តើអ្នកចូលចិត្តធ្វើអ្វីជាងគេពេលដែលអ្នកនៅវ័យក្មេង ? យោងទៅតាមលោកមហាសេដ្ឋី ប៊ីល ហ្គេតស៍ (Bill Gates) បានឲ្យដឹងថា ចម្លើយសំណួរខាងលើនេះនឹងប្រាប់អ្នកពីអាជីពដែលអ្នកគួរតែមាន ។…
តើអ្នកចូលចិត្តធ្វើអ្វីជាងគេពេលដែលអ្នកនៅវ័យក្មេង ? យោងទៅតាមលោកមហាសេដ្ឋី ប៊ីល ហ្គេតស៍ (Bill Gates) បានឲ្យដឹងថា ចម្លើយសំណួរខាងលើនេះនឹងប្រាប់អ្នកពីអាជីពដែលអ្នកគួរតែមាន ។ លោកធ្លាប់និយាយក្នុងបទសម្ភាសន៍មួយកាលពីឆ្នាំ ២០១៦ ថា «អ្វីដែលអ្នកចូលចិត្តធ្វើដោយងប់ងល់ក្នុងកំឡុងអាយុ ១៣ទៅ ១៨ឆ្នាំ គឺជាអ្វីដែលអ្នកមានឱកាសច្រើនក្នុងការធ្វើវាបានល្អជាងគេ» ។ ខាងក្រោមនេះ គឺជាអ្វីដែលមហាសេដ្ឋីធំៗចូលចិត្តធ្វើក្នុងវ័យខាងលើ៖
១. លោក ប៊ីល ហ្គេតស៍
លោក ហ្គេតស៍ បានចែករំលែកទៀតថា អ្វីមួយដែលលោកបានងប់ងល់ធ្វើជាងគេក្នុងកំឡុងវ័យនោះ គឺការសរសេរកូដសម្រាប់កម្មវិធី Software ហើយលោកថែមទាំង Hack ចូលទៅក្នុងកុំព្យូទ័រសាលាថែមទៀត ។
២. លោក វ៉ារេន បាហ្វេត (Warren Buffet)
មហាសេដ្ឋីវ៉ារេន បាហ្វេត ដែលជាមិត្តជិតស្និទ្ធរបស់លោក ហ្គេតស៍ ដែរធ្លាប់បានចែករំលែក្នុងបទសម្ភាសន៍មួយដែរថា «ខ្ញុំពិតជាចាប់អារម្មណ៍លើការវិនិយោគណាស់» ។ លោកបានទិញភាគហ៊ុនដំបូងនៅអាយុ ១១ឆ្នាំ ពីក្រុមហ៊ុនមួយដែលបច្ចុប្បន្នមានឈ្មោះថា Citgo។ លោកក៏បានចាប់ផ្តើមអាជីវកម្មផ្ទាល់ខ្លួនតាំងពីនៅក្មេងដែរ ហើយនៅអាយុ ១៤ឆ្នាំ លោកបានទិញកសិដ្ឋានមួយប្រមាណ ១៦ ហិចតា ដែលលោកបានជួលឲ្យទៅកសិករដទៃ ។
៣. លោក រីឆាត ប្រេនសាន់ (Richard Branson)
ទោះជាលោមានបញ្ហាច្រើនក្នុងការរៀនសូត្រពិតមែនក្តី លោកមហាសេដ្ឋីប្រេនសាន់មានទេពកោសល្យផ្នែកអាជីវកម្មតាំងពីក្មេង។ លោកបានចាប់ផ្តើមលក់កូនសេក និងដើមឈើណូអែល តែមិនបានជោគជ័យទេ ។ នៅអាយុ ១៦ឆ្នំឫ លោកបានបង្កើតទស្សនាវដ្តីមួយឈ្មោះថា Student ដែលធ្វើឲ្យលោករកចំណូលបានប្រមាណ ៦ម៉ឺនដុល្លារ ។ លោកបានយកលុយនោះទៅចាប់ផ្តើមអាជីវកម្មលក់កាសែតចម្រៀង ។
៤. លោក ស្ទីវ ចបស៍ (Steve Jobs)
អតីតនាយកប្រតិបត្តិរបស់ Apple រូបនេះស្រលាញ់គ្រឿងអេឡិចត្រូនិកណាស់ ។ លោកបានរៀនមុខវិជ្ជាមួយទាក់ទិននឹងគ្រឿងអេឡិចត្រូនិកពេលនៅវិទ្យាល័យ ប៉ុន្តែបានឈប់វិញ ព្រោះលោកឈ្លោះគ្នាជាមួយនឹងគ្រូបង្រៀន ។ នៅអាយុ ១៧ឆ្នាំ លោកបានចូលរៀននៅសាកលវិទ្យាល័យ Reed តែឈប់បន្ទាប់ពីបញ្ចប់ការសិក្សាអស់មួយត្រីមាស ។ បន្ទាប់មក លោកបានចាប់ផ្តើមចូលរៀនថ្នាក់ដែលលោកចូលចិត្តដូចជាថ្នាក់អក្សរផ្ចង់ជាដើម ។
ជាច្រើនឆ្នាំក្រោយមក លោកបាននិយាយថាការចូលរៀនថ្នាក់អក្សរផ្ចង់បានបង្រៀនឲ្យលោកជឿជាក់លើខ្លួនឯងច្រើនជាងមុន និងស្រលាញ់ការច្នៃម៉ូដស្អាតៗជាងមុនផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ