ខេត្តបន្ទាយមានជ័យ ៖ ស្ត្រីចំណាស់ម្នាក់កាន់រូបថតជាមួយនឹងទឹកមុខក្រៀមក្រំដើរសួរគេឯងស្វែងរកកូនស្រីវ័យ២៩ឆ្នាំម្នាក់ដែលបានបាត់ខ្លួនជាង១ខែមកហើយ គិតមកត្រឹមថ្ងៃទី២០ មីនា ឆ្នាំ២០២០ នេះ មិនដឹងនាងទៅទីណា ហើយថែមទាំងមិនដឹងពីមូលហេតុឱ្យពិតប្រាកដទៀត។
ស្ត្រីចំណាស់ម្នាក់ដែលកាន់រូបថតស្វែងរកកូនស្រីខាងលើ ឈ្មោះគង់ ហួ អាយុ៥៩ឆ្នាំ មានទីលំនៅភូមិប្រជាធម្មកើតសង្កាត់ផ្សារកណ្តាលក្រុងប៉ោយប៉ែត ។ ចំណែកកូនស្រីគាត់ដែលបាត់ខ្លួនឈ្មោះអៀង សុខា អាយុ២៩ឆ្នាំ ប្រើអាក់ខោនហ្វេសប៊ុកឈ្មោះ ស្រីពៅ ប៉ោយប៉ែត ។
តាមប្រភពពីស្ត្រីជាម្តាយបានបញ្ជាក់ថា កូនស្រីរបស់គាត់បានបាត់ខ្លួនកាលពីរសៀលថ្ងៃទី៧ កុម្ភៈ ឆ្នាំ២០២០ ខណៈគាត់ទៅលេងផ្ទះប្អូនស្រីបង្កើតឈ្មោះគង់ មួយ អាយុ៥១ឆ្នាំ នៅភូមិជាមួយគ្នា។
តាមប្រភពពីស្ត្រីជាម្តាយបានបន្តថា នៅពេលគាត់វិលត្រឡប់មកផ្ទះវិញ ស្រាប់តែបាត់កូនស្រី មិនដឹងនាងទៅទីណា ហើយគាត់ដាក់ការសង្ស័យថា ប្រហែលជានាងដើរតាមរកគាត់ រួចវង្វេងផ្លូវ ដែលរហូតមកទល់ថ្ងៃទី២០ មីនា នេះ នៅមិនឃើញនាងវិលត្រឡប់មកផ្ទះវិញឡើយ។
តាមប្រភពពីស្ត្រីជាម្តាយបានបញ្ជាក់ថា កន្លងមកកូនស្រីរបស់គាត់ធ្លាប់កើតជំងឺសរសៃប្រសាទផងដែរ ប៉ុន្តែគាត់បាននាំនាងទៅព្យាបាលនៅឯខេត្តពោធិសាត់ និងឲ្យលេបថ្នាំជាសះស្បើយវិញហើយនាមួយរយៈចុងក្រោយនេះ។ គាត់បន្តថា ក្រៅពីការស្វែងរកកូនស្រី គាត់ក៏បានទៅដាក់ពាក្យបណ្តឹងនៅប៉ុស្តិ៍សមត្ថកិច្ចដើម្បីឲ្យជួយស្រាវជ្រាវរកផងដែរ។
ទោះបីជាបែបណា ស្ត្រីជាម្តាយក៏បានអំពាវនាវដល់គ្រប់មជ្ឈដ្ឋាន ប្រសិនបើឃើញកូនរបស់គាត់ដូចក្នុងរូបថតនេះ សូមមេត្តាជួយទាក់ទងប្រាប់គាត់ផងតាមលេខទូរស័ព្ទក្នុងក្រដាស់ដែលគាត់កាន់បង្ហាញស្រាប់៕ (កែសម្រួលដោយ ៖ ធីតា)
ចែករំលែកព័តមាននេះ