បង់ក្លាដេស ៖ ការប្រជុំបន់ស្រន់បណ្តេញជំងឺកូវីដ១៩ ដ៏ធំសម្បើម ដែលមានអ្នកកាន់សាសនារាប់ពាន់រាប់ម៉ឺននាក់ បានធ្វើឡើងនៅប្រទេសបង់ក្លាដែស កាលពីថ្ងៃពុធ ទី១៨ ខែមីនា ឆ្នាំ២០២០ នៅពេលដែលប្រទេសអាស៊ីខាងត្បូងមួយនេះ បានរាយការណ៍ពីការបាត់បង់ជីវិតលើកដំបូងដោយសារជំងឺកូវីដ១៩។
ប៉ូលីសក្នុងតំបន់ លោក Tota Miah បាននិយាយថា ប្រជាជនសាសនាមូស្លីមប្រមាណ ១០០០០នាក់ បានប្រមូលផ្តុំគ្នានៅទីវាលបើកចំហក្នុងទីប្រជុំជន Raipur ភាគខាងត្បូងប្រទេសបង់ក្លាដែស ដើម្បីបន់ស្រន់ «ខគម្ពីរព្យាបាល» ពីកូរ៉ាន ដើម្បីកំចាត់វីរុសដ៏កាចសាហាវនេះពីប្រទេស។
លោក Miah បានប្រាប់សារព័ត៌មាន AFP ថា៖ «ពួកគេបានធ្វើការអធិដ្ឋានខាត់មីស៊ីហ្វឡា បន្ទាប់ពីព្រលឹមស្រាងៗ ដើម្បីរំដោះប្រទេសពីការឆ្លងមេរោគនេះ»។
អ្នករៀបចំកម្មវិធីបានអះអាងថា ចំនួនអ្នកថ្វាយបង្គំមានចំនួន ២៥០០០នាក់។ លោកថា អ្នករៀបចំមិនបានទទួលការអនុញ្ញាតពីអាជ្ញាធរ ដើម្បីបើកវគ្គនេះទេ។ រូបថតនៃការប្រមូលផ្ដុំត្រូវបានចែកចាយយ៉ាងទូលំទូលាយនៅលើបណ្តាញសង្គម ដោយអ្នកអត្ថាធិប្បាយបានរិះគន់យ៉ាងខ្លាំងចំពោះការប្រមូលផ្តុំដ៏ធំនេះ។
អាជ្ញាធរបានបិទសាលារៀនរួចហើយ និងស្នើឱ្យប្រជាជនចៀសវាងការប្រមូលផ្តុំធំៗ តែការប្រជុំនេះ នៅតែធ្វើឡើងដោយមិនមានការអនុញ្ញាត។
លោក Abdur Rahman បានសរសេរនៅលើហ្វេសប៊ុកថា៖ «មិនគួរឱ្យជឿទេថា តើពួកគេបានធ្វើវាដោយមិនជូនដំណឹងដល់ប៉ូលីសយ៉ាងដូចម្តេច? ពួកគេនឹងទទួលខុសត្រូវ ប្រសិនបើមានអ្វីកើតឡើងចំពោះប្រជាជនក្នុងតំបន់»៕ ដកស្រង់ចេញពីវេបសាយ ៖ thestar (កែសម្រួលដោយ ៖ បុប្ផា)
ចែករំលែកព័តមាននេះ