ខេត្តឧត្តរមានជ័យ ៖ ដើម្បីទប់ស្កាត់ការរីករាលដាលនៃវីរុសកូវីដ-១៩ ច្រកទ្វារព្រំដែនអន្តរជាតិអូរស្មាច់-ឆងចម បានប្រកាសបិទទ្វារជាបណ្តោះអាសន្នដោយមិនអោយប្រជាពលរដ្ឋធ្វើដំណើរឆ្លងកាត់ ប៉ុន្តែអនុញ្ញាតអោយយានយន្តដឹកទំនិញឆ្លងកាត់ប៉ុណ្ណោះ ។
ការប្រកាសបិទមិនអោយធ្វើដំណើរឆ្លងកាត់ជាបណ្តោះច្រកអន្តរជាតិអូរស្មាច់-ឆងចមនេះបានធ្វើឡើងដោយឯកភាពរវាងអាជ្ញាធរខេត្តប្រទេសទាំងពីរ ក្រោមការជួបសម្រប សម្រួលគ្នាកាលពីវេលាម៉ោង៨ព្រឹកថ្ងៃទី២១ ខែមីនា ឆ្នាំ២០២០នេះ ភាគីខាងកម្ពុជាដឹកនាំដោយលោក ប៉ែន កុសល្យ អភិបាលខេត្តឧត្ដរមានជ័យ ជួបជាមួយលោក កៃសន កងឆ្លាត អភិបាលខេត្តសុរិន្ទ នាបរិវេណមាត់ច្រកទ្វារព្រំដែនអន្តរជាតិអូរស្មាច់-ឆងចម ស្ថិតសង្កាត់អូរស្មាច់ ក្រុងសំរោង ខេត្តឧត្តរមានជ័យ ខាងថៃស្រុកកាប់ឈើ ខេត្តសុរិន្ទ។
ក្នុងការជួបប្រជុំរវាងអាជ្ញាធរខេត្តទាំងពីរបានឯកភាពគ្នាប្រកាសបិទច្រកទ្វារអន្តរជាតិព្រំដែនអូរស្មាច់បណ្តោះអាសន្នជាផ្លូវការនៅថ្ងៃទី២៣ ខែមិនា ឆ្នាំ២០២០ ដោយមិនអនុញ្ញាតអោយប្រជាពលរដ្ឋនៃប្រទេសទាំងពីរធ្វើដំណើរឆ្លងកាត់នោះឡើយ ហើយខាងភាគីថៃ ហាមមិនអោយប្រជាពលរដ្ឋខ្មែរឆ្លងដែនទៅធ្វើការនៅប្រទេសថៃឡើយ ដោយអនុញ្ញាតប្រជាពលរដ្ឋខ្មែរដែលធ្វើការនៅថៃអាចធ្វើដំណើរមកកម្ពុជាវិញបាន។ ដោយឡែកនៅថ្ងៃទី២១ ខែមីនា ឆ្នាំ២០២០នេះ ប្រជាពលរដ្ឋប្រទេសទាំងពីរអាចធ្វើដំណើរជាធម្មតាដដែល។
ក្នុងនោះដែរ ភាគីទាំងពីរក៏បានឯកភាពគ្នាបិទបណ្តោះអាសន្ន និងបានព្រមព្រៀងគ្នាជារួមចំនួន៤ចំណុចដូចជា ៖ ១-ឯកភាពរួមសហការគ្នាទប់ស្កាត់ការរីករាលដាលជំងឺកូវីដ-១៩ ឆ្លងដែន ២-សម្របសម្រួលការឆ្លងដែនដល់អ្នកជំងឺសង្គ្រោះបន្ទាន់ លើកលែងតែជំងឺកូវីដ-១៩ ៣-សហការ និងសម្របសម្រួលដល់ការឆ្លងដែនចេញ ចូលទំនិញមានលក្ខណៈពាណិជ្ជកម្ម និងស្របតាមបទដ្ឋានបច្ចេកទេសត្រឹមត្រូវនៃប្រទេសទាំងពីរ និង៤-បន្តទំនាក់ទំនង និងផ្តល់ព័ត៌មានគ្នាទៅវិញទៅមកជាប់ជាប្រចាំ ៕ (កែសម្រួលដោយ ៖ ធីតា)
ចែករំលែកព័តមាននេះ