ម៉ាឡេស៊ី ៖ រដ្ឋាភិបាលប្រទេសម៉ាឡេស៊ី បានត្រៀមរៀបចំសម្រាប់ក្រុមគ្រូពេទ្យ និងមន្ត្រីពេទ្យដែលចូលនិវត្តន៍ឲ្យចូលមកជួយប្រយុទ្ធប្រឆាំងនឹងកូវីដ១៩ ប្រសិនបើមានការកើនឡើងករណីថ្មីបន្តទៀត។
លោកវេជ្ជបណ្ឌិត អាដាមបាបា (Adham Baba) រដ្ឋមន្ត្រីក្រសួងសុខាភិបាល បានមានប្រសាសន៍ថា ការសម្រេចចិត្តបែបនេះនឹងត្រូវធ្វើឡើង ប្រសិនបើស្ថានការណ៍កំពុងមានភាពតានតឹង។
លោកបាននិយាយនៅលើកម្មវិធី Bicara Naratif កាលពីយប់មិញថា «ប្រសិនបើមានការកើនឡើងយ៉ាងខ្លាំងនៃចំនួនករណីកើតថ្មីដូចជា នៅប្រទេសដទៃទៀត យើងត្រូវឱ្យមន្ត្រីចូលនិវត្តន៍ខាងផ្នែកសុខាភិបាលចូលមកជួយយើងដែរ»។
លោកបាននិយាយថា គិតមកដល់ពេលនេះ ប្រទេសម៉ាឡេស៊ីមានគ្រូពេទ្យគ្រប់គ្រាន់ ដើម្បីដោះស្រាយជាមួយនឹងជំងឺកាចសាហាវនេះ។
លោកបានបន្ថែមថា ក្រសួងបានដាក់ពង្រាយគ្រូពេទ្យចំនួន ១០០០នាក់ នៅមន្ទីរពេទ្យចំនួន ៤៤ ទូទាំងប្រទេស ដើម្បីសម្រាលបន្ទុកគ្រូពេទ្យ។
គួរបញ្ជាក់ផងដែរថា ក្រសួងបានបន្ថែមគិលានុបដ្ឋាយិកាចំនួន ៨៣០នាក់ លើកិច្ចសន្យា ដើម្បីបង្កើនសមត្ថភាពកម្លាំងពលកម្មនៅមន្ទីរពេទ្យរដ្ឋចំនួន១៣៥ ក្នុងការឆ្លើយតបទៅនឹងការកើនឡើងនៃករណីកូវីដ១៩ ក្នុងមួយសប្តាហ៍កន្លងមកនេះ។
លោកវេជ្ជបណ្ឌិតអាដាមបានមានប្រសាសន៍ថា លោកសង្ឃឹមថា ប្រទេសម៉ាឡេស៊ីអាចស្ថិតក្នុងចំណោមប្រជាជាតិ ដើម្បីអភិវឌ្ឍវ៉ាក់សាំងសម្រាប់វីរុសនេះ៕ ដកស្រង់ចេញពីវេបសាយ ៖ thestar (កែសម្រួលដោយ ៖ បុប្ផា)
ចែករំលែកព័តមាននេះ