ទីក្រុងហ្សាកាតា ៖ វិហារអ៊ីស្លាមមួយចំនួន នៅទីក្រុងហ្សាកាតា ប្រទេសឥណ្ឌូនេស៊ី នៅតែជួបជុំគ្នាធ្វើពិធីបួងសួង នៅថ្ងៃសុក្រទី ២០ ខែមីនា ទោះបីរដ្ឋាភិបាលបានអំពាវនាវសុំឲ្យបញ្ឈប់ការបួងសួង និងការជួបជុំបែបសាសនា រយៈពេល ២សប្តាហ៍ យ៉ាងណាក្តី នេះបើយោងតាម channelnewsasia ចុះផ្សាយនៅថ្ងៃទី២០ មីនានេះ ។
កាលពីល្ងាចថ្ងៃព្រហស្បតិ៍ម្សិលមិញ លោក Anies Baswedan អភិបាលក្រុងហ្សាកាតា បាននិយាយថា សកម្មភាពសាសនារួមទាំងការបន់ស្រន់ នៅក្នុងព្រះវិហារ គួរតែត្រូវបានផ្អាក ដោយសារតែការផ្ទុះនៃវីរុសកូវីដ-១៩ ។
អភិបាលក្រុងហ្សាកាតា ក៏នឹងកាត់បន្ថយការធ្វើពិធី តាមបែបសាសនានៅសប្តាហ៍ក្រោយ ដែលមានមនុស្សរាប់ពាន់នាក់គ្រោងនឹងចូលរួមនោះ ។
ទោះបីជាវិហារអ៊ីស្លាមធំៗ នៅក្នុងរដ្ឋធានីឥណ្ឌូណេស៊ី បានលុបចោលការបន់ស្រន់ នៅថ្ងៃសុក្រ តាមការស្នើសុំដោយរដ្ឋាភិបាលក៏ដោយ ក៏គេឃើញមានវិហារអ៊ីស្លាមមួយចំនួន ហាក់មិនអើពើនឹងបម្រាបទេ នៅតែបន្តផ្ដុំគ្នាសូត្រធម៌ដដែល ។
សូមជម្រាបថា នៅថ្ងៃសុក្រទី២០ ខែមីនានេះ ឥណ្ឌូនេស៊ីបានប្រកាសដាក់ប្រទេសក្នុងស្ថានភាពអាសន្ន រយៈពេល២សប្តាហ៍ប្រឆាំងនឹងមេរោគកូវីដ-១៩ ខណៈដែលប្រទេសនេះមានចំនួនអ្នកស្លាប់ច្រើនជាង គេក្នុងចំណោមប្រទេស ជាសមាជិកអាស៊ាន ឡើងដល់ ៣២នាក់ និងមានអ្នកឆ្លងមេរោគកូវីដ១៩ សរុបចំនួន ៣៦៩ ករណីហើយ ៕
ចែករំលែកព័តមាននេះ