ក្លិបសេះបង្កង់ Juventus បានចាត់វិធានការពិសេស ដើម្បីការពារសុខភាពអ្នកចាត់ការទូទៅលោក Maurizio Sarri ពីការឆ្លងជំងឺរលាកផ្លូវដង្ហើមដោយសារវីរុស Covid-19 ដែលរីករាលដាលខ្លាំងជាងគេក្នុងប្រទេសអុីតាលី នេះបើយោងតាមការចុះផ្សាយពី Mirror ។
អតីតគ្រូបង្វឹកក្រុមតោខៀវ Chelsea បច្ចុប្បន្នមានវ័យ៦១ឆ្នាំ កំពុងស្ថិតក្នុងការដាក់ឱ្យនៅដាច់ដោយឡែកពីគេដោយខ្លួនឯង បន្ទាប់ពីកីឡាករ ២រូបរបស់លោកគឺកីឡាករ Daniele Rugani និង Blaise Matuidi បានធ្វើតេស្តមានសញ្ញាវិជ្ជមាននៃរីរុស Covid-19 ។
បុរសជនជាតិអុីតាលីខាងលើ បានទទួលការធ្វើតេស្តមានសញ្ញាអវិជ្ជមានចំពោះវីរុស Covid-19 នេះ ប៉ុន្តែដោយសារតែរូបលោកជាអ្នកដែលជក់បារីដ៏ខ្លាំងក្លាម្នាក់ រហូតដល់ ៦០ដើមក្នុងមួយថ្ងៃ ដែលកត្តានេះធ្វើឱ្យរូបលោក ងាយនឹងមានបញ្ហាផ្លូវដង្ហើម និងសួតអំឡុងពេលផ្ទុះវីរុសនេះ។
សូមរំលឹកជូនថា លោក Maurizio Sarri ធ្លាប់ទទួលរងបញ្ហាជំងឺរលាកសួតនៅដើមរដូវកាលនេះ ដែលបង្ខំឱ្យលោកអវត្តមានដឹកនាំក្រុមសម្រាប់ការប្រកួត កាលពីខែសីហា និងខែកញ្ញាកន្លងទៅ ៕ (កែសម្រួលដោយ ៖ ធីតា)
ចែករំលែកព័តមាននេះ