រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃបានធ្វើការអំពាវនាវទៅដល់ប្រជាពលរដ្ឋខ្មែរទាំងអស់ថា កុំមានការរើសអើង និងបក្សពួក និងពណ៌សម្បុរ ហើយអ្នកបង្ហោះព័ ត៌មានមិនពិតជុំវិញបញ្ហាកូវីដ-១៩ ដែលនាំឲ្យមានការទទួលចំពោះមុខច្បាប់ជាមិនខាន ។ ការលើកឡើងរបស់ប្រមុខក្រសួងមហាផ្ទៃនេះ បន្ទាប់ពីជនជាតិចាមបាននាំគ្នាលើកឡើងតាមបណ្តាញសង្គមថា ជនជាតិខ្មែរមានការរើសអើងខ្លួនដោយសារមានជនជាតិមួយចំនួនបានឆ្លងជំងឺកូវីដ១៩ ពីប្រទេសម៉ាឡេស៊ី នៅពេលពួកគេធ្វើប្រារព្ធពិធីសាសនា ។
ផ្តល់បទសម្ភាសន៍ជាមួយអ្នកសារព័ត៌មានក្រោយបញ្ចប់កិច្ចប្រជុំស្ដីពីវិធានការណ៍ការពាជំងឺកូវីដ-១៩ នាថ្ងៃទី២០ ខែមីនា ឆ្នាំ២០២០ នៅទីស្ដីការក្រសួងមហាផ្ទៃសម្ដេចស ខេង បានលើកឡើងថា ពេលកន្លងមករាជរដ្ឋាភិបាលក៏បានធ្វើការណែនាំដល់ប្រជាជនកម្ពុជាមិនត្រូវបែងចែកជាតិសាស្ដ្រឡើយ ជាពិសេសមិនត្រូវរើសអើងផងដែរ ។ សម្ដេចបានបញ្ជាក់ថា «សម្ដេចតេជោលោកបានណែនាំថា មិនត្រូវចែកខ្មែរអ៊ីស្លាម ខ្មែរនេះ ខ្មែរនោះទេ គឺបងប្អូនខ្មែរយើងបានផ្សាយចឹងហើយ ។ ក្នុងសេចក្ដីណែនាំរបស់ក្រសួងមហាផ្ទៃទៅខេត្តបញ្ជាក់ចំណុចនេះផងដែរ គឺថាមិនត្រូវរើសអើងទេ ហើយមិនត្រឹមខ្មែរអ៊ីស្លាមទេ ជនជាតិណាក៏ដោយដែលបានមកម្ពុជាជួបបញ្ហានឹង (កូវីដ-១៩) យើងក៏មិនត្រូវរើសអើងដែរ» ។
សម្ដេចបន្ដថា «ដូចខ្ញុំបានបញ្ជាក់ថា នៅក្នុងពេលហ្នឹងដែលសាកលលោកទាំងមូលកំពុងតែសាមគ្គីគ្នា ដើម្បីទប់ស្កាត់ជំងឺនឹង (កូវីដ-១៩) ចឹងហើយខ្មែរយើងក៏ដូចគ្នាដែរ ។ ខ្ញុំនៅបន្ដអំពាវនាវថាទុកដាក់ផលប្រយោជន៍បុគ្គលនឹងដោយឡែកទៅផលប្រយោជន៍ក្រុមបក្សពួកនឹងពណ៌សម្បុរដោយឡែកសិនទៅ ដើម្បីរួមគ្នាសិន»។ ជាងនេះទៅទៀត រដ្ឋមន្ដ្រីមហាផ្ទៃ លើកឡើងថា ចំពោះអ្នករិះគន់រាជរដ្ឋាភិបាលតាមបែបប្រជាធិបតេយ្យ រដ្ឋាភិបាលស្វាគមន៍ និងទទួលយក ។ ជាពិសេសអ្នករិះគន់រដ្ឋាភិបាល និងបង្ហោះព័ត៌មានមិនពិតជុំវិញបញ្ហា កូវីដ-១៩ នាំឲ្យច្របូកច្របល់សង្គមជាតិនឹងទទួលខុសត្រូវចំពោះមុខច្បាប់ផងដែរ ។
ជាមួយគ្នានោះដែរ រដ្ឋមន្ដ្រីមហាផ្ទៃក៏បានគូសបញ្ជាក់ថា «ព័ត៌មានពិត យើងសូមសាគមន៍ ព័ត៌មានពិតនេះថាជួនអីគេប្រឆាំងរដ្ឋាភិបាល ក្នុងក្របខណ្ឌប្រជាធិបតេយ្យ ។ រដ្ឋាភិបាលមិនយកចិត្តទុកដាក់ស្អីៗចឹងអាហ្នឹងជាព័ត៌មានពិត ។ ប៉ុន្ដែមួយទៀតព័ត៌មានវាអត់មានទេ រួចហើយគាត់បំផុសអាហ្នឹងខ្ញុំ សូមមេត្តាកាត់បន្ថយឈានទៅលុបបំបាច់ ដើម្បីយើងរួមគ្នាការពារជីវិតសង្គមរបស់យើងប្រជាជនរបស់យើង ឥឡូវនឹងមានបញ្ហានឹង (កូវីដ-១៩) ចឹងហើយប្រហែលជាអាចនឹងតាមច្បាប់របស់យើងជាធរមានអាចថាអ្នកទាំងឡាយណានៅតែប្រើប្រាស់វោហាស័ព្ទចឹងច្របូកច្របល់ទទួលខុសត្រូវចំពោះមុខច្បាប់» ៕
ចែករំលែកព័តមាននេះ