ខេត្តស្វាយរៀង ៖ បើតាមសេចក្តីរាយការណ៍បឋមបានឱ្យដឹងថា ប្រជាពលរដ្ឋជាង៦០គ្រួសារនៅភូមិពោធិក្រូច ឃុំបន្ទាយក្រាំង ស្រុកកំពង់រោទ៌ បានផ្តិតមេដៃប្តឹងទៅអាជ្ញាធរ និងមន្ត្រីជំនាញ សូមឲ្យចុះអន្តរាគមន៍ដោះស្រាយបញ្ហាឈ្មួញនាំជ្រូករស់ ដែលសង្ស័យថា គ្មានច្បាប់ ហើយយកមកទម្លាក់ក្នុងភូមិរបស់ពួកគាត់ និងសាងជ្រូកនាំចេញទៅប្រទេសវៀតណាម ។
សេចក្តីរាយការណ៍បន្តថា មិនត្រឹមតែប៉ុណ្ណោះ ពេលមានជ្រូកងាប់ វៀតណាមមិនទទួលទិញ គឺពួកឈ្មួញបានដឹកយកទៅទម្លាក់ចោលរាប់សិបក្បាលពាសវាលពាសកាលធ្វើឲ្យប្រជាពលរដ្ឋមានការព្រួយបារម្ភអំពីផលប៉ះពាល់ដល់សុខភាពរបស់ប្រជាពលរដ្ឋ។
ទាក់ទិននឹងករណីឈ្មួញដឹកជ្រូកងាប់ទៅទម្លាក់ចោលនេះដែរ នៅព្រឹកថ្ងៃទី១៧ ខែមីនា ឆ្នាំ២០២០ ដោយមានការណែនាំពីលោកសុច ពិសី អភិបាលនៃគណៈអភិបាលស្រុកកំពង់រោទ៌ បានចាត់កម្លាំងសហការជាមួយមន្ត្រីជំនាញចុះទៅពិនិត្យកន្លែងកើតហេតុជាបន្ទាន់ រួមដំណើរដោយលោកនាយករងរដ្ឋបាលសាលាស្រុក បានចុះទៅពិនិត្យតាមទីតាំងដូចជា ៖ នៅទីតាំងប្រឡាយបណ្ដែត ស្ថិតនៅភូមិប្រចន្ទ្រា និងនៅផ្ទះលោកសៅ ប្រុស អយុ៥១ឆ្នាំ នៅភូមិពោធិ៍ក្រូច ឃុំបន្ទាយក្រាំង ស្រុកកំពង់រោទ៌ ។
ប្រភពដដែលបន្តថា ក្រុមការងារបានសហការជាមូយលោក សុខ ពុទ្ធាវុធ អនុប្រធានមន្ទីរកសិកម្មខេត្តស្វាយរៀង ចុះទៅពិនិត្យដល់ទីតាំងដែលទំលាក់ចោលជ្រូកងាប់ចំនួន៤បាវ (ជិត១០ក្បាល) យកទៅធ្វើការដុត និងកប់ចោល ហើយបានធ្វើការអប់រំណែនាំដល់ម្ចាស់ផ្ទះស្តុកជ្រូកឱ្យធ្វើការសម្អាត និងបាញ់ថ្នាំសម្លាប់មេរោគជាប្រចាំ និងបានធ្វើកំណត់ហេតុ ព្រមទាំងកិច្ចសន្យា ដើម្បីទុកជាឯកសារ។
ចំណែកប្រជាពលរដ្ឋវិញបានលើកឡើងថា ពួកគាត់នៅតែព្រួយបារម្ភអំពីសុវត្ថិភាព សុខភាពរបស់ប្រជាពលរដ្ឋដែលរស់នៅជិតទីតាំងស្តុកជ្រូកមុនពេលសាងដឹកចេញ និងប៉ះពាល់ខូចផ្លូវលំតាមជនបទដែលច្បាប់កំណត់ឲ្យរថយន្តដឹកទំនិញធ្វើចរាចរណ៍បានត្រឹម១៥តោន ចំណែករថយន្តដឹកជ្រូក គឺរថយន្តភ្លៅ៥ទៅភ្លៅ៦ ដឹកជ្រូកចាប់ពី២៨០ក្បាលទៅ៣០០ក្បាលក្នុង១គ្រឿង បើគិតជាតោនចាប់២៥តោនទៅ៣០តោនឯណោះ ខូចផ្លូវអស់ហើយ៕ (កែសម្រួលដោយ ៖ បុប្ផា)
ចែករំលែកព័តមាននេះ