យោងតាមការចុះផ្សាយពី Sky Sports បានឱ្យដឹងថា សហព័ន្ធបាល់ទាត់ពិភពលោក (FIFA) បានសន្យាផ្តល់ប្រាក់ចំនួន ១០លានដុល្លារ ស្របពេលដែលក្រុមបាល់ទាត់ជម្រើសជាតិអាល្លឺម៉ង់ក៏មានឧបត្តម្ភទឹកប្រាក់ចំនួន ២,៥លានអឺរ៉ូដើម្បីជួយប្រយុទ្ធប្រឆាំង នឹងការរីករាលដាលនៃវីរុស Covid-19។
នៅក្នុងកិច្ចប្រជុំមួយដែលដឹកនាំដោយប្រធាន FIFA លោក Gianni Infantino ដើម្បីពិភាក្សាអំពីបញ្ហាមួយចំនួនទាក់ទង នឹងផលប៉ះពាល់នៃវីរុសឆ្លង Covid-19 នេះ។ ស្ថាប័នគ្រប់គ្រងបាល់ទាត់ពិភពលោកបានបញ្ជាក់ថា ពួកគេនឹងបញ្ចេញមូលនិធិយ៉ាងសំខាន់ ដើម្បីផ្តល់ជូនដល់អង្គការសុខភាពពិភពលោក (WHO) កំឡុងពេលយុទ្ធការប្រយុទ្ធប្រឆាំងនេះ។
ដោយឡែកក្រុមបាល់ទាត់ជម្រើសជាតិអាល្លឺម៉ង់ (DFB) ក៏បានប្រកាសថា ពួកគេក៏បានសំរេចចិត្តចូលរួមក្នុងការជួយផ្នែកហិរញ្ញវត្ថុ ដើម្បីរួមចំណែកជួយដល់រាល់សកម្មភាពប្រយុទ្ធប្រឆាំងទៅនឹងវីរុស Covid-19។
សូមបញ្ជាក់ថា គិតមកទល់ថ្ងៃទី១៩នេះ ករណីឆ្លងវីរុស Covid-19 បានកើនឡើងដល់ជិត ២២០,០០០ករណី និងបានឆក់យកអាយុជីវិតមនុស្សជិត ៩,០០០នាក់នៅទូទាំងពិភពលោក ខណៈអុីតាលីបានក្លាយជាប្រទេសទី២បន្ទាប់ពីចិន និងទី១នៅប៉ែកខាងអឺរ៉ុប ដែលមានការរីករាលដាលខ្លាំងបំផុតនៃវីរុសនេះ ៕ (កែសម្រួលដោយ ៖ ធីតា)
ចែករំលែកព័តមាននេះ