រាជធានីភ្នំពេញ ៖ តម្លៃសាំងលក់រាយនៅតាមស្ថានីយ៍នានាក្នុងព្រះរាជាណាចក្រកម្ពុជា ក្នុងសប្ដាហ៍ទី៣នៃខែមីនា នេះ មានការធ្លាក់ចុះគួរអោយកត់សម្គាល់បើធៀបនឹងខែដើមមីនា ឆ្នាំ ២០២០ នេះ ។ ការធ្លាក់ចុះនៃតម្លៃសាំងនេះ ត្រូវបានគេមើលឃើញថាការដឹកជញ្ជូននានាទូទាំងពិភពលោកត្រូវបានធ្លាក់ចុះ ឬបិទការធ្វើដំណើរ មិនថាតាមផ្លូវទឹក ផ្លូវគោក ឬផ្លូវអាកាស បូករួមនឹងចរាចរណ៍យានយន្តក៏ហាក់ស្ងប់ស្ងាត់ជាងមុន ។
ប្រាកដណាស់ការធ្លាក់ចុះតម្លៃប្រេងនៅលើទីផ្សារនៅកម្ពុជាក៏ដូចជាពិភពលោកនាពេលនេះគឺដោយសារតែឥទ្ធិពលនៃការផ្ទុះឡើងនិងការរីករាលដាលនៃជំងឺរលាកសួតថ្មីបង្កឡើងដោយវីរុសកូវីដ១៩ ដែលកំពុងរាលដាលពេញពិភពលោកធ្វើឲ្យការប្រើប្រាស់ប្រេងឥន្ធនៈក្នុងការធ្វើដំណើរគ្រប់មធ្យោយបាយត្រូវបានកាត់បន្ថយយ៉ាងខ្លាំងក្លា ហើយក្នុងនោះក្រុមហ៊ុនអាកាសចរណ៍ជាច្រើនប្រឈមមុខនឹងការខាតបង់ប្រាក់ចំណេញធ្ងន់ធ្ងរ។ យោងតាមសេចក្តីប្រកាសព័ត៌មានរបស់ក្រសួងពាណិជ្ជកម្មកម្ពុជាចេញផ្សាយថ្មីៗនេះបានបង្ហាញអោយឃើញថា តម្លៃសាំងលក់រាយនៅតាមស្ថានីយ៍នានាទូទាំងប្រទេសបានធ្លាក់ចុះគួរអោយកត់សម្គាល់ចាប់ពីថ្ងៃទី១៦ដល់ដំណាច់ខែមីនា ឆ្នាំ ២០២០ ។ ក្នុងអំឡុងថ្ងៃនេះ តម្លៃសាំងដែលត្រូវក្រសួងបានកំណត់អោយលក់ត្រឹម៣០៥០រៀលក្នុងមួយលីត្រ ចំពោះសាំងធម្មតា និងតម្លៃ ២៨០០រៀលក្នុងមួយលីត្រចំពោះប្រេងម៉ាស៊ូត ។
ដោយឡែកចំពោះប្រភេទសាំងស៊ុបពែរមិនមានការកំណត់ថ្លៃនោះទេ ។ លោក ពិត សីហា និស្សិតមួយរូបនៅក្រុងភ្នំពេញបាននិយាយថា «ខ្ញុំកត់សម្គាល់ឃើញថាការផ្ទុះនិងការរីករាលដាលនៃវីរុសកូវីដ ១៩ គឺពិតជាមានឥទ្ធិពលជាអវិជ្ជមានជាច្រើនលើវិស័យដឹកជញ្ជួន ។ តែខ្ញុំសប្បាយចិត្តពេលប្រេងសាំងលើពិភពលោកចុះថ្លៃ ព្រោះពេលនេះមិនគឺម្នាក់ៗហាក់ភ័យខ្លាចវីរុសមួយនេះ ហើយសកម្មភាពអាជីវកម្មក៏ស្ងាត់ ហើយប្រាក់ចំណូលឪពុក-ម្តាយខ្ញុំក៏ធ្លាក់ចុះដែរ អញ្ចឹងសង្ឃឹមថាប្រេងសាំងចុះថោកជាងនេះ គឺត្រឹម ២៥០០ រៀលក្នុងមួយលីត្រកាន់តែប្រសើរ» ។ បើយោងតាមតារាងថ្លៃលក់រាយប្រេងឥន្ធនៈនៅលើទីផ្សារអន្តរជាតិដែលផ្សព្វផ្សាយដោយក្រសួងពាណិជ្ជកម្មក៏បានបង្ហាញផងដែរថា តម្លៃប្រេងឥន្ធនៈបានធ្លាក់ចុះជាបន្តបន្ទាប់ចាប់ពីដើមខែមីនាមកម្ល៉េះ ជាក់ស្ដែងនៅថ្ងៃទី២ ខែមីនា តម្លៃសាំងធម្មតា មានតម្លៃ៥៥,៧៩ដុល្លារអាមេរិកក្នុងមួយបារ៉ែល ប្រេងម៉ាស៊ូតមានតម្លៃ៦០,៦៤ដុល្លារអាមេរិកក្នុងមួយបារ៉ែល ហើយរហូតមកដល់ថ្ងៃទី ១៣ខែមីនា តម្លៃសាំងធម្មតាបានធ្លាក់មកនៅត្រឹម ៣៧,៣៥ ដុល្លារអាមេរិកក្នុងមួយបារ៉ែល និងប្រេងម៉ាស៊ូតបានធ្លាក់ចុះមកនៅត្រឹម៤៥,៨៥ដុល្លារអាមេរិកក្នុងមួយបារ៉ែល ។
យោងតាមអ្នកនាំពាក្យក្រសួងពាណិជ្ជកម្ម លោក ស៊ាង ថៃ កន្លងមកធ្លាប់បានបញ្ជាក់ថា ការកំណត់តម្លៃប្រេងឥន្ធនៈលក់រាយនៅលើទីផ្សារកម្ពុជាគឺត្រូវធ្វើឡើងដោយអន្តរក្រសួង ដោយមានក្រសួងសេដ្ឋកិច្ចនិងហិរញ្ញវត្ថុ ក្រសួងរ៉ែនិងថាមពល និងក្រសួងពាណិជ្ជកម្ម ដើម្បីជួយសម្រួលដល់ជីវភាពរបស់ប្រជាពលរដ្ឋប្រចាំថ្ងៃ ពីព្រោះពួកគាត់ត្រូវការប្រេងឥន្ធនៈដើម្បីចាក់យានយន្តសម្រាប់ដឹកទំនិញនិងមធ្យោបាយធ្វើដំណើរប្រចាំថ្ងៃ ។ ការកំណត់របស់អន្តរក្រសួងគឺសម្រាប់តែសាំងធម្មតា និងប្រងម៉ាស៊ូតប៉ុណ្ណោះ សម្រាប់សាំងស៊ុបពែរគឺទុកអោយអាជីវករលក់ទៅតាមតម្លៃទីផ្សារប្រកួតប្រជែងរៀងខ្លួន ។
អ្នកនាំពាក្យក្រសួងពាណិជ្ជកម្មដដែលនេះ ក៏បានបញ្ជាក់ថា កម្ពុជាបាននាំចូលប្រេងពីប្រទេសជាច្រើនសម្រាប់មកផ្គត់ផ្គង់ក្នុងទីផ្សារ ក្នុងនោះរួមមានប្រទេសវៀតណាម ប្រទេសថៃ ប្រទេសសិង្ហបុរី ប្រទេសម៉ាឡេស៊ីប្រទេសអារ៉ាប់ ប្រទេសញូវហ្សេឡែន អាមេរិក ចិន កូរ៉េ អាល្លឺម៉ង់ ហុងកុង ហ្វីលីពីន ជប៉ុន អូស្ត្រាលី អេស្ប៉ាញ អ៊ីតាលី អ៊ុយគ្រែន ឥណ្ឌា ហូឡង់ តួគី ប៉ូឡូញ អង់គ្លេស កាណាដា និងប៊ែលហ្សិច ដោយក្នុងមួយឆ្នាំ ត្រូវនាំចូលប្រមាណជិតលាន២តោន និងគិតជាប្រាក់ប្រមាណជាង១ពាន់លានដុល្លារអាមេរិក ៕ កែសម្រួលដោយ ៖ សុឃាក់
ចែករំលែកព័តមាននេះ