រាជធានីភ្នំពេញ៖ ទន្ទឹមនឹងក្តីបារម្ភអាចថាការផ្តល់ឥណទានរបស់គ្រឹះស្ថានធនាគារនិងហិរញ្ញវត្ថុជួបបញ្ហានៅពេលវីរុសកូរ៉ូណា ឬកូវីដ១៩ផ្ទុះឡើងនៅកម្ពុជា ធនាគារជាតិនៃកម្ពុជាសម្រេចដាក់ចេញវិធានការ៣បន្ថែមដើម្បីសម្រួលសន្នីយភាព ឬទាមទារឱ្យគ្រឹះស្ថានមានទុនបង្វិលគ្រប់គ្រាន់ ខណៈពេលការផ្តល់កម្ចី ឬការទទួលប្រាក់ពីអតិជននៅមិនទាន់ចោទជាបញ្ហា។
លោកជំទាវ ជាសិរី អគ្គនាយកបច្ចេកទេសធនាគារជាតិនៃកម្ពុជាបានមានប្រសាសន៍កាលពីថ្ងៃទី១៧ ខែមីនានេះថា ធនាគារជាតិនៃកម្ពុជា (NBC) សម្រេចដាក់ចេញនូវវិធានការសំខាន់ចំនួន៣ផ្សេងទៀតដើម្បីសម្រួលសន្នីយភាព។ ដូច្នេះយើងទាមទារឱ្យគ្រឹះស្ថានបន្តផ្តល់ឥណទាន ឬយើងទាមទារឱ្យគ្រឹះស្ថានគាត់រក្សាភាពទន់ភ្លន់លើកលែងការយកការប្រាក់ ឬប្រាក់ដើមទាំងអស់នោះគឺទាមទារឱ្យគ្រឹះស្ថានមានលុយបង្វិលច្រើននៅក្នុងខ្លួន(គ្រឹះស្ថាន)។
លោកជំទាវបានពន្យល់បញ្ជាក់ថា ដើម្បីជួយគ្រឹះស្ថានឬមានទុនបង្វិលនោះហើយបន្តសកម្មភាពគឺទាមទារឲ្យយើងចេញនូវវិធានការណ៍បន្ថែមចំនួន ៣ រួមមាន ទី១) – ថ្មីៗនេះធនាគារជាតិនៃកម្ពុជាបានដាក់ចេញនៅទ្រនាប់ដើមទុន ។ ទាមទារឱ្យគ្រឹះស្ថានរក្សាដើមទុននៅខ្លួនឯងឱ្យបានច្រើន ការពារបើសិនជាមានអតិថិជនមកដកលុយគឺគាត់ត្រូវមានការផ្តល់ជូនភ្លាមៗ។ វិធានការទី២)- យើងកាត់បន្ថយអត្រាការប្រាក់នៃប្រតិបត្តិការផ្តល់សន្នីយភាពមានការធានា (LPCO) ។ វិធានការនេះអនុញ្ញាតឱ្យធនាគារជាតិនៃកម្ពុជាផ្តល់កម្ចីជាប្រាក់រៀលដល់គ្រឹះស្ថានហិរញ្ញវត្ថុ ហើយកន្លងមកយើងដាក់អត្រាការប្រាក់ ហើយគ្រឹះស្ថានណាហ៊ានផ្តល់ការប្រាក់ខ្ពស់ជាងគេ គាត់នឹងទទួលបានប្រាក់នោះយកទៅប្រើប្រាស់ជាមួយអត្រាការប្រាក់ក្នុងមួយឆ្នាំមាន៣%, ៦ខែ ២,៨%, ៣ខែ ចំនួន ៣,៦% តែចាប់ពីថ្ងៃនេះយើងកាត់បន្ថយអត្រាការប្រាក់ទាបបំផុតគឺ ២,៥% ក្នុងមួយឆ្នាំ, ២,៣% សម្រាប់ឥណទានរយៈពេល៦ខែ និង២,១% សម្រាប់រយៈពេល៣ខែនិងវិធានការទី៣)-គឺមូលបត្រអាចជួញដូរបាន(NCD)។ NCDនេះនៅពេលកន្លងមកគឺយើងផ្តល់ការប្រាក់ជូនគាត់(គ្រឹះស្ថាន)។សម្រាប់ពេលនេះអត្រាការប្រាក់ដែលយើងផ្តល់ជូនគឺយើងនឹងកាត់បន្ថយការប្រាក់ដែលយើងផ្តល់ជូនគាត់។ការកាត់បន្ថយការប្រាក់នេះគឺចង់ឱ្យគ្រឹះស្ថានយកលុយដែលនៅសល់ផ្តល់ឥណទានខាងក្រៅ» ។
បើតាមលោកជំទាវ នៅពេលកន្លងមកធនគារជាតិនៃកម្ពុជាបានដាក់ចេញនូវវិធានការណ៍ផ្សេងៗ ដូចជា៖ ១)-ស្នើឱ្យគ្រឹះស្ថានធនគារនិងហិរញ្ញវត្ថុបន្តផ្តល់ឥណទានកាន់តែសកម្មទៅលើវិស័យអាទិភាព ដើម្បីធានានិរន្តរភាពអាជីវកម្មទាំងនោះ។ ទី២)-ស្នើឱ្យគ្រឹះស្ថានធនគារនិងហិរញ្ញវត្ថុរក្សាភាពទន់ភ្លន់តាមលទ្ធភាពជាក់ស្តែង តាមរយៈការពិនិត្យលទ្ធភាពកាត់បន្ថយកាពន្យាពេលសងប្រាក់ដើមនិងការប្រាក់ពិសេសម្ចាស់អាជីវកម្មនៅតាមវិស័យសណ្ឋាគារនិងផ្ទះសំណាក់និងផ្នែកពាក់ព័ន្ធ និងទី៣)-បន្តតាមដានដាក់វិធានការការពារនៃការរីករាលដាលទៅលើអតិថិជនដើម្បីធានាបាននៅនិរន្តរភាពប្រតិបត្តិការ។ លោកផល វ៉ាន់ឌី នាយកប្រតិបត្តិសមាគមមីក្រូហិរញ្ញវត្ថុកម្ពុជាបានមានប្រសាសន៍ថា «បើយើងគិតមកដល់ឥលូវនេះ យើងអត់ទាន់ឃើញមានការប៉ះពាល់អ្វីទេ តែរយៈពេលទៅមុខទៀតយើងមិនដឹងវាយ៉ាងម៉េចទេ តែយើងកំពុងតាមដានយ៉ាងលម្អិត។ អីចឹងពីខាងសមាគមយើងកំពុងតែតាមដានស្ថានភាពនេះនៅឡើយ ហើយយើងកំពុងតែធ្វើការជាមួយខាងធនាគារជាតិលើបញ្ហានេះ»។
លោកបានសង្កត់ធ្ងន់ថា «សព្វថ្ងៃនេះយើងអត់ទាន់មានការរាយការណ៍ទេ តែអាចនៅចុងខែ៣ អីចឹងដាច់ខែមីនានេះយើងនឹងសុំរបាយការណ៍ពីខាងសមាជិកពាក់ព័ន្ធផលប៉ះពាល់នានា ឬការត្អូញត្អែពីអតិថិជន ហើយខាងសមាគមយើងមិនទាន់ការរិះគន់អ្វីនៅឡើយនោះទេ។មកដល់ពេលនេះយើងហាក់ដូចជាឃើញថាមានសញ្ញាអ្វីគួរឱ្យព្រួយបារម្ភនោះទេ»។ បើតាមនាយកប្រតិបត្តិរូបនេះថា ធនាគារកណ្តាលមានតួនាទីរក្សាស្ថិរភាពម៉ាក្រូសេដ្ឋកិច្ចនិងរក្សាគោលនយោបាយហិរញ្ញវត្ថុ ហើយនៅពេលធនគារកណ្តាលអំពាវនាវឱ្យគ្រឹះស្ថានបន្ធូរបន្ថយនិងចូលរួមជួយដោះស្រាយទុកលំបាកអតិថិជន។
លោកផល វ៉ាន់ឌី បានបន្តថា «ខ្ញុំជឿថាធនាគារជាតិដែលជាអាណាព្យាបាល ក៏មានការជួយសម្រួលដល់គ្រឹះស្ថានវិញដែរដើម្បីជួយគ្នាឆ្លងកាត់ការលំបាកទាំងអស់គ្នា។ ការដាក់ចេញវិធានការរបស់ធនាគារជាតិនៅពេលកន្លមកក៏ដូចការដាក់ចេញនៅវិធានការថ្មីៗបន្ថែមទៀតនេះ ជារួមតំណាងឱ្យសមាគមខ្ញុំមានសុទិដ្ឋិនិយមថាយើងនឹងអាចរក្សាបានស្ថិរភាពសេដ្ឋកិច្ចនិង រក្សាបានសុខាមាលភាពជូនអតិថិជនរបស់យើង។លើសពីនេះគ្រឹះស្ថានក៏មាននិរន្តរភាពដែរ ទោះបីគ្រឹះស្ថានជួបការលំបាកនិងមានការបារម្ភក្តី»។
ពាក់ព័ន្ធការផ្តល់ឥណទាននិងការទទួលប្រាក់បញ្ញើនៅក្នុងវិស័យខាងលើបើតាមសមាគម មីក្រូហិញ្ញវត្ថុបង្ហាញថាកាលឆ្នំា២០១៩ចំនួនប្រាក់សន្សំនៅតាមគ្រឹះស្ថានមីក្រូហិរញ្ញវត្ថុមានប្រមាណ៣.៧៨១លានដុល្លារអាមេរិក គិតជាចំនួនអតិថិជនប្រមាណ២,៨លាននាក់ បើធៀបនឹងឆ្នំា២០១៨មាន២.៨១៩លានដុល្លារអាមេរិកគិតជាចំនួនអតិថិជន២,១លាននាក់។ចំណែកការផ្តល់ប្រាក់កម្ចីឬការផ្តល់ឥណទាននៅឆ្នំា២០១៩មាន៧.៣៤១លានដុល្លារអាមេរិកផ្តល់ជូនអតិថិជនប្រមាណ២,២លាននាក់ បើប្រៀបធៀបនឹងឆ្នំា២០១៨មានតែ៥.៥៣៧លានដុល្លារអាមេរិកផ្តល់ជូនអតិថិជន២លាននាក់៕
ចែករំលែកព័តមាននេះ