការដឹកនាំរបស់លោកឧត្តមសេនីយ៍ទោ ឡុង ស្រង អនុប្រធាននាយកដ្ឋានប្រឆាំងបទល្មើសក្លែងក្លាយនៃក្រសួងមហាផ្ទៃ សហការជាមួយនិងលោក ទូច ផល្លា មន្ត្រីភ្នាក់ងារត្រួតពិនិត្យឱសថនៃ ក្រសួងសុខាភិបាល ដោយមានការសម្របសម្រួលអំពីសំណាក់លោក សាយ ណូរ៉ា ព្រះរាជអាជ្ញារងអមសាលាដំបូងរាជធានីភ្នំពេញ បានចុះធ្វើការត្រួតពិនិត្យទីតាំងនាំចូលយកមកស្តុកទុក និងចែកចាយអាល់កុលមួយកន្លែងខាងលើ ដែលមានម្ចាស់ឈ្មោះ លឺម ហ៊ុយ ភេទប្រុស អាយុ៦១ឆ្នាំ នេះតែម្តង។
តាមប្រភពដដែលបានប្រាប់បន្តទៀតថា ក្នុងការចុះត្រួតពិនិត្យ និងឆែកឆេរកន្លែងស្តុកទុក និងចែកចាយអាល់កុលក្លែងក្លាយខាងលើនេះដែរ កម្លាំងចម្រុះបានរកឃើញមានប្រភេទសារធាតុមេតាណុលដែលផ្ទុកក្នុងធុងសាំង ពណ៌ខៀវ ដែលមានទម្ងន់ក្នុងមួយធុងៗចំនួន១៦៣គីឡូក្រាម សរុបចំនួន១៩ធុងសាំង និងប៊ីដុងចំណុះ៣០លីត្រ ចំនួន៧៥ប៊ីដុង រួមទាំងឧបករណ៍ប្រើសំរាប់បូមចំនួន១ទៀតផងដែរ។
ក្រោយពីប្រតិបត្តិការបង្ក្រាបទីតាំងស្តុកទុក និង ចែកចាយអាកុលក្លែងក្លាយខាងលើនេះដែរ កម្លាំងសមត្ថកិច្ចចម្រុះបានធ្វើការដកហូតបានធុងសាំងពណ៌ខៀវដែលមានទម្ងន់ក្នុងមួយធុងចំនួន១៦៣គីឡូក្រាម សរុបចំនួន១៩ធុង និងប៊ីដុងដែលមានចំណុះ៣០លីត្រ ចំនួន៧៥ប៊ីដុង រួមទាំងឧបករណ៍សំរាប់បូបចំនួន ១ យកទៅរក្សាទុកនៅអង្គភាពវិទ្យាស្ថានស្តង់ដាកម្ពុជានៃក្រសួងឧស្សាហ៍កម្មនិងសិប្បកម្ម ចំណែកឯបុរសជាម្ចាស់ទីតាំងក៏ត្រូវបាននាំខ្លួនទៅធ្វើការសាកសួរផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ