ប្រទេសចិន ៖ ស្ថាបនិកក្រុមហ៊ុន Alibaba និងជាមហាសេដ្ឋីម្នាក់ក្នុងចំណោមអ្នកមានបំផុតនៅអាស៊ី លោក Jack Ma បានប្រកាសនៅថ្ងៃសៅរ៍នេះថា ក្រុមហ៊ុនរបស់លោកនឹងបរិច្ចាគសំភារៈចាំបាច់ដល់ប្រទេសចំនួន១០…
ប្រទេសចិន ៖ ស្ថាបនិកក្រុមហ៊ុន Alibaba និងជាមហាសេដ្ឋីម្នាក់ក្នុងចំណោមអ្នកមានបំផុតនៅអាស៊ី លោក Jack Ma បានប្រកាសនៅថ្ងៃសៅរ៍នេះថា ក្រុមហ៊ុនរបស់លោកនឹងបរិច្ចាគសំភារៈចាំបាច់ដល់ប្រទេសចំនួន១០ នៅអាស៊ីខាងត្បូងនិងអាស៊ីអាគ្នេយ៍។
សេចក្តីប្រកាសនេះធ្វើឡើងនៅលើ Twitter របស់លោក Jack Ma ដែលបានសរសេរថា៖ «អាស៊ី! យើងនឹងបរិច្ចាគការផ្គត់ផ្គង់បន្ទាន់ (ម៉ាស់ចំនួន ១.៨លាន, គ្រឿងធ្វើតេស្តរកវីរុស ២១០០០០គ្រឿង, សម្លៀកបំពាក់ការពារចំនួន ៣៦០០០គ្រឿង, ឧបករណ៍ជំនួយដង្ហើម និងប្រដាប់វាស់សីតុណ្ហភាព) ទៅឱ្យប្រទេសអាហ្គានីស្ថាន បង់ក្លាដែស កម្ពុជា ឡាវ ម៉ាល់ឌីវ ម៉ុងហ្គោលី មីយ៉ាន់ម៉ា នេប៉ាល់ ប៉ាគីស្ថាន និង ស្រីលង្ការ។ ការដឹកជញ្ជូនឱ្យទាន់ចិត្តគឺមិនមែនងាយស្រួលទេ តែយើងនឹងធ្វើវាឱ្យបាន»។
ឥណ្ឌាគឺជាប្រទេសអាស៊ីខាងត្បូងតែមួយគត់ដែលមិនមាននៅក្នុងបញ្ជីនេះ។ នៅក្នុងសេចក្ដីថ្លែងការណ៍នាពេលថ្មីៗនេះលោក Jack Ma បាននិយាយថា៖ «ជម្ងឺរាតត្បាតដែលយើងប្រឈមមុខសព្វថ្ងៃ មិនអាចត្រូវបានដោះស្រាយដោយប្រទេសណាមួយតែឯងទៀតទេ»។
ប៉ុន្តែនេះមិនមែនជាលើកទី១ទេ ដែលលោក Jack Ma បានប្រកាសពីការបរិច្ចាគបែបនេះ។ ទីភ្នាក់ងារសារព័ត៌មានរ៉យទ័រ បានរាយការណ៍ថា ថ្មីៗនេះលោកបានប្រកាសថា លោកនឹងបរិច្ចាគឧបករណ៍ធ្វើតេស្តមេរោគចំនួន៥០០០០០ និង ម៉ាស់ចំនួន ១លាន ដល់សហរដ្ឋអាមេរិក និងបានជម្រុញឱ្យមានកិច្ចសហប្រតិបត្តិការអន្តរជាតិ ដើម្បីប្រយុទ្ធប្រឆាំងនឹងវិបត្តិសុខភាព។
ក្រៅពីនេះគំនិតផ្តួចផ្តើមរបស់លោក Jack Ma ដែលជាការសហការគ្នារវាងសប្បុរសធម៌ឯកជនរបស់លោក និងមូលនិធិអាលីបាបាថ្មីៗនេះ បានបរិច្ចាគសំភារៈសង្គ្រោះដល់តំបន់នានាក្នុងប្រទេសជប៉ុន កូរ៉េ អុីតាលី អុីរ៉ង់ និង អេស្ប៉ាញ៕ (យោងតាមប្រភពពី indiatoday )(កែសម្រួលដោយ ៖ ធីតា)
ចែករំលែកព័តមាននេះ