ព្រោះតែការរាតត្បាតនៃវីរុសកូរ៉ូណាក្នុងពេលថ្មីៗនេះ សាលារៀនជាច្រើនក្នុងប្រទេសកម្ពុជាត្រូវបានអនុ ញ្ញាតឲ្យសិស្សានុសិស្សឈប់សម្រាកវិស្សមកាលតូចមុនពេលកំណត់ ខណៈដែលក្រុមហ៊ុនជាច្រើនក៏បានជំរុញឲ្យបុគ្គលិករបស់ខ្លួនធ្វើការពីផ្ទះផងដែរ ។
សម្រាប់អាណាព្យាបាលដែលត្រូវធ្វើការផង និងមើលថែកូនៗផង អ្នកប្រហែលជាត្រូវជួបប្រទះនូវឧបសគ្គកាន់តែច្រើនក្នុងការរកលំនឹងភាពរវាងគ្រួសារ និងជីវិតហើយ ។ យោងទៅតាមអ្នកជំនាញផ្នែកអភិវឌ្ឍន៍អាជីព ប្រ៊ី រេយនលស៍ (Brie Reynolds) ខាងក្រោមនេះ គឺជាគន្លឹះងាយៗដែលអ្នកអាចអនុវត្តដើម្បីធ្វើការងារឲ្យមានប្រសិទ្ធិភាពពេលដែលកូនៗនៅផ្ទះ ។
១-បង្កើតតារាងពេលវេលាឲ្យបានច្បាស់លាស់
ប្រសិនបើសាលារៀនកូនៗរបស់អ្នកមានរៀបចំជាការរៀនតាមប្រព័ន្ធអនឡាញនោះអ្នកប្រហែលជាមិនជួបនូវបញ្ហាច្រើនទេ តែសម្រាប់កូនៗដែលមិនមានកម្មវិធីរៀនបែបនេះ ឪពុកម្តាយគួរតែរៀបចំពេល វេលាច្បាស់លាស់ដូចសាលារៀនដែរ ។ មានន័យថាកូនៗត្រូវតែមានពេលវេលាក្រោកពីដំណេកឲ្យបានច្បាស់លាស់ ពេលវេលាទទួលទានអាហារ ពេលវេលារៀនមុខវិជ្ជាអ្វីមួយដោយខ្លួនឯង ឬពេលវេលាសម្រាប់ការសម្រាកជាដើម ។
២-រក្សាការទំនាក់ទំនងជាមួយស្ថាប័នការងារឲ្យបានច្បាស់លាស់
បើអ្នកជាមនុស្សដែលមានគ្រួសារមានកូនតូចៗ ឬសមាជិកច្រើនរស់នៅក្នុងផ្ទះតែមួយនោះ អ្នកប្រហែលជាចៀសមិនផុតពីការរំខានក្នុងកំឡុងពេលប្រជុំតាមប្រព័ន្ធអនឡាញទេ ។ ដោយហេតុដូចនេះ អ្នកគួរតែប្រាប់ខាងស្ថាប័នការងារឲ្យបានច្បាស់លាស់ពីស្ថានការរបស់អ្នកដើម្បីចៀសវាងការយល់ច្រឡំ។
៣-កំណត់ព្រំដែនច្បាស់លាស់ជាមួយកូនៗ
ក្មេងៗចៀសមិនផុតពីរំភើប និងសប្បាយចិត្តទេពេលដែលឃើញឪពុកម្តាយខ្លួននៅផ្ទះជាមួយខ្លួនព្រោះពួកគេអាចគិតថាវាជាពេលសម្រាកលំហែកាយជាដើម ។ ដោយហេតុដូចនេះ ឪពុកម្តាយគួរតែនិយាយជាមួយកូនៗឲ្យបានច្បាស់ថាអ្នកត្រូវការពេលវេលា និងភាពស្ងៀមស្ងាតដើម្បីបំពេញការងារ ហើយអ្នកនឹងចំណាយពេលជាមួយពួកគេពេលដែលអ្នកបញ្ចប់កិច្ចការសំខាន់ៗដែលមានក្នុងថ្ងៃនេះ ៕
ចែករំលែកព័តមាននេះ