ក្នុងកំឡុងពេលដែលវីរុសកូវីដ-១៩ បានរាតត្បាតស្ទើរតែគ្រប់ប្រទេសជុំវិញពិភពលោក អ្នកមានស្តុកស្តម្ភមួយចំនួនកំពុងតែខិតខំប្រឹងប្រែងចូលរួមដល់ការបង្ក្រាបការរាតត្បាតនេះ និងជំរុញដល់ការលូតលាស់សេដ្ឋកិច្ច ។ មហាសេដ្ឋីក្នុងវិស័យបច្ចេកវិទ្យាមួយចំនួនដូចជាលោកមហាសេដ្ឋី ប៊ីល ហ្គេតស៍ (Bill Gates) កំពុងតែបរិច្ចាគរាប់លានដុល្លារដើម្បជំរុញដល់ការបង្កើត និងផលិតវ៉ាក់សាំង និងការស្រាវជ្រាវលើវីរុសខាងលើ ។
មហាសេដ្ឋីផ្សេងៗទៀតដូចជាលោក ម៉ាក ឃ្យូបេន (Mark Cuban) វិញ កំពុងតែប្រើលុយចេញពីហោប៉ៅផ្ទាល់ខ្លួនដើម្បីផ្តល់ជាប្រាក់បៀវត្សរ៍ដល់បុគ្គលិកដែលធ្វើការក្នុងវិស័យកីឡា ខណៈដែលលោកមហាសេដ្ឋី អ៊ីឡុន ម៉ាស (Elon Musk) របស់ Telsa ប្រៀបដូចជាមិនព្រួយបារម្ភច្រើនពីការរាតត្បាតនេះឡើយ ហើយលោក រីឆាត ប្រេនសាន់ (Richard Brandson) វិញកំពុងតែស្នើដល់បុគ្គលិករបស់លោកឲ្យរ៉ាប់រងសម្ពាធហិរញ្ញវត្ថុមួយរយៈសិន ។
ខាងក្រោមនេះ គឺជាមហាសេដ្ឋីផ្សេងៗទៀត និងការឆ្លើយតបរបស់ពួកគេទៅនឹងស្ថានការបច្ចុប្បន្ន៖
លោក រ៉ូមេន អាប្រាម៉ូវិច (Roman ABramovich) ដែលជាម្ចាស់ក្រុមកីឡាបាល់ទាត់ Chelsea នឹងផ្គត់ផ្គង់ថ្លៃស្នាក់នៅរបស់បុគ្គលិកមកពីសេវាកម្មសុខភាពជាតិ (NHS) របស់សហរដ្ឋអាមេរិកឲ្យស្នាក់នៅសណ្ឋាគារ Stamford Bridge Millennium Hotel ។
លោក សេលដុន អាដេលសាន់ (Sheldon Adelson) ដែលជាម្ចាស់កាស៊ីណូជាច្រើននៅសហរដ្ឋអាមេរិកបានប្រកាសថានឹងផ្អាកដំណើរការរាល់អាជីវកម្មទាំងអស់របស់ Las Vegas Sands Corp នៅតំបន់ The Strip រហូតដល់ថ្ងៃទី ១ខែមេសា ។ ប៉ុន្តែក្រុមហ៊ុនលោកនឹងមិនបញ្ឈប់ការងារបុគ្គលិកណាទេ ហើយបុគ្គលិកទាំងអស់នឹងទទួលបានប្រាក់បៀវត្សន៍ធម្មតាក្នុងកំឡុងពេលផ្អាកដំណើរការនេះ ។
លោក បឺណាដ អាណូល (Bernard Arnault) ដែលជាម្ចាស់ប្រេនដ៍ល្បីគឺ LVMH កំពុងតែផ្លាស់ប្តូរឲ្យរោងចក្រផលិតទឹកអប់របស់លោកមកផលិតទឹកអាល់កុលលាងសម្អាតដៃវិញ ហើយក្រុមហ៊ុននឹងដឹកជញ្ជូនវាដោយមិនគិតថ្លៃឲ្យទៅអាជ្ញាធរបារាំង និងមន្ទីរពេទ្យធំៗនៅអ៊ឺរ៉ុប ។
អ្នកស្រី សេរីល សានបឺក (Sheryle Sandbarg) ដែលជានាយកផ្នែកប្រតិបត្តិការនៅ Facebook បានសហការជាមួយនឹងមហាសេដ្ឋីដទៃក្នុងវិស័យបច្ចេកវិទ្យាដើម្បីរកមូលនិធិបាន ៧លានដុល្លារសម្រាប់ផ្តល់ជាអាហារដល់មនុស្សនៅតំបន់ San Francisco Bay Area។ អ្នកស្រី និងគូដណ្ដឹងបានបរិច្ចាគ ១លានដុល្លារដំបូង ។
មហាសេដ្ឋី ជេក ម៉ា (Jack Ma) ប្រចាំអាស៊ីវិញបានសន្យាថានឹងបរិច្ចាគ ១៤លានដុល្លារដើម្បីជួយដល់ការផលិតវ៉ាក់សាំង ។ នៅថ្ងៃទី ១៣ខែមីនា លោកបានប្រកាសថាលោកនឹងបរិច្ចាគឧបករណ៍ធ្វើតេស្តចំនួន ៥០០,០០០សម្រាប់ និងម៉ាស់ ១លានម៉ាស់ឲ្យទៅសហរដ្ឋអាមេរិកផងដែរ ៕ កែសម្រួលសដោយ ៖ សុឃាក់
ចែករំលែកព័តមាននេះ