ខេត្តប៉ៃលិន ៖ ក្រោយពីគេហទំព័រកាសែតកោះសន្តិភាពបានចេញផ្សាយកាលពីវេលាម៉ោង២និង១៧នាទីរសៀលថ្ងៃទី១៧ ខែមីនា ឆ្នាំ២០២០ កន្លងទៅ ពាក់ព័ន្ធនឹងការដាក់តាំងពិព័រណ៍ព្រោងព្រាតនៅមុខសាលាខេត្ត ធ្វើឱ្យប្រជាពលរដ្ឋព្រួយបារម្ភព្រួយបារម្ភពីសុវត្ថិភាព ខណៈឃើញដាក់តាំងពិព័រណ៍ព្រោងព្រាត នៅមុខសាលាខេត្ត ស្របពេលដែលវីរុសកូវីដ-19 កំពុងវាយលុកពិភពលោក ប៉ុន្តែរហូតមកដល់វេលាម៉ោង៣និង៥៧នាទីរសៀលថ្ងៃទី១៨ ខែមីនា ត្រូវបានគេរុះរើចេញជាបណ្តើរៗហើយ ដោយអ្នកខ្លះលើកឡើងថា គេបិទអ្វីៗគ្រប់កន្លែងអស់ហើយ បែរជាមកដាក់តាំងពិព័រណ៍បែបនេះទៅវិញ ។ គួររំលឹកថា អាជីវករលក់ដូរកន្លែងតាំងពិព័រណ៍ត្អូញត្អែររថា ពិតជាស្ងាត់មនុស្ស (វីដេអូ)
ចំណែកអាជីវករមួយចំនួនបែរជាមានការខឹងសម្បារនឹងកោះសន្តិភាពដោយនិយាយថា គេលក់ដូរតែគេសុខៗ បែរជាចុះផ្សាយឱ្យផ្អើលគេផ្អើលឯង ធ្វើឱ្យពួកគាត់ខាតបង់ក្នុងការលក់ដូរ ។ អាជីវករខ្លះទៀតលើកឡើងថា វីរុសកូរ៉ូណា ឬCovid-19 គេដឹងថា វាកាចសាហាវហើយ តែអ្នកលក់ដូរក៏ចេះដឹងពីរបៀបការពារដែរ ។
ចំណែកអ្នកខ្លះទៀត គេត្រេកអរ កុំតែបានកោះសន្តិភាពចុះផ្សាយ មើលទៅប្រហែលជាមិនមានការបិទឬរុះរើចេញនោះទេ ចុះបើសិនជាមានករណីឆ្លងនៅកន្លែងតាំងពិព័រណ៍មែន តើមាននរណាទទួលខុសត្រូវ? ព្រោះជំងឺប្រភេទនេះ មិនស្គាល់នរណាទេ ឱ្យតែនៅក្បែរ ឬប៉ះពាល់ប្រាកដជាឆ្លងតៗគ្នាជាក់ជាមិនខាន ។
សូមបញ្ជាក់ថា ប្រជាពលរដ្ឋរស់នៅក្នុងខេត្តប៉ៃលិនជាច្រើននាក់បាននិយាយខ្សឹបខ្សៀវគ្នានៅតាមតុក្នុងហាងបាយ កាហ្វេ គុយទាវ ក្នុងក្រុងប៉ៃលិន រហូតដល់អ្នកខ្លះទៀត មានការបង្ហោះបញ្ចេញមតិក្នុងបណ្តាញសង្គម ដោយហួសចិត្ត ខណ:គេភ័យបារម្ភគ្រប់ៗគ្នា បែរជាមានការដាក់តាំងពិព័រណ៍នៅមុខសាលាខេត្ត យ៉ាងរំភើយ ហាក់ដូចជាមិនខ្វល់ពីបញ្ហាវីរុសកូវីដ-១៩ ដែលកំពុងតែវាយលុកអ្វីបន្តិចទាល់តែសោះ ។
ហេតុការណ៍ ដែលគេចាប់ផ្តើមសង់រោងរួចរាល់ ដើម្បីនឹងដាក់តាំងពិព័រណ៍ ស្ថិតនៅសួនកុមារ មុខសាលាខេត្តប៉ៃលិន ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ។
ប្រភពព័ត៌មានពីប្រជាពលរដ្ឋរស់នៅក្នុងខេត្តប៉ៃលិន បានឱ្យដឹងថា បន្ទាប់ពីប្រទេសកម្ពុជាមានករណីឆ្លងវីរុសកូវីដ-១៩ រហូតដល់១២ករណី ហើយប្រទេសនានាកំពុងតែកើតជំងឺប្រភេទនេះ បណ្តាលឱ្យមានអ្នកបាត់បត់ជីវិតជាច្រើននាក់ និងអ្នកខ្លះទៀតកំពុងដេកសម្រាកព្យាបាលនៅកន្លែងដាច់ដោយឡែក ក្នុងមន្ទីរពេទ្យ ។ ចំណែកឯសាលារៀននៅទូទាំងប្រទេសកម្ពុជាត្រូវបានក្រសួងអប់រំយុវជន និងកីឡា ចេញលិខិតបិទទ្វារ ឱ្យសិស្សឈប់សម្រាកវិស្សមកាលរយ:ពេលខ្លី មុនពេលកំណត់ ដោយក្រសួង បានចេញសេចក្តីប្រកាសកាលពីថ្ងៃទី១៦ ខែមីនា ឆ្នាំ២០២០កន្លងទៅ ។
តាមប្រភពដដែលបានបន្តថា ស្រាប់តែរហូតមកដល់ពេលនេះ បែរជាគេឃើញមានការអនុញ្ញាតឱ្យដាក់តាំងពិព័រណ៍ នៅមុខបរិវេណសាលាខេត្តទៅវិញ មិនដឹងជាគេយល់ឃើញយ៉ាងម៉េច ព្រោះជំងឺប្រភេទនេះអាចនឹងឆ្លង ពេលដែលប្រជាពលរដ្ឋនាំគ្នាដើរទិញអីវ៉ាន់ ឬប៉ះអ្នកដែលកើតជំងឺប្រភេទនេះ អាចនឹងឆ្លងបន្តគ្នាជាក់ជាមិនខានឡើយ។
ចំណែកអាខោនហ្វេសប៊ុកមួយ ឈ្មោះ «Chom Pengly» បានសរសេរបង្ហោះកាលពីវេលាម៉ោង៨និង៥នាទីថ្ងៃទី១៦ ខែមីនា ឆ្នាំ២០២០ កន្លងទៅនេះថា «ប៉ៃលិនអើយ ប៉ៃលិន គេព្រួយបារម្ភទូទាំងពិភពលោក ខុសអីតែឯង ។ គេបិទសាលារៀនគ្រប់ខេត្ត បិទមិនឱ្យមានទីប្រជុំជន ចុះខេត្តនេះមិនមើលអ្នកនៅជុំវិញផង មានលក់តាំងពិព័រណ៍នៅកណ្តាលខេត្ត គួរពិចារណាទាំងអស់គ្នា ។ មិនមែនរិះគន់ទេ តែចង់ឱ្យមានការប្រុងប្រយ័ត្នទាំងអស់គ្នា សូមអរគុណ ។
ចំណែកអ្នកចូលរួមខមមិន ឬផ្តល់យោបល់ជាច្រើននាក់ ដោយអ្នកខ្លះបានលើកឡើងថា ហួសចិត្ត, អ្នកខ្លះថា ដើម្បីទាក់ទាញភ្ញៀវទេសចរមកពីខេត្តផ្សេង, អ្នកខ្លះទៀតថា ខ្ញុំមិនហ៊ាននិយាយច្រើនទេ, ចំណែកអ្នកខ្លះទៀតក៏លើកឡើងថា «ខ្ញុំផ្ទាល់ក៏ឆ្ងល់ដែរ មិនយល់ទេ សុំទោសព្រោះមិនមែនជាសមត្ថកិច្ចខ្ញុំ តែខ្ញុំផ្ទាល់បារម្ភពីសុវត្ថិភាពប្រជាពលរដ្ឋ សុំទោសផង ដែលខ្ញុំជួយមិនបាន» ។
ពាក់ព័ន្ធនឹងបញ្ហាខាងលើនេះ លោក អ៊ុន ប៊ុនលី នាយករដ្ឋបាលសាលាខេត្តប៉ៃលិន បានឱ្យដឹងកាលពីវេលាម៉ោង៩និង៣៤នាទីព្រឹកថ្ងៃទី១៧ ខែមីនា ឆ្នាំ២០២០នេះថា ការងារនេះខាងខេត្តអត់ទាន់ដឹងទេ ដោយលោកក្តាប់អត់ទាន់បាននៅឡើយទេ បើចង់ដឹងច្បាស់សូមទាក់ទងទៅខាងប្រធានមន្ទីរពាណិជ្ជកម្មខេត្ត ព្រោះគាត់ជាអ្នកនាំចូលមក ។
ចំណែកលោក សុខ សាធីម ប្រធានមន្ទីរពាណិជ្ជកម្មខេត្ត បានឱ្យដឹងដែរថា ខាងវិស័យឯកជនគឺជាអ្នករៀបចំធ្វើពិធីនេះឡើង ដោយមានរយ:ពេល៥ថ្ងៃ ចាប់ពីថ្ងៃទី១៧-២១ ហើយភាគច្រើនគេបើកលក់ដូរនៅពេលយប់ ព្រោះពេលថ្ងៃអ្នកលក់ដូរគេសម្រាកបិទតូប ក៏មានការលក់ដូរពេលថ្ងៃខ្លះៗដែរ ។ លោកបន្តទៀតថា ចំពោះការដាក់តាំងពិព័រណ៍នេះ គឺអ្នកមកពីខេត្តបាត់ដំបង ដោយមើលទៅដូចជាមិនមានអ្វីកើតឡើងគួរឱ្យព្រួយបារម្ភនោះទេ ណាមួយគេធ្វើមិនគ្រប់ផែនការផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ