ខេត្តកណ្តាល ៖ បើតាមសេចក្តីរាយការណ៍បានឱ្យដឹងថា អ្នកលេងល្បែងស៊ីសងបញ្ជល់មាន់២នាក់ ដែលសមត្ថកិច្ចស្រុកកៀនស្វាយ ធ្វើការឃាត់ខ្លួនបានក្នុងប្រតិបត្តិការបង្ក្រាបល្បែងស៊ីសងបញ្ជល់មាន់ បន្ទាប់ពីបញ្ជូនដល់តុលាការ ត្រូវបានព្រះរាជអាជ្ញារងសម្រេចឱ្យវិលត្រឡប់ទៅផ្ទះវិញ។
បើតាមសេចក្តីរាយការណ៍បន្តថា ជនសង្ស័យ២នាក់ខាងលើ ១-ឈ្មោះ អិន សុវណ្ណាឡៃ ភេទប្រុស អាយុ១៨ឆ្នាំ មានទីលំនៅភូមិសំរោងក្អែរ ឃុំសំរោងធំ ស្រុកកៀនស្វាយ និង២-ឈ្មោះ សុខ ធារិទ្ធ ភេទប្រុស អាយុ៣២ឆ្នាំ មានទីលំនៅភូមិរាំងដេក ឃុំសំរោងធំ ស្រុកកៀនស្វាយ។
លោក ទិន សុចិត្រា ព្រះរាជអាជ្ញាររង និងជាអ្នកនាំពាក្យអយ្យការសាលាដំបូងខេត្តកណ្តាល បានប្រាប់ថា សំណុំរឿងនេះនៅលោកស្រី ស៊ុន យឺត ព្រះរាជអាជ្ញារងអមសាលាដំបូងខេត្តកណ្តាល សម្រេចឲ្យត្រឡប់ទៅលំនៅដ្ឋានវិញហើយ ព្រោះជាករណីលែងល្បែងស៊ីសង។
លោកវរសេនីយ៍ ព្រុំ សំណាង អធិការនគរបាលស្រុកកៀនស្វាយ បានប្រាប់នៅថ្ងៃទី១៥ ខែមីនា នេះថា អ្នកញៀនល្បែងស៊ីសងបញ្ជល់មាន់២នាក់ និងបញ្ជូនទៅតុលាការនៅរសៀលនេះ ទោះបីមានអ្នកអន្តរាគមន៍សុំអោយដោះលែងក៏ដោយ។ លោកបញ្ជាក់ថា ឱ្យតែចាប់បានមកដល់អធិការដ្ឋាន គឺមិនដោះលែងឡើយ។ ហើយករណីបង្ក្រាបល្បែងស៊ីសងខាងលើនេះ ធ្វើនៅថ្ងៃទី១៤ ខែមីនា ឆ្នាំ២០២០ កាលម៉ោង១១និង៣០នាទីព្រឹក នៅចំណុចចំការស្វាយមិនស្គាល់ម្ចាស់ស្ថិតនៅភូមិសំរោងក្អែរ ឃុំសំរោងធំ ស្រុកកៀនស្វាយ ខេត្តកណ្តាល។
លោកអធិការនគរបាលស្រុក បានបន្តទៀតថា មានប្រជាពលរដ្ឋបានរាយការណ៍ប្រាប់មកសមត្ថកិច្ចថា មានករណីជល់មាន់នៅចំណុចចំការស្វាយ មិនស្គាល់ម្ចាស់ ស្ថិតនៅភូមិសំរោងក្អែរ ។ ពេលទទួលព័ត៌មានភ្លាម កម្លាំងនគរបាលប៉ុស្តិ៍សំរោងធំសហការជាមួយកម្លាំងជំនាញយុត្តិធម៌ស្រុកកៀនស្វាយ ចុះដល់កន្លែងកើតហេតុខាងលើ ឃើញមានមនុស្សប្រហែលជាង១០នាក់កំពុងលេងជល់មាន់ ។
ខណៈពេលឃើញកម្លាំងជំនាញ និងប៉ុស្តិ៍ទៅដល់ អ្នកលេងជល់មាន់បានរត់គេចខ្លួន ហើយសមត្ថកិច្ចអស់ឃាត់ខ្លួន២នាក់ ក្នុងមានម្នាក់រត់ពួននៅក្នុងបន្ទប់ទឹក និងម្នាក់ទៀតនៅខាងក្រោមផ្ទះប្រជាពលរដ្ឋ ។ ចំណែកវត្ថុតាងដែលបន្សល់ទុកនៅមាន់ជល់ឈ្មោល១ក្បាល និងម៉ូតូ៥គ្រឿង ក្រោយមកត្រូវកម្លាំងប្រមូលវត្ថុតាងខាងលើ រួមទាំងជនសង្ស័យទាំង២នាក់យកមកប៉ុស្តិ៍នគរបាលសំរោងធំ រួចបានបញ្ជូនមកអធិការដ្ឋាននគរបាលស្រុកដើម្បីបន្តចាត់ការតាមនីតិវិធី៕ (កែសម្រួលដោយ ៖ បុប្ផា)
ចែករំលែកព័តមាននេះ