រាជធានីភ្នំពេញ ៖ ស្ត្រី២នាក់រស់នៅខេត្តបាត់ដំបងបានឆ្លងជំងឺកូវីដ១៩ពីប្តី បន្ទាប់ពីគាត់មានវិជ្ជមានជំងឺនេះក្រោយចូលរួមពិធីសាសនានៅម៉ាឡេស៊ី ។ នេះបើតាមក្រសួងសុខាភិបាល ។
យោងតាមសេចក្តីជូនជាព័ត៌មានរបស់ក្រសួងចេញផ្សាយនៅថ្ងៃទី១៩ មីនានេះ បានឲ្យដឹងថា ស្ត្រីអាយុ៣៥ឆ្នាំ ជាភរិយាយរបស់បុរសអាយុ៤៥ឆ្នាំ ដែលមានវិជ្ជមានវីរុសកូវីដ១៩ និងស្ត្រីអាយុ៤១ឆ្នាំ ជាភរិយាបុរសអាយុ៤២ឆ្នាំ មានវិជ្ជមានជំងឺកូវីដ១៩ អ្នកទាំងនេះរស់នៅភូមិសូភី២ សង្កាត់រតនៈក្រុងបាត់ដំបង ។
ក្រសួងបន្តថា នេះជាករណីលើដំបូងដែលភរិយាយឆ្លងពីស្វាមីដែលបានវិលត្រឡប់ពីចូលរួមពិធីសាសនានៅប្រទេសម៉ាឡេស៊ី ។ ស្ត្រីទាំង២នាក់បានដាក់សម្រាកព្យាបាលនៅដាច់ដោយឡែកនៅមន្ទីពេទ្យបាត់ដំបង ។
បើក្រសួងសុខាភិបាលបានលើកឡើងទៀតថា ស្ត្រីដែលមានអាយុ៣៥ឆ្នាំ មានកូនស្រី៤នាក់ ពេលធ្វើតេស្តលទ្ធផលបង្ហាញថា អវិជ្ជមានជំងឺកូវីដ១៩ ។ ចំណែកស្ត្រីអាយុ៤១ឆ្នាំ មានកូន៣នាក់ និងម្តាយក្មេក ហើយពេលនេះត្រូវបានយកសំណាកវត្ថុវិភាគរួចរាល់ហើយ ។
សូមជម្រាបថា បើគិតត្រឹមថ្ងៃទី១៩ មីនា មានអ្នកឆ្លងជំងឺកូវីដ១៩ ចំនួន៤៧ករណីហើយនៅតាមបណ្តារាជធានីខេត្តមួយចំនួន ៕
ចែករំលែកព័តមាននេះ