រាជធានីភ្នំពេញ ៖ នាព្រឹកថ្ងៃទី២០ មីនា នេះ កោះសន្តិភាពបានទៅពិនិត្យនិងសង្កេតទៅលើអាជីវករលក់ដូរនៅផ្សារអូរប្ញស្សី នៅព្រឹកថ្ងៃទី២០ មីនា នេះ គឺមានអាជីវករប្រមាណ១០%ទេដែលបិទតូប…
រាជធានីភ្នំពេញ ៖ នាព្រឹកថ្ងៃទី២០ មីនា នេះ កោះសន្តិភាពបានទៅពិនិត្យនិងសង្កេតទៅលើអាជីវករលក់ដូរនៅផ្សារអូរប្ញស្សី នៅព្រឹកថ្ងៃទី២០ មីនា នេះ គឺមានអាជីវករប្រមាណ១០%ទេដែលបិទតូប ។ ប៉ុន្តែ ប្រែមកជាការលក់ដូរតាមទូរស័ព្ទវិញ ពោលគឺអាជីករទាំងនោះមានម៉ូយ គេទូរស័ព្ទមកកុម្មង់ទិញទំនិញ និងដឹកយកទៅដល់ផ្ទះតែម្តង ខណៈកំពុងទទួលរងឥទ្ធិពលវីរុសកូវីត-១៩នេះ ។
លោក ហ៊ត វ៉ាន់ធី ប្រធានគណៈកម្មការផ្សារ បានឱ្យកោះសន្តិភាពដឹងតាមទូរសព្ទថា កាលម្សិលមិញថ្ងៃទី១៩ មីនា មានអាជីវករបានស្នើសុំឱ្យលោកបិទផ្សារអូរប្ញស្សីទាំងស្រុង ព្រោះខ្លាចឆ្លងជំងឺកូវីត-១៩ ។ ប៉ុន្តែសម្រាប់លោក ទោះជាមានការសំណូមពរពីអាជីវករបែបនេះ លោកបានឯកភាពជាមួយគណៈកម្មការផ្សារ សម្រេចមិនឱ្យបិទផ្សារនោះទេ ប៉ុន្តែបើមានអាជីករណាគាត់ចង់បិទតូបមិនលក់ដូរជារឿងរបស់គាត់ គណៈកម្មការក៏មិនមានសិទ្ធិហាមឃាត់គេដែរ ។
ស្ត្រីអ្នកលក់មាសនៅជាន់ឡៅតឿម្នាក់ បាននិយាយបែបរាងឆ្ងាយបន្តិចថា តាំងពីកម្ពុជាកើតជំងឺឆ្លងកូវីត-១៩ មក លក់អីក៏មិនដាច់ដែរ មិនដាច់ដោយសារគ្មានអ្នកមកទិញស្ងាត់ណាស់ ។ ចំណែកសន្តិសុខយាមប្រចាំការនៅផ្សារអូរប្ញស្សីម្នាក់ក៏បានប្រាប់ដែរថា ស្ងាត់ណាស់ថ្ងៃនេះ ស្ទើតែគ្មានអ្នកចូលផ្សារ បើប្រៀបធៀបមុនកើតមានជំងឺឆ្លងកូវីត-១៩ នៅសល់អ្នកមកទិញទំនិញក្នុងផ្សារអូរឬស្សីប្រមាន៣០ភាគរយប៉ុណ្ណោះ ។ ទោះជាគ្មានអ្នកទិញ អ្នកលក់នៅផ្សារអូរប្ញស្សី ក៏មិនបានដំឡើងថ្លៃលើមុខទំនិញរបស់ពួកគាត់ដែរ ។
សន្តិសុខបន្តទៀតថា បើទោះផ្សារអូរប្ញស្សីរងនូវឥទ្ធិពលកូវីត-១៩ យ៉ាងណាក្តី សន្តិសុខក្នុងផ្សារមានរបៀបរៀបរយជាធម្មតាទេ ។ ចំណែកទិដ្ឋភាពអ្នកលក់ គឺលក់ធម្មតា ខ្លះពាក់ម៉ាស់ការពារ ខ្លះក៏មិនមានពាក់ម៉ាសដែរ តែម្នាក់ៗហាក់បីដូចមិនជាសូវនិយាយស្តីរកគ្នាជិតៗទេ ។
ចែករំលែកព័តមាននេះ